Целинн района делгрлтин тускар күүндв

Сегодня, 12:56 | Общество, Таңһчин зәңгс, Зіњг

Хальмг Таңһчин Толһач Хаска Бату Целинн района муниципальн бүрдәцин толһач Увшан Басңла шидр харһв. Басң Анатольевич Целинн района муниципальн бүрдәцин толһачд одахн батлгдсн билә. Ода болхла район шин толһачин һардврт өсәд-өргҗәд, шин төсвс күцәгдәд йовхнь маһд уга. Харһлтын йовудт Целинн районд кех-күцәгдх көдлмшин тускар эн таңһчин Толһачд тодрхаһар цәәлһҗ келв.
Цергә шишлң керг-үүлдврт орлцачнриг болн теднә өрк-бүлмүдиг дөңнлһнә төрәр күүндвр эклв.
– Цөн өдрт амрлһндан ирсн дәәчнрлә бидн харһад, үүмүлҗәдг төрмүдтнь орлцнавидн. Тер мет одахн «Төрскән харсачнр» саңгин һардач Хаалһин Очрла харһҗ, эн туст хамцу көдлмш күцәхин тускар күүндвидн. Социальн харслтын цергллтин көдләчнриг, селәнә муниципальн бүрдәцсин толһачнриг болн ирлцңгү талдан мергҗлнриг эн көдлмшт орлцулх кергтә. Өдгә цагт цуг бүрдәцст мергҗлтнр керглгдҗәнә, тегәд Әрәсән Президент Владимир Путинә седвәрәр цергә шишлң керг-үүлдврин ветеранмудыг олн халхар сурһад, шин көдлмшт орулхар зүткчәнәвидн, – гиҗ Басң Анатольевич келв.
Целинн района Ик Чонс селәнд өсч-боссн үрн, СВО-н ветеран Тобомбан Евгений «Баатрмуд 08» көтлврт орлцач мөн. Баһчудын политикин халхар көдлмш эн һардҗана. Тер мет цергә шишлң керг-үүлдврин бас нег ветеран Эрднин Евгений «Дәәч» төвд көдлх болв.
Терүнәс нань Увшан Басңгин келсәр, эн җил Целинн районд соньн кесг төсв күцәхәр зуралҗана. Тедн дунд Троицкое селәнд ФОК-ин тосхлт, Вознесеновка селәнә сойлын Герин бат ясвр, Деед Яшкульд бичкдүдин талвңд сән таал тогталһн болн талдан халхар өргн көдлмш күцәгдхмн.
Әрәсән Президент Владимир Путинә темдглсәр, мана орн-нутгин делгрлтд селәнә һазр онц орман эзлнә. Энүнәс иштә района селән болһнд күрәд, бәәрн улсла күүндәд, нәрн төрмүдтнь орлцх кергтә гисн селвгән Бату Сергеевич өгв.
Демографин төр күүндврин йовудт бас босхгдв. Увшан Басңгин келсәр, өдгә цагт баһчуд олн үртә болхар зүткчәнә, эннь йир сән йовдл мөн. Целинн районд болхла нурһлҗдан олн үртә бүлмүд дөрвдгч болн тавдгч үрән өскчәнә.
Зуульчллһ делгрүллһнә халхар бас соньн төсвс күцәгдхмн. Хар Булгт бәәдг һанц уласн модна эргндк бәәдл даңгин ясгдад бәәнә. Тер мет Овата селәнә нег әрүн ормин тускар бас келх кергтә. Бәәрн улсин келсәр, суврһн босхгдсн ормд Цаһан болн Ноһан Дәрк бууҗ ирсинь кесг күн үзсн бәәҗ. Эндр нааран талдан һазрас олн-әмтн ирәд, зальврад мөргнә. Эн ормд сән таал тогтах бас кергтә гиҗ келгдв.
Удл уга хөн сарин 22-23-д Хар Булг селәнә шидр «Теегин одд» нертә наадм давулгдхмн. Бамб цецгин наадмд ирсн сойлын болн номин үүлдәчнр ирлцңгү седвәр татсн билә. Тер дарунь гилтә эн седвәр күцәгдҗәхнь лавта.
Хар Булг болн Вознесеновка селәд Элстәс хол биш бәәдг болв чигн хоорнднь олна көлгн йовхш. Тегәд зуни түрүн сард Вознесеновкас һарад, Элстүр күрәд, цааранднь Хар Булгт күрдг көлгн экләд йовх болҗ һарв.
Хальмг Таңһч селәнә эдл-ахун регион болсн төләдән өдгә цагт Целинн района бордлһна хөрн талвң көдлҗәнә, дәкәд тедү талвң тосхгдҗадг болна. Терүнд 7 миңһн шаху толһа бод мал бордх таал тогтагдх. Тер мет үс эд-бод кедг бүрдәц секх зура бас бәәнә. Эн туст таңһчин Толһач Хаска Бату цуг халхар дөңгән күргхәр медүлв. Терүнәс нань Ик Чонст гипс бәәдг орм илдкгдв. Энүг олзлад, тосхлтын олн зүсн материал кеҗ болхмн.
Урднь Троицкое селәнд амрлһна парк бәәсинь әмтн тодлна. Өдгә цагт тенд ирлцңгү хәләвр уга болад, сән таал тогтах кергтә болҗана. Энүг шинәс ясад, урһа модд суулһад, тенд олн зүсн керг-үүлдвр давулҗ болхмн, гиҗ күүндврт темдглгдв.
«Сайгачонок» бичкдүдин лагерь бас ясгдҗана. Тенд шин хойр бәәрн тосхгдҗана. Эн зунар бичкдүд сәәнәр амрад, цаган сергмҗтәһәр давулҗ чадҗана.
Немхәс, ЖКХ-н халхар учрҗадг нәрн төрмүд бас хаһлгдҗадг болв. Хог-богин болн цеврллһнә бәәр тосхлһна төрмүд онц бүртклһнд бәәнә. Троицкое селәнд цуглрсн хог-бог уга келһнд 300 сай шаху арслң керглгдҗәнә. Шаңһа төвин дөңгәр эн керг күцәгдх гисн иткл бәәнә.
Күүндврин йовудт Троицкое селәнә Ю.Гагаринә нертә уульнцд хаалһин ясвр күцәлһнә төр бас босхгдв. Селәнә тал дундаһур шаңһа хаалһ давҗ һардгиг цуһар меднә. Тегәд энүг невчк сулдхин төлә көлгн Гагаринә нертә уульнцар төгәләд йовҗ чадхмн.
Целинн района делгрлтин халхар кех-күцәх көдлмшин кемҗәнь баһ биш болҗана. Харһлтын чилгчәр Увшан Басң таңһчин Толһачд «Теегин одд» нертә наадмд ирҗ орлцхин туст үрвр кев. Хаска Бату болхла шин һардачд күцәмҗ болн цаһан хаалһ дурдв.
КАРСАНА Евгения

Видео