Төрскн театртан итклтә билә

Сегодня, 12:47 | Общество, Таңһчин зәңгс, Зіњг

Басңга Баатрин нертә Келн-улсин театр эн җил 90 җилин өөнән темдглхмн. Хальмг улсин сойлын җирһлд ик чинр зүүҗәдг театрин үүлдвр цугтад йир соньн болна, энүнә тәәз деер кесг үйин артистнр көдлсмн.

Нер туурсн Ленинградск студиг төгсәсн билгтә артистнрин негнь Көкән Алефтина бәәсмн. Эн җилин така сарин 16-д Алефтина Убушаевна 90 насна өөнән темдглх бәәсн мөн. Дөчн һар җилдән төрскн театрин тәәз деер олн дүрмүд тогтаҗ, дурта эрдмдән үнн седкләрн церглҗ йовсн билгтә артисткин нерн ода чигн мартгдад уга.
Георгий Товстоноговин һардврт сурх хөв Алефтинад учрсмн. Нертә режиссермүд болн артистнр театрин эрдм дасхад, илвтә эн делкән хаалһд орулсн болдг.
Тиигәд оютна цагтан Алефтинад «Дикая собака Динго» болн «Великий самоед» гидг фильмст наадх хөв учрв. Фильм цокч авна гисн ямаран үүлдвр болҗахиг күүкн медҗ авв. Артисткин үүлдврлә экләд таньлдҗасн Алефтинад тернь йир сән дамшлт болв. Нертә артистнр яһҗ нааддгиг үзәд, теднә дамшлтас бийдән шиңгәҗ авхар эн шунв. Артистк болсндан Алефтина йириндән ик хөв-кишг гиҗ тоолдмн. Сиврин тууврин цагт күүкнә экнь гемнәд, эртәр сәәһән хәәв. Нәәмтәдән күүкн өнчрәд, эцкән, ээҗән хәләх зөвтә болв. Ээҗнь өңгрснә хөөн эцкнь гер авад, орс күүкд күүнә хәләврт бәәв. Тиим учрар хальмг келән эн сәәнәр меддго бәәсмн. Төрскн һазртан хәрҗ ирхләрн, күүкн Әәдрхнә мүҗин Оля селәнд дунд сурһуль төгсәв. Медицинск күрәлңд орхар седҗәһәд, хальмг баһчудыг Ленинградск театрин күрәлңд шүүҗ авчахин тускар соңсад, Алефтина Элстүр ирв. Зууран хамдан сурчасн Очра Борисла харһад, терүнд бас зәңгләд, хамдан белдәд, тер студин оютнр болсмн. Билгтә күүкн сурчасн цагтан дуулад-бииләд, наадд тәвлһнд орлцҗ йовсмн.
Сурһулин җилмүд кезәһүр давснь нам медгдсн уга. Хальмгт ирҗ көдлсн цагас авн ленинградск артистнр театрин үүлдврт шин әмсхл өгсн мет уралан зүткв. Көкән Алефтина театрин тәәз деер күүкд улсин дүрмүд тогтаҗ, өвәрц бәәдләр үзүлҗ чадв. Баһ наста артистк сән белдвр авсинь ах үйин үүрмүднь онц темдглв.
70-80-ч җилмүдт хальмг театр райодар, селәдәр гастрольд даңгин йовдг билә. Селән болһнд эдниг күләдг, ирсн цагтнь байртаһар тосч авдг юмн.
Үнн седклин бүлән харһлтс хаалһдан муурад зовсиг мартулдг бәәснә тускар Алефтина Убушаевна келдгнь тодлгдна. «Әмтнд мана наадн кергтә болҗахнь урмд өгәд, дәкнәс ирҗ, эн улсла харһх седкл үүддг билә», – гиҗ келсинь соңсч йовлав.
Тәәз деер бүрдәсн дүр болһн үүдәгч үүлдврин делгрлтд туслад бәәв. Авальтаһан, нертә артист Александр Сасыковла хамдан эдн баһ наста артистнрлә дамшлтарн хувалцҗ йовсмн. Элстин көгҗмин училищд (ода билг-эрдмин колледж) оютнрт театрин туск эклц медрл зааҗ йовсмн.
Ачта амрлһнд һархларн Алефтина Убушаевна театрин тууҗиг хадһлхар, театрт тәвгдсн нааддын үй болһна артистнрин туск соньн тоот, эднә тодлврмуд цуглулҗ ик көдлмш кев.
Һо цогцта, һольшг заңта Алефтина Убушаевна хувцндан йир зокдг бәәсмн. Цагин неквр дахсн, цугнь ирлцәтә хувцнь даңгин әмтиг соньмсулдг билә.
Театрин күрәлңд сурчахдан Алефтина хамдан сурчасн Александр Сасыковла эңкр иньгүд болв. Әмтнлә ээлтә Алефтина Александр хойр эврәннь дуран насни туршт хадһлад, хамдан көдләд, дурта кергтән насн-җирһлән нерәдсмн. Өөр-шидрк улстан сана зовад, тусан күргхәр эдн шундг билә. Өнчрәд үлдсн элгн-саднаннь һурвн үриг эдн өскәд-босхад кү кев. Эн хойр билгтин седклин залиг ода күүкднь болн сурһульчнрнь әрүнәр хадһлҗ йовна.

УШКАНА Сувсн

Видео