Багшнр дамшлтарн хувалцв

Сегодня, 13:03 | Общество, Таңһчин зәңгс, Зіњг, Сурєуль-эрдм

Шидр таңһчин райодар болн Элстд сурһулин шин җил угтҗ багшнрин селвлцән болв. Сарпан района Уманцево селәнә дунд сурһульд цуглрсн Сарпан, Целинн, Көтчнрә, Октябрьск болн Баһ Дөрвдә райодын сән гисн багшнр ачлгдв. Тер тоод Баһ Дөрвдә района Тундутово селәнә дунд сурһулин һардачин дарук Инна Непенкина болн Плодовитое селәнә дунд сурһулин тууҗин багш Светлана Сафронова «Әрәсән сурһуль-эрдмин күндтә көдләч» гидг нер зүүв. «Келни билг» гидг таңһчин мөрәһәр ачлгдсн Баһ Дөрвдә района Уңһн Төөрәч селәнә дунд сурһулин хальмг келнә болн утх-зокъялын багш Цагда Каруд Әрәсән гегән-герлин Министерствин Күндллһнә һашг бәрүлҗ өггдв. Баһ Дөрвдә гимназин багш Бамбша Эльза Хальмг Таңһчин сурһуль-эрдмин болн номин министерствин Күндллһнә һашгар ачлгдв. Селвлцәнә йовудт багшнрин мергҗлт өөдлүллһнә таңһчин күрәлңгин көдләчнр кичәлмүдт өдгә цагин эв-арһс олзллһна төрәр тодрха цәәлһвр өгв. Ноха сарин 19-д Яшалта селәнә В.А.Панченкон нертә дунд сурһульд Приютна, Яшалтан, Ик Буурла, Городовиковск райодын багшнр селвлцв. Энүнд эн райодын толһачнр бас орлцв. Багшнр күцәх һол кергүд йилһәд, көдлмшин аш дигләд, йилһән сән багшнрин дамшлтын тускар келв. Сән авъяст тохрсар олн җилдән үнн-чик седклтәһәр көдлҗәдг багшнрт өөдән ачлвр бәрүлҗ өггдв. Тиигәд, Булгт селәнә дунд сурһулин багш Басңга Байрта болн «Бамб цецг» бичкдүдин садын сурһмҗлач Светлана Ковалева Әрәсән гегән-герлин Министерствин Күндллһнә һашгар ачлгдв. Воробьевка селәнә дунд сурһулин һардач Елена Фоменко болн Приютна лицейин психолог Анастасия Фирсова Хальмг Таңһчин сурһуль-эрдмин болн номин министерствин Ханлтын бичгәр мөрәлгдв. Элстд ноха сарин 20-д болсн селвлцәнд хотл балһсна багшнр цуглрад, сурһуль-эрдм делгрүллһнә зөрүллтсин тускар күүндв. «2022 җилин Әрәсән йилһән сән багш», Әрәсән гегән-герлин Министерствин Олна хүүвин ахлач Дмитрий Лутовинов күндтә гиич болҗ эн керг үүлдврт орлцв. Шин җилд сурһуль-эрдмин халх яһҗ делгрхин, ямр төрмүд күцәхин тускар күүндвр болв. Сурһуль-эрдмин йилһән сән көдләчнр энд бас ачлгдв. Тиигәд хотл балһсна 14-ч тойгта «Герл» садын ах сурһмҗлач Раиса Афанасьева «Элст балһснд ач-тусан күргснә төлә» гидг темдгәр ачлгдв. 12 багш Әрәсән сурһуль-эрдмин күндтә көдләчнр болв, Элстин 4-ч тойгта дунд сурһулин һардач Очр-Һәрән Еленад «Хальмг Таңһчин ачта багш» гидг күндтә нерн зүүлһгдв. Цуглрсн багшнр сурһуль-эрдмин бүрдәцст әәмшг уга бәәдл тетклһнә болн залврин көдлмш ясруллһна төрәр бас селвлцв.
ТҮРВӘН Һуна

Видео