Таңһчин медәтнрин ач-тусинь үнлв

Сегодня, 13:17 | Общество, Таңһчин зәңгс, Зіњг

Шидр Элстд Хальмг Таңһчин ачта улсин Хүүвин президиумин сүүр болв. Хүүвин ахлач Пашнана Эрднь сүүриг һардҗ давулв. Олна бүрдәцин гешүд кесн көдлмшин аш дигләд, иргч зураһан батлв.
Таңһчин Улсин Хуралд (Парламентд) Хальмг Таңһчин Толһачин элч Манҗин Араш медәтнрин Хүүвин үүлдвриг өөдәнәр үнләд, таңһчин олна бәәдл-җирһлд шунмһаһар орлцҗ, дорас өсч йовдг баһчудыг сурһмҗллһна көдлмшинь темдглв. Тана кеҗ-күцәсиг олн-әмтн үзҗәнә, тегәд кергтн уралан йовтха, гиҗ Араш Алексеевич дурдад, Хүүвин шин гешүдт иткл цаасинь бәрүлҗ өгв.
Әрәсән Орн-нутгин Хүүвин депутат Михаил Богатов сүүрт орлцад, ачта улсин Хүүвин гешүд эн намрар болсн суңһврт шунмһаһар орлцсинь темдгләд, ханлтан өргв. Тер мет медәтнрин Хүүвин седвәрәр мана таңһчд бүрдәгдсн «Делгрлтин күчн» гидг олна бүрдәциг һардҗадг Михаил Богатов дөң-тус күргҗәдг медәтнрин тускар бас ханмҗтаһар келв. Арһлачнрин керг-төрин комитетин гешүн болсн төләдән ода депутат бизнес делгрүллһнә көдлмшт орлцҗ, таңһчд өрк-бүлин, селәнә эдл-ууш эд-бод кедг бүрдәцс секлһнә төрмүд хаһлх күсл тәвҗәнә. Таңһчин олна бәәдл-җирһлд орлцҗадг төләднь зәрм гешүдт Әрәсән Орн-нутгин Хүүвин депутатын Ханлтын бичгүд бәрүлҗ өггдв.
Әрәсән улсин ниицлтин җилд Әрәсән Орн-нутгин Хүүвин депутатнрин суңһвр болв, тегәд ачта улсин Хүүвин гешүд таңһчин йосна болн олна бүрдәцслә хамдан олн керг-үүлдврт орлцсиг Пашнана Эрднь темдглв. Эн җил район болһнд медәтнрин Хүүв бүрдәгдснь темдгтә йовдл болсиг Эрдне Лиджиевич онц зааһад, төрскн һазрин делгрлтд орлцсн улсин ач-тус үнлҗ, баһчудт төрскнч сурһмҗ өглһнә көдлмшиг шунмһадулх кергтә гиҗ келв. Райодын толһачнрла болн тенд үүлддг олна бүрдәцслә нөкцҗ хамцу үүлдх кергтә, төрскн кел делгрүллһнә, «Җаңһр» дуулврин зөөр хадһллһна, ачта улсин нерд олн медүллһнә туст дигтә-дарата көдлмш күцәх неквр тәвгдв. Эн җил нертә номт болн олна үүлдәч Очра Номтын 140 җилин өөнд нерәдгдсн керг-үүлдврмүд давулгдсна тускар Эрдне Лиджиевич келәд, Көтчнрә района медәтнрин хүүвин седвәрәр урһа моддын шишлң бәәрн секгдсиг темдглв. Таңһчин ачта улсин Хүүв болхла Очра Номтын медалин туск седвәр татв, эн төр удл уга таңһчин Улсин Хуралын сессьт хәләгдхмн. Ирх җилд кех-күцәх көдлмшин тускар келәд, Яшкулин районд Хулхт селәнә өөр бәәдг болн Широковск ГЭС-ин тосхлтд орлцсн хальмг салдсмудт нерәдсн санлын бумбс яслһна, хальмг улс тууврас хәрҗ ирснә 70 җилин өөнин керг-үүлдврмүд зуралгдҗахин тускар хувалцв.
- Эн җил «Хальмгин бахмҗ болн туурмҗ» гидг дегтрин һурвдгч һарц һарв. Һурвн җил хооран таңһчин Өдрин байр угтҗ бидн райодт болн Элст балһснд бәәдг ачта, күндтә, тоомсрта, өрк-бүләрн нег эрдмәр олн җилдән көдлҗәдг улсин туск дегтр барлхин седвәр татсн биләвидн. Таңһчин Толһачин шиидврәр җил болһн иим дегтр һардг болхмн. Мана таңһчд олн җилдән үнн-чик седклтәһәр көдләд, төрскн һазриннь делгрлтд ик ач-тусан күргсн улс баһ биш. Дорас өсч йовдг баһчудт теднә тускар медүләд, ач-тусинь темдгләд, таңһчин болн орн-нутгин ачлврар темдгллһнә седвәр татх кергтә. Бидн күцәгч болн бәәрн залврин бүрдәцслә хамдан үүлдҗ, көдлмшән даавртаһар болн седвәртәһәр күцәх зөвтәвидн, - гиҗ Эрдне Лиджиевич хургт орлцачнрт дуудвр кев.
ДООҖАН Наталья

Видео