Колледжин элчнр селвлцв

Сегодня, 12:52 | Общество, Таңһчин зәңгс, Зіњг, Сурєуль-эрдм

Одахн Элстд таңһчин колледжмүдин багшнрин селвлцән болв. Сән авъяст тохрсар, ноха сард болдг селвлцәнд көдлмшән үнн-чик седклтәһәр күцәдг көдләчнриг онц темдглҗ болв.
Тер тоод Элстин политехникин колледжин шишлң кичәлин багш Абушинә Анатолий болн эн колледжин һардачин дарук Силнән Жанна, нефтин болн газин колледжин багш Шарашкина Ирина Әрәсән Федерацин гегән-герлин Министерствин Күндллһнә һашгар ачлгдв. Тер мет Элстин багшнрин колледжин баһ наста мергҗлт Басңга Арслң оютнрт гүн медрл болн чик сурһмҗ өгдг төләдән Әрәсән Федерацин гегән-герлин Министерствин «Баһ насн болн мергҗлт» гидг темдгәр ачлгдснь бахмҗта болв. Т.Хахлынован нертә эмнлһнә колледжин багш Валерий Фоминд Хальмг Таңһчин сурһуль-эрдмин болн номин министерствин Күндллһнә һашг, нефтин болн газин колледжин багшнр Андрей Трушевд болн Җалсана Майяд министерствин Ханлтын бичгүд бәрүлҗ өггдв.
СПО-н делгрлтин өдгә цагин төрмүдин тускар пленарн сүүрт өргн күүндвр болв. Элстин политехникин колледжин һардач Васькинә Галина «Эрдмч» төсвиг яһҗ күцәҗәхин тускар дамшлтарн хувалцв. Эн төсв өөрхн иргчд талдан чигн колледжмүдт күцәгдх болв, тегәд эднә дамшлт ик соньмслт үүдәв.
«Абилимпикс» җисә делгрүллһнә, колледж төгсәсн баһчудыг көдлмшт орулҗ авлһна болн нань чигн төрмүдәр колледжмүдин һардачнр, теднә дарукс болн багшнр тоолврарн хувалцв.
ТҮРВӘН Һуна

Видео