Теегин сувсн һарсн өдрән темдглв

Сегодня, 12:57 | Общество, Таңһчин зәңгс, Зіњг

Һаха сарин 12-т Элст хотл балһсн һарсн өдрән өргнәр темдглв. Байрин керг-үүлдврмүд «Әрәсә гисн би» нертә бичкдүдин тергдин йовлһнас эклв. Аавнр-ээҗнртәһән, экнр-эцкнртәһән, ахнр-дүүнртәһән олн зүсн өңгтә тергдт суусн нилхд балһсна төв уульнцар йовв. Элстин бичкн иргнмүдиг балһсна һардврин ахлачин дарук Довгопола Дмитрий бүләнәр йөрәв.
– Эндр Элстин дунд сурһульмудт 13 миңһн һар сурһульч сурна, бичкдүдин садмудт болхла зурһан миңһн көвүн-күүкн орна. Иргчдән мел эдн мана балһсна делгрлтд ач-тусан күргәд бәәхмн, – гиҗ Дмитрий Сергеевич онц темдгләд, ке-сәәхн йовлһнд орлцсн өрк-бүл болһнд арвн миңһн арслңга сертификатмуд бәрүлҗ өгв.
Дарунь Элстин Диилврин талвңд хамгин чидлтә, чаңһ-чиирг улсин дунд «Аю-2026» спортын марһан эклв. Тенд зурһан күн орлцад чидлән сөрв.
Тер өдр үдин хөөн мана балһснд бәәдг олн келн-улсин элчнр ке-сәәхн хувцан өмсәд, ирлцңгү байрин йовлһнд бас орлцснь кеермҗтә болв. Бурхн Багшин Алтн сүмин өөр олн-әмтн цуглрад, Элстин төв күртл йовһар ирв. Тедн дунд балһсна һардврин элчнр болн Элст балһсна Хургин депутатнр үзгдв. Долан хонгин күрән талвңд Элст балһсна билг-эрдмин сурһульмудын хамцу оркестр болн хор эдниг тосад, төрскн балһсна туск дуд дуулҗ, әмтнә оньг авлв.
Көглтин Даван бумбин шидрт болхла шүлгүдт дурта улс цуглрв. Төрскн балһсндан нерәдсн шүлгүдиг нертә шүлгчнр, сурһульчнр умшснь соңсгдв.
Асхн зурһан часла Диилврин талвң тал олн-әмтн темцв. Тенд байрин концерт эклв. Элст балһсна Хургин ахлач Максим Сорокин нег һазра улсан йөрәҗ, Теегин сувсн болҗадг мана балһсн өдр ирвәс өсәд-өргҗәд йовхиг темдглв. Тер мет Элстд таңһчин бәәтхә Цугәрәсән болн нарт-делкән чинртә керг-үүлдврмүд давулгдҗахин тускар бас келв. Тодлхас, нидн шар шаҗна нарт-делкән III ик хург болв, шидр болхла Элстин чонҗд Иисус Бурхн бууҗ ирснә 80 җилин өөн өргнәр темдглгдв гив. Хальмг Таңһчин Толһач Хаска Батун нилчәр болн дөңгәр мана балһсн цааранднь делгрәд йовх гисн итклтә бәәнәвидн, гиҗ Максим Александрович товчлв.
Таңһчин нертә артистнр Очкан Анна, Босхмҗин Диана, Һәрән Лиҗ, Мукөвүнә Кутлан, Эрднь-Һәрән Амулң болн бичкдүдин бииһин коллективс билг-эрдмән үзүлҗ, цугтаһинь байрлулв.
Тогтсн авъясар, сән Өдрлә ирлцҗ, Элст балһсна делгрлтд ач-тусан күргсн улс олн ачлврмудар темдглгдв. Элст балһсна күндтә иргнә нерн тосхлтын ветеран Секенә Николайд болн хөрн һар җилдән бичкдүдин үүдәлтин Гер һардҗ йовсн Чурбана Людмилад зүүлһгдсн болдг. Тер мет Элстин бүрдәцст көдлдг мергҗлтнр Күндллһнә һашгудар болн Ханлтын бичгүдәр ачлгдв.
2025 җилд Хальмг Таңһчин, Бурятин, Тыван, Якутин болн Алтан Республикин дуучнр ханьцад, «Нүүдл улсин дуд» нертә соньн төсв ода күцәҗәнә. Эн төсвд орлцачнр Элстд ирәд, байрин концертд орлцснь темдгтә болв.
Хальмгин Келн-улсин оркестрин артист Ханьна Мингиян, Тыван улсин артист Ишкин Оглу, Алтан Республикин ачта артист Эмиль Толкочеков, Якутин нертә дууч Кэскил Баишев болн Бурятин баахн артист Ринчин Дашицыренов Элстд гиичлв. Дуучнр эврә келәр, тер мет хальмг болн орс келәр олнд таасгдсн дуд дуулад, элстихнә седкл авлв. «Нүүдл улсин дуд» төсвиг үүдәсн Тыва Республикин билг-эрдмин ачта үүлдәч, көгҗмин продюсер Седен-Очур Кара-Сал Элст балһсна иргнмүдиг сән Өдрләнь йөрәв: «Җил хооран эн көгҗмин төсв Кызыл балһснд үүдв, ахнр-дүүнр болҗадг үүрмүдтән ирх седклтә биләвидн. Элстд ирәд, үстә нүдәрн үзлцәд, тана байрт орлцсндан ик байрта бәәнәвидн».

КАРСАНА Евгения

Видео