Үрс Сарин хәәрнд багтый!

Сегодня, 13:06 | Общество, Таңһчин зәңгс, Зіњг

Хөн сарин 16-д хальмг әмтнә төлә ик чинртә болн әрүн цаг – Үрс Сар эклнә. Хавр күчндән орад, нарна толян һазриг герләрн дулатхсн цагла хальмгуд Бурхндан зальврад, үвлин идгәс хаврин идгүр малан авч нүүдг кем эклнә. Кезәнәс авн нүүдл җирһләр бәәсн мана өвкнр йиртмҗин сәәхн эн цагиг темдглҗ йовсмн. Модд ноһан хамтхасдарн эргндк бәәдлиг кеерүлҗ, нарна толяс хальчлдг болсн кемд, ноһан урһмл, малын төл элвҗсн цаг евәлән цуг әмтә тоотд күргҗ ирнә.

Хальмгудын җирһлд батрсн эн Үрс Сар бурхн-шаҗна чинр бас зүүнә. Бурхн Багш нарта орчлңла мендлсн, Гегәрлтин хаалһд орсн, Паранирванад залрҗ һарсн һурвн алдр эн үүлдвр евәлтә иим цагла ирлцҗ оюни хәәртә кем болна.
Хальмгин төв хурлд, Бурхн Багшин Алтн сүмд, Үрс Сард нерәдәд, мөргүлмүд давҗана. Байрин мөргүлмүд хөн сарин 17-ас авн мөчн сарин 15 күртл болхмн. Үрс Сарин евәлтә цагла шаҗна ном даслһнд, буйнч үүлдвр күцәлһнд йир туста цаг болна. Мөргүлмүдт орлцад, зальврад, олнд туста керг күцәҗ үзх кергтә. Әмтнәс сә үзхәр седҗәхлә, эврән чигн әмтнд туста кергүд күцәҗәхмн. Өр-өвч седклтәһәр өөр-шидр бәәдг улстан дөң болҗ бәәлһнә тускар Бурхн Багшин номд келгднә. Эннь мана өдр болһни җирһлд һол заавр болҗана.
Шаҗна туск медрлән гүүдүлх, хурлд ирҗ өвкнрин санлыг тевчх, амулңта җирһлин тускар зальврхд эннь йир туста сар мөн. Эн сард әмтнд сә күргсн буйна күчн кесг холванд өснә. Әрүн эн сард цер бәрҗ, чик седкләр бәәлһн хальмгудын сән авъяст тохрв.
Хаврин хальмг теегт ирҗәдг Үрс Сар урдк кевәрн цуг маднд евәлән күртәҗ, амулң җирһл делдх болтха!
Ом-мани-падме-хум.
УШКАНА Сувсн

Видео