Орс келн оютнриг хамцулв

Сегодня, 12:46 | Общество, Таңһчин зәңгс, Зіњг

Хальмг ик сурһульд һазадын орна оютнрин төлә орс келнә болн сойлын нарт-делкән наадм болв. «Орс келн кесг төвиг хамцулҗана» гиҗ эн нерәдгдв. Хальмг ик сурһульд орхас урд һазадын орна оютнриг белдлһнә дацңгин 20 җилин өөнд эн орн-нутгин кесг вузиг негдүлҗәдг ик кемҗәтә керг-үүлдвр давулгдв.
Түрүн болҗ хальмг вуз тиим ик кемҗәтә наадм бүрдәҗ давулв. Хальмг келнә болн дорд үзгин күрәлңд Аһшин техникин, Ар үзгин Кавказин шаңһа, Теңгин болн Әәдрхнә техникин, Майкопин технологийин шаңһа ик сурһульмудын делегацс цуглрв, теднә ханьд һазадын орна оютнр болн багшнр орв.
Хальмг ик сурһульд һазадын орна оютнриг яһҗ түрүн болҗ орулҗ авсна тускар дацңгин һардач Любовь Староверкина келҗ өгв.
- Эн наадмин йовудт мана дацңгин 20 җилин өөн өргнәр темдглҗәнәвидн. Тер цагин эргцд Хальмг ик сурһулин һардврла болн багшнрла хамдан ончта кесг керг күцәләвидн. Ода хальмг вузин нилчәр орс келнә төвмүд Китд орн-нутгт, Моңһлд, Палестинад секгдв, теднә вузмудла нөкцлтин бооцан батлгдла, - гиҗ Любовь Алексеевна темдглв.
Мана дацң секснә дару хальмг вузин залһлдаг өргҗүлх арһ өгв. Иигәд, энд Конфуцийин күрәлң секгдв. 2011 җилд хальмг ик сурһулиг Салан Бадм толһалв, терүнә үүлдврин ашт Китдин, Моңһлын, Узбекистана болн нань чигн орн-нутгудын вузмудла нөкцлт өргҗәд бәәв. Эн җил мана дацңд 240 күн сурчана, эднәс кесгнь цааранднь чигн дурта эрдмән шүүҗ авад энд сурхнь лавта.
Арвад җилин туршарт мана дацңд сурчасн оютн болһниг меднәв. Түрүн саамднь бидн баһчудт нөкд болхар седнәвидн, яһад гихлә тернь зөвәр амр биш цаг болна. Оютнрла хамдан Аһш балһснд болдг «Берега» гидг марһанд орлцад кезә чигн нүүрлгч орм эзлҗәләвидн. Аһшин вузмудын багшнр бас эднлә иҗлдҗ Элстин оютнриг даңгин күләнә. Тиигҗ хальмг вузд һазадын оютнрт һол оньган, килмҗән өгч, сән мергҗлтнриг белднә.
Дацңд орс келнә төв бәәнә, эндәс эврә керг-үүлдврин тускар багшнр болн оютнр соңсхвр кеҗ, ниигмин сүлҗәнд үзүлҗ, орс келнә медрлән гүүдүлнә. Тиим ик сурһмҗин көдлмш күцәснә төлә Моңһлын сурһуль-эрдмин ик сурһуль хальмг вузин һардач Салан Бадмд болн дацңгин толһач Любовь Староверкинад ачта профессормудын күндтә цол зүүлһв.
Дарунь талдан вузмудын оютнриг болн багшнриг хальмг вузин һардач йөрәв. Хамгин билгтә багшнр белдврин дацңд көдлнә, эдн кесг орн-нутгудын төлә кадрмуд белднә. Ода 50 орн-нутгас оютнр сурна. Эднәс кесгнь хальмг вузин диплом авсна хөөн эврә һазртан олна күндллһ олҗ көдлнә. Хальмг вузин тускар эдн мартхш, кезә чигн дөңгән күргхәр седнә. Аштнь Хальмг Таңһчин элчнр-мана оютнр делкән цуг тивмүдт бәәнә, Хальмг ик сурһулин кесг халхин үүлдвринь дөңнҗәнә. гиҗ Бадм Катинович темдглв.
Тиим кевәр Хальмг ик сурһульд һазадын орна оютнрин төлә сән таал тогтагдсн бәәнә гиҗ келҗ болҗана. Яһад гихлә ода талдан вузмудас оютнр болн аспирантнр хальмг ик сурһульд орхар седҗәнә гиҗ һардач ашлв.
Таңһчин Толһачин селвгч Салыка Владимир, сойлын болн зуульчллһна министр Бембин Евгений, сурһуль-эрдмин болн номин министрин дарук Натра Антон нарт-делкән наадмд орлцҗ кесг тивәс ирсн оютнриг йөрәҗ, орс кел улм гүүнәр дасад наадмин марһаст күцәмҗ бәрхиг дурдв.
ЮФО-н болн талдан дуһргудын вузмудас ирсн оютнр Хальмг ик сурһулин өмнк белдврин дацңгин үүлдврлә таньлдв. Эднә төлә доцент Елена Голубева орс келнә кичәл давулв, талдан багд доцент Болдра Ольга Әрәсән сурһуль-эрдмин халхин тускар тодрхаһар цәәлһв.
Цааранднь эдн Элст балһсар экскурсьт одв, орс келнә олимпиадт орлцв. Элстүр ирсн оютнрас нань талдан 42 орн-нутгин оютнр холас олимпиадт орлцв, тиим кевәр дөрлдән ик чинвртә болв гиҗ келх кергтә. Тер мет һазадын орна оютнр ду-бииһин кесг марһаст эврә билг-эрдмән үзүлв. Цуг тер марһасин дииләчнрин нерд наадмин чилгчәр олнд соңсхгдв. Элстд болсн наадм оютнрт уданд тодлгдхнь лавта. Хальмгин хотл балһснд эдн кесг шин үүрмүдән олҗ авв, иньгллтән болн нөкцлтән батрулв. Хальмг ик сурһулин багшнр болн оютнр һазадын орна баһчудыг хамцуллһна кергән цааранднь улм өргҗүлв гиҗ лавтаһар келҗ болхмн. Наадмин йовудт хоршасн дамшлт теднд туслхнь лавта.
ТҮРВӘН Һуна

Видео