Көдлмшч эрдмтә мергҗлтнриг белдхәр

Сегодня, 12:57 | Общество, Таңһчин зәңгс, Зіњг, Сурєуль-эрдм

Хальмг Таңһчин колледжмүдт 2026 җилин абитуриентнриг орулҗ авлһна дааврта керг-үүлдвр төгсчәнә. 9-ч болн 11-ч классан төгсәсн арвтнрт тааста эрдмән шүүҗ авхин төлә зуг цөөкн өдр үлдв.
«Ода таңһчин сурһульчнр эртәр эрдмтә улс болхин төлә колледжмүдт сурхар шииднә. Тегәд чигн җил ирвәс дунд шишлң сурһулин бүрдәцст орх саната баһчудын то өсәд йовна»,- гиҗ таңһчин сурһуль-эрдмин болн номин министерствин ах мергҗлт Кермн Муева келв.
Иргч 2026-2027 сурһулин җилд Хальмг Таңһчин төлә шаңһа 1500 орм йилһгдв. Эн җил сурһульчнр дунд тааста эрдм шүүҗ авлһна туст цәәлһврин көдлмш эртәр кегдв болн оютнриг дасхлһна көтлврт сольвр орулгдв. Ода таңһчд «Россия – мои горизонты» гидг көтлвр өргнәр олзлгдҗана, терүнә йовудт 6-11 классмудын сурһульчнриг колледжмүдт дасхдг кесг эрдмлә өөрхнәр таньлдулҗ цәәлһврин көдлмш давулгдна.
Элст балһсна сурһульчнрин кесгнь «Кванториум» технопаркд болн «Үүдәлтин индустрийин сурһульд» кичәлд орад, шин медрл дасна. Эднәс 300 һар арвт техниклә залһлдата кичәлиг шүүҗ авв. Колледжмүдин кергсл, лабораторьмуд җил ирвәс шинрүлгдәд йовна, өдгә цагин шин эрдмин әңгүд секгднә. Таңһчин сурһуль-эрдмин болн номин министр Александр Кимин тоолврар, йосн биш уханла, эврән залдг нисдг тоотла, зуульчллһнла залһлдата эрдм иргчдән улм икәр керглгдәд бәәх болна.
«Эрдмчнр» көтлврлә ирлцҗ шин төв тогталһна марһаг Әрәсән гегән-герлин Министерств зарлҗ, СПО-н йилһән сән бүрдәцсиг шүүҗ авна. Терүнә ашар 2026 җилин хөн сард Элстин политехникин колледж «Тосхлтын салвр» гидг зөрүллтәр дииләчнрин тоод орв. Тер төсв күцәлһнд Хальмг Таңһчд шаңһа хазнас 100 сай арслң йилһгдхмн. Тер мет таңһчин хазна болн тосхлтын бүрдәцсин мөңгн бас олзлгдх», - гиҗ министр заав.
Хальмг Таңһчин нефтин болн газин колледжд эн өдрмүдт бас бәрмт цаас орулҗ авлһна кем төгсчәнә. «9-ч болн 11-ч классан чиләсн арвтнр һаңначин эрдм дасхар седнә, тер мет көлг яслһна эрдм эднд бас таасгдна, экономистин, һазриг меҗәллһнә, хувц уячин эрдм чигн шүүҗ авгдна. Тер мет эрдмән сольхар бәәдг улс мана тал ирҗ нег җилин болзгт шин эрдм дасна, ода деерән марһан давсн җилин йовудла әдлхн болҗана», - гиҗ колледжин һардачин дарук Онкудан Тамара келв.
Талдан колледжмүдт чигн арвтнр өдгә цагт икәр керглгдҗәдг эрдм шүүҗ авна. Колледжмүдт өдрәр сурдг әңгд орм үлдсн болхла арвтнриг үкр сарин 25 күртл орулҗ авхмн. Холас сурдг әңгд болхла бар сарин 1 күртл эрлһс орулҗ авгдна. Эн җил тиим шинрлт орулгдсн бәәнә.
Әрәсән залврин сүүрт вице-премьер Дмитрий Чернышенко болн орн-нутгин гегән-герлин министр Сергей Кравцов дунд шишлң сурһуль-эрдмин бүрдәцст арвтнриг орулҗ авлһна тускар келҗ өгв. Орн-нутгт ода өөдән мергҗлттә көдлмшчнр кергтә, тедниг белдхин төлә сурһулин ормсин то өсчәдг болна. «Баһчуд болн бичкдүд» гидг келн-улсин төсвин йовудт «Эрдмчнр» көтлвр өргнәр күцәгдҗәнә, терүнә ашт абитуриентнрин то 500 миңһнд күрв. 2026-2027 сурһулин җилд өңгәр сурх улсин төлә 880 миңһн орм һарһгдв. Эн җил колледжмүдт ут тоодан 1,4 сай арвт орулгдх гиҗ күләгдҗәнә.
ТҮРВӘН Һуна

Видео