Селәдт бәәдг баһчудыг дөңнәд

Сегодня, 13:05 | Общество, Таңһчин зәңгс, Зіњг, Сурєуль-эрдм

Орн-нутгт селәнә эдл-ахун делгрлтд болн терүнә төлә кадрмуд белдлһнд һол оньг өггдҗәнә. «АПК-н кадрмуд» гидг шаңһа төсв тер чинртә керг күцәлһнд туслҗана. Әрәсән Залврин сүүрмүдт селәнә эдл-ахун делгрлтин төрмүд даңгин хәләгднә. Баһ наста мергҗлтнрин то өсх зөвтә гиҗ неквр тәвгдҗәнә. АПК-н халхд шин эв-арһс олзлх баһчудыг белдхин төлә сурһульмудын улд агроклассмуд секгдҗәнә, селәнә эдл-ахун халхар шинҗллт кеҗәдг, терүг делгрүлҗәдг багшнриг болн номтнриг дөңнх кергтә гиҗ темдглгднә.
Хойр җилин эргцд Әрәсән залвр эн төр хаһллһнд шаңһас мөңг йилһхмн, эн җил 9,5 җува арслң һарһгдхмн. АПК-н бүрдәцс эн керг-үүлдврт орлцдг болв, эдн сурһуль-эрдмин бүрдәцсин делгрлтин төсв күцәлһнд мөңгән йовулҗана. Тер тоод агроклассмудыг кергсләр тетклһнә, ясвр келһнә, ик сурһульмудын багшнрин төлә гер-бүүр хулдҗ авлһна болн оютнриг сурһульд йовуллһна төлә өгсн мөңгнь даңцагдх зөвтә.
Тер мет мал эмнлһнә халхар мергҗлтнр кергтә болҗана. Баһчудыг ик сурһульд йовулсн бүрдәцс эврә һару даңцалһнд мөңг авхмн.
Хальмг Таңһчин һардвр селәнә эдл-ахун делгрлтд һол оньган тусхана. Эн җил элвг урһц хурагдв, тәрәчнр нег сай тонн буудя хураҗ авв. Яшалтан, Городовиковск, Приютна болн нань чигн райодын тәрәчнр ик күцәмҗ бәрҗ көдлв. Ода эдл-ахуст малын хот белдлһнә дааврта кем давҗана. Эн саамд таңһчин номтнрин шинҗллтин көдлмш бас үнлх кергтә. Мана таңһчин селәнә эдл-ахуд ирҗ көдлх баахн мергҗлтнрин төлә җирһлин сән таал тогтагдҗана. Селәнә эдл-ахун техникиг сәәнәр меддг мергҗлтнриг белдлһн ик чинртәд тоолгдҗана, тегәд чигн орн-нутгин Залвр эн кергт һол оньган тусхаҗахнь тер.
ТҮРВӘН Һуна

Видео