Төрскнч седклтә багшин күцәмҗ

Сегодня, 13:23 | Общество, Таңһчин зәңгс, Зіњг, Марєан

Одахн «Келни билг» мөрәһәр ачлгдсн улсин нерд медгдв. Эдн мана төрскн кел хадһллһнд болн делгрүллһнд нилчән күргҗ йовна.
Хальмг келнә болн утх-зокъялын йилһән сән багш болҗ Баһ Дөрвдә района Уңһн Төөрәч селәнә дунд сурһульд көдлҗәдг, Хальмг Таңһчин «Җилин багш» гидг марһана нүүрләч Цагдан Кару (зургт) заагдв. Терүнә сурһульчнр района болн таңһчин хальмг келнә марһаст орлцҗ дииләчнрин нер зүүнә.
Кару Григорьевич эврән Баһ Дөрвдә района Хончнура дунд сурһуль төгсәһәд, Хальмг ик сурһульд хальмг келнә багшин эрдм дасад, 2009 җиләс авн Уңһн Төөрәч селәнә дунд сурһульд арвн зурһан җилдән көдлҗәнә. Күүкднь цугтан төрскн келән сәәнәр меднә, хальмг бичәчнрин шүлгүд чееҗәр умшна, района болн таңһчин марһаст дару-дарунь орлцна. Тер мет эднд Хальмг улсин тууҗ-сойл соньн болна.
«Йилһән сән сурһульч - хальмг келнә билгт» гидг әңгд Көтчнрә района Алцнһуд селәнә дунд сурһулин 11-ч классин сурһульч Манҗин Владимир «Келни билг» мөрәһәр ачлгдв. Билгтә арвт Әрәсән төрскн келнә марһана дииләч болв, Хальмг Таңһчин төрскн келнә марһанд кесг дәкҗ йилһрсн болдг.
Бичкдүдин садын йилһән сән сурһмҗлач болад, Элстин 20-ч тойгта «Нарн» садын көдләч Настан Виктория бас ачлгдв. Билгтә көдләчиг таңһчд цугтан меднә. «Төрскн келнә болн утх-зокъялын йилһән сән багш» гидг Цугәрәсән марһана дииләчнь эн болсмн. Бурятин Улан-Удэ хотл балһснд тер марһан нидн давулгдсн.
Хальмг кел сәәнәр меддг Баранговихнә өрк-бүл эн марһанд бас ончрв. Андрей Борисович болн Светлана Николаевна Баһ Дөрвд селәнд бәәнә, өвкнрин келән, сойлын зөөрән хадһлҗ күүкдтән төрскнч сурһмҗ өгч сән үлгүр болна.
«Келни билг» мөрән дииләчнриг йөрәҗәнәвидн, эднә төрскнч седклтә үүлдвр өсәд-өргҗәд йовтха!

ТҮРВӘН Һуна

Видео