Тәвн җилдән таварн бәәдг

Сегодня, 12:16 | Общество, Таңһчин зәңгс, Зіњг

Күн болһн седклднь туссн күүнлә олн җилдән ниитә бәәҗ, олн ачнр-зеенрән бәәтхә җичнрән үзәд көгшрхин тускар ухална. Баһ цагтан ханьцад, җирһлин хаалһдан байр-зовлңган әдл хувалцҗ, алтн хүрмән темдглсн улс элгн-садндан үлгүр-үзмҗ болдгнь лавта.
Элст балһснд бәәдг Саңһҗин Борис Баяна хойр 1976 җилд өрк-бүлән өндәлһәд, тәвн җилин туршарт нег-негндән ицлтә түшг болҗ йовна. Алтн хүрмән темдглсн Борис Михайлович Баяна Николаевна хойр дурна залян хадһлад, хойр көвүндән, ачнртан болн җичдән нүдн-амн болҗ бәәхнь бахмҗта. Насни турштан тааста эрдмәрн көдләд, таңһчин делгрлтд ик ач-тусан күргсн улс эндр ачта амрлһнд бәәнә. Эднә җирһлд учрсн ончта йовдлмуд сергәһәд, хуучн зургуд хәләһәд, баһ цагин тодлврмудт авлгдна.
Эдн Яшкулин района Һашун селәнд өсәд-боссмн. Саңһҗин Борис болн Цевгә Баяна хамдан нег сурһульд сурад нег-негән таньдг-меддг билә. Сурһулян төгсәнә хөөн баһ наста улс талдан балһсдт ик сурһульд орв. Борис Әәдрхнә медицинск ик сурһульд, Баяна болхла Хальмг ик сурһульд сурна. 1975 җилин бар сарин 31-д төрскн селәндән ирсн баһчуд сойлын Герт Шин җилин байрт дигтә Баянан һарсн өдр харһад үүрлдг болв. Дууч-биич, үгтә-күүртә, эвтәкн цогцта өкәр күүкн тер дарунь гилтә баахн көвүнә зүрк авлв.
Баяна Николаевна тер цагт Целинн района Деед Яшкулин сурһуль-интернатд көдлҗәлә. Нег дәкҗ Борис энүнд җиңнүләд, мендинь медхлә, хоолнь өвдәд, гемтҗәхнь медгдв. Удан боллго Борис таксиһар ирәд, энүг Элстүр эмчд күргв. Өрәл җил болад өрк-бүлән өндәлһхәр шиидв. Тиигәд эднә хүрм Борисин һарсн өдрлә 1976 җилин ноха сарин 25-д болсмн.
- Тәвн җилдән бидн хамдан бәәнәвидн. Эн җилмүдин эргцд юн эс учрв, болв бидн нег-негән күндләд, тесвртә болад, алтн хүрмдән күрвидн. Мини тоолврар, залу күн өрк-бүлән теҗәх, өөрхн улстан түшг болх зөвтә, күүкд күн болхла герин чимг гидг. Күн болһна җирһлд олн зүсн йовдл учрна, керүл-цүүгән чигн һарна, бидн болхла үгән бәрдг йоста залу болҗ өсхин төлә хойр көвүндән сән сурһмҗ өгхәр шундг биләвидн. Эндр мана ачнр болн җич мана уңг-тохмин нер һарһҗ йовна - гиҗ Борис Михайлович келнә.
Саңһҗин Борис таңһчин бичкдүдин эмнлһнд олн җилдән көдләд, месллһнә әңгин нүүрлгч мергҗлт болад, Хальмг Таңһчин ачта эмчин нер зүүсмн. Баяна Николаевна авальнь болхла таңһчин бичкдүдин эмнлһнд сурһмҗлач болҗ олн җилдән үнн-чик седклтәһәр көдлв. Хоңһр Савр көвүднь болн Манҗ ачнь Борис Михайловичин үлгүрәр эмчин эрдм шүүҗ авад эрүл-менд харлһна бүрдәцст көдлҗәнә. Дәкәд хойр бернь бас эмчнр болна, Мукчан ачнь эмчин халхар ик сурһульд сурчана.
ДООҖАН Наталья
Зургт: өнр-өсклң Сангаджиевихнә өрк-бүл

Видео