Лаганя әмтнд амрлһна өдр ончта үүлдвр болсарн тодлгдв. Таңһчин әмтн чигн эн йовдлыг байрин седклтәһәр тосв. Иргчин Бурхна - Мәәдр Гегәнә бумбин өөр олн улс цуглрҗ зальврв. Әрүн чинртә эн бумбиг ясч шинрүлснә хөөн әрвслҗ, үүлдврт оруллһна шаҗна йосрхл энд күцәгдв.

«Бамб цецг» дууна болн бииһин ансамбль Әрәсән балһсдар гастрольд йовҗана. Хальмгин ансамбль 11 балһснд билг-эрдмән үзүлхмн. Һаха сарин 16-ас авн 28 күртл коллектив үүдәгч хаалһд йовхмн. Эн олн балһсдын хәләһәчнр хальмг ду-биилә таньлдҗ, ансамблин белдсн шин үүдәврмүдиг чигн үзхмн.
Ансамблин һардач, Хальмг Таңһчин билг-эрдмин ачта үүлдәч Катан Саврин келсәр, эднә коллектив «Бидн – Әрәсә» гидг шаңһа ик төсвин йовудт зуульчллһан эклв. Тавн җилин туршарт келн-улсин үүдәгч коллективс Әрәсән регионмудын әмтиг келн-улсин сойлла таньлдулҗана. «Бамб цецг» урдк җилмүдт чигн эн төсвин йовудт Кавказин, Төв Әрәсән, Иҗлин көвән һазрар йовҗ концертсән үзүлсн билә.

Һаха сарин 18-әс авн 20 күртл Әрәсәд Орн-нутгин Хүүвин депутатнрин суңһвр болв. Һурвн өдрин туршарт мана таңһчд ут тоодан 224 суңһврин әңг көдлв. Басң өдрәс авн Хальмгин иргнмүд суңһврт шунмһаһар орлцсинь темдглх кергтә.

Хальмг Таңһчин Улсин Хуралын (Парламентин) Ахлач Артем Михайлов, һаха сарин 18-д Әрәсән Орн-нутгин Хүүвин депутатнрин суңһврт орлцв. Приютна района Первомайский селәнә сойлын Герт бәәршлсн 137-ч тойгта әңгд эн дууһан өгв.

Тер мет һаха сарин 18-д Хальмг Таңһчин залврин Ахлач Босхмҗмин Гилән Элстин олн салврта гимназин улд үүлдҗәсн суңһврин 48-ч тойгта әңгд дууһан өгв.
«Мана Төрскнә күчнь өсч, орг-нутг цецгәртхә гиҗ дууһан өгләв. Яһад гихлә суңһвр – энтн мана бәәдл-җирһлин ик чинртә йовдл болҗана. Күн болһн эврәннь ухан-тоолвран медүлҗ, сарул-сәәхн иргчин төлә дууһан өгчәнә, терүнә төлә цуг таал тогтагдсн бәәнә», – гиҗ Гилән Герасимовна тоолвран келв.

Суңһвр болсн өдрмүдт Элстд болн таңһчин райодар үүлдсн суңһврин әңгүдт дууһан өгсн суңһачнр ухан-тоолврарн хувалцв:

Хальмг Таңһчин Толһач Хаска Бату болн таңһчин залвр номтнрин үүлдвриг үнлҗ, цуг халхин дөңгән күргҗәнә. Одахн таңһчин Толһачин һардврин ахлачин дарук Шипин Екатерина болн сурһуль-эрдмин болн номин министр Александр Ким ик сурһулин оютнриг ик күцәмҗләнь йөрәхәр ирв.

Хальмг ик сурһульд шин эв-арһс олзллһнд һол оньган өгнә. Эндрк өдрин девшлтиг түргдүлхин төлә Хальмг ик сурһульд Адыгейин шаңһа ик сурһулин, Краснодарин эмнлһнә болн Москван тосхлтын ик сурһульмудын мергҗлтнр-шинҗләчнр ирҗ, хойр өдрин эргцд бәәрн номтнрла олн төрәр өргн күүндвр кев.
Хальмг номтнр теднә сүв-селвгиг өөдәнәр үнлв. Тер төрәр тооһин заллтын һардач Андрей Онтаевин келсн үг онц чинртә болв. Төсв белдлһнә кемд үүрмг кергүдт бас оньган өгх кергтә, гиҗ күндтә шинҗләчнр селвглв, терүг бидн дарук төсв белдлһнд эрк биш олзлхвидн. Төсвиг бидн үкр сард харсх зөвтәвидн, тиигхд талдан вузас ирсн мана үүрмүд дөңгән күргәд бәәх, гиҗ эн темдглв.

Өцклдүр Әрәсәд Орн-нутгин Хүүвин депутатнрин суңһвр эклв. Хальмг Таңһчд болхла ут тоодан суңһврин 224 әңг көдлмшән эклв, тер тоод Элстд суңһврин 48 әңг экләд үүлдв.

Нидн Хальмгин күүкд улсин ниицәнә седвәрәр таңһчин Толһачин зәрлгәс иштә мана таңһчд олн үртә өрк-бүлин сән Өдр батлгдсн болдг. Һаха сарин һурвдгч нарн өдрлә эн байриг темдглх болҗ шиидгдсмн. Олн үрән өскчәдг эк-эцкнриг дөңнәд, өрк-бүлин чинриг улм өөдлүлхин төлә эн өдр батлгдснь лавта.