Шидр Москва балһснд «Бичкн Төрскн – Әрәсән күчн» Цугәрәсән хургин йовудт нег һазра Базыра Светланад Әрәсән бәәрн һазрин йосна залврин ачта көдләчин нерн зүүлһгдснь темдгтә болв. Хальмг Таңһчин Толһач Хаска Бату Светлана Эрднеевнаг өөдән ачлвр авснлань йөрәв.

«Әрәсә – эв-арһсин орн-нутг» гидг бүрдәцин «ТопБЛОГ» Цугәрәсән төсвин зурһадгч девсң эклв, тегәд Хальмгин түүрвәчнрт терүнд орлцх үрвр кегдв. Шин девсң «Родной контент» гидг төрәр давулгдхмн. Марһанд орлцачнр орн-нутгин зәңгллһнә халхин нүүрлгч шинҗләчнрлә харһхмн, чинртә төсвст орлцхмн, Әрәсән бүрдәцслә хамдан шаңһа төрмүд хаһлҗ көдлхмн. Эврәннь эрлһән «ТопБЛОГ» төсвин сайтд орулҗ болхмн.

Әрәсән шаңһа бичкдүдин дегтрин саңгин болн «Движение первых» җисәнә дөң-нөкдәр «Медрл» ниицән «Өрк- бүлдән хамдан умшчанавидн» нертә видеозурцин цугәрәсән марһанд эрлһс орулҗ авчана. Бичкдүд болн бөдүн улс хамдан сул цаган давуллһна керг- үүлдвриг олн дунд тархалһн эн ик кемҗәтә үүдәгч төсвин һол күслнь болҗана. Әрәсән Президент Владимир Путин ирлцңгү марһа давуллһна седвәр бас дөңнсн болдг.

Эн долан хонгт «Эрдмчнр» Әрәсән марһана таңһчин девсң эклв. Т.Хахлынован нертә медицинск колледжин оютнр «Медицинск болн социальн хәләвр» болн «Эмнлһнә үүлдвр (фельдшер)» гидг марһана даалһвр күцәв. Марһанд орлцачнриг таңһчин эрүл-менд харлһна министрин дарук Сарңга Гиләш йөрәһәд, күцәмҗ дурдв. Эн марһанд орлцхар Луганск Улсин Республикин Антрацитын медицинск колледжин элчнр ирснь темдгтә, тегәд күндтә гиичнриг цуһар байртаһар тосв.

Шидр Хальмг Таңһчин Улсин Хуралын (Парламентин) Ахлач Артем Михайлов зака үүдәгч хургин үүлдврин тускар бичдг седкүлчнрлә харһад, эдн дунд 2025 җилд зарлгдсн марһана аш диглв.

Цугәрәсән «Эрдмчнр» гидг марһана регионмудын девсң эклв. Ода мана таңһчин колледжмүдин оютнр чигн бас марһанд белдҗәнә. Түүнә тускар Элстин политехникин колледжин һардачин дарук Бембән Екатерина маднд келҗ өгв. «Регионмудын девсң 2026 җилин лу сарин 15-ас авн 20 күртл, тавн өдрин эргцд болхмн. 2017 җиләс авн мана колледж «Эрдмчнр» марһанд шунмһаһар орлцҗ күцәмҗ бәрнә. Эн җил мана политехникин колледжин ул деер 4 талвң көдлх, энд «Веб-эв-арһ», «Ниигмин көдлмш», «Веб-дизайн» болн «Модна неквртә хувцна эв-арһ» гидг әңгд оютнр марһлдх, - гиҗ Екатерина Михайловна цәәлһв.

Хулһн сарин 1-д мана орн-нутгт медәтнрин Өдр темдглнә. Эн сән өдрт нерәдҗ, таңһчин социальн делгрлтин министерств ах үйин улс дунд «Серебряная звезда» гидг марһа зарлв.

Ноха сарин чилгчәр Москвад һурвн өдрин эргцд «Бичкндк цаг урмд өгнә» гидг көтлврин Цугәрәсән наадмин ашлгч девсң болв. Терүнә өмн моһа сарас авн така сар күртл холас орлцлһна керг-үүлдвр болв. Терүнә йовудт Әрәсән цуг регионмудын сурһульмудын кесг миңһн күүкн-көвүн эврә көтлврән бичәд, марһанд белдсн үүдәврән йовулсмн, жюри эднә билг-эрдминь үнлсмн.

Нидн мана орн-нутгт өрк-бүлин җил зарлгдсн билә, тегәд терүнә йовудт Әрәсән Президент Владимир Путинә седвәрәр «Энтн мана өрк-бүлин» гидг марһан бүрдәгдсмн. Терүнд ут тоодан 600 миңһн күн орлцв. Хальмг Таңһчас терүнд Корниенкон өрк-бүл орлцад, ашлгч девсңд һарсмн. «Әрәсә – эв-арһсин орн-нутг» гидг марһан эн җил «Өрк-бүл» гидг келн-улсин төсвин нег әңгнь болв.

Хальмг Таңһчин социальн делгрлтин, күч-көлснә болн көдлмшәр тетклһнә министерствин седвәрәр мана таңһчд сүл җилмүдт «Өрк-бүлин байрта агчм» гидг зургудын марһан болна. Терүг өрк-бүлин, дурна болн итклин Өдрт нерәдҗ давулна. Шидр ирлцңгү марһанд диилвр бәрсн өрк-бүлмүдиг ачлҗ сән өдрин байрла йөрәв.