Элвг урһц хураҗ авхар

Сегодня, 13:13 | Общество, Таңһчин зәңгс, Зіњг, Селәнә эдл-аху

Одахн Хальмг ик сурһулин «Баһ Чонс» дамшлтын эдл-ахуд намрин тәрә тәрлһнә көдлмш төгсв. Эн эдл-ахуд Хальмгин селәнә эдл-ахун номин –шинҗллтин күрәлңгин (Хальмг ик сурһулин әңг) номтнр үүлдҗәнә.
Тер тоод күрәлңгин мергҗлтнр 85 гектар аһу һазрт тәрә тәрҗәнә, малд шилгтә өвс урһалһна халхар номин-дамшлтын ик шинҗллт кегдҗәнә.
Тиим кевәр күрәлңгин болн Хальмг ик сурһулин номтнрин номин -дамшлтын мергҗлтнрин нөкцлт сән ашта болв. Терүнд Хальмг ик сурһульд бүрдәгдсн агробиотехнологийин күрәлң болн агрономийин тиңкмин багшнр болн оютнр, баһ наста номтнр орлцад, урһмл урһалһна шин эв-арһиг олзлв.
«Тиигҗ селәнә эдл-ахун халхар көдлҗәдг мергҗлтнр болн оютнр дамшлтын эдл-ахуд ирҗ, шин эв-арһ олзлад тәрә тәрдг болна. Хальмг НИИСХ-н номтнр эн кергт бас дөңгән күргҗәнә. Көдәрҗәдг һазрт тәрә тәрлһн нәрн керг болна, болв тиим таалд чигн сән урһц хураҗ авч болхин тускар номтнр селвгән өгнә», - гиҗ аграрн дацңгин профессор, агробиотехнологийин күрәлңгин һардачин дарук Натра Аркадий келнә.
Эн нөкцлтин ашт селәнә эдл-ахун мергҗлтнр дамшлт хоршаҗ авна. Тиим кевәр Хальмг Таңһчин мал өсклһнә керг делгрүллһнә болн малын хотын көрң икдүллһнә тускар ухалҗ, шин эв-арһ улм өргнәр олзлгдҗана.
Терүнәс нань номтнр Хальмг Таңһчин «Россельхозцентр» бүрдәцин бүртклһнә болн урһмлын эк шинҗллһнә лабораторьт медрлән гүүдүлв. Тиим лабораторьт бүрткгдсн урһмлын экн сән чинртә болхла, элвг урһц чигн хураҗ авч болхнь лавта, гиҗ оютнрт «Россельхозцентр» бүрдәцин мергҗлтнр болн Хальмг ик сурһулин багшнр цәәлһвр өгнә.
Тиигҗ таңһчин бүрдәцс болн Хальмг ик сурһулин, КНИИСХ-н номтнр хамдан нөкцлтҗ, оютнрин медрл гүүдүлҗ, эврә шинҗллтин көдлмшән чигн дигтә-даратаһар күцәнә. Тиим хамцу көдлмш цааранднь чигн улм өргнәр күцәгдхнь лавта.

ТҮРВӘН Һуна

Видео