Зуульчллһ делгрүлх төсвс белдҗәнә

Сегодня, 10:20 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Шидр Элст балһснд таңһчд зуульчллһ делгрүллһнә төрәр хург болв. Таңһчин күцәгч йосна, райодын муниципальн бүрдәцсин элчнр болн арһлачнр хамдан цуглрад, 2036 җил күртл зуульчллһ делгрүллһнә төрәр күүндв. Эдн хальмг улсин сойлын, авъясин, нүүдл авг-бәрцин, бурхн-шаҗна, теегин өврмҗтә йиртмҗин халхар зуульчнриг соньмсулх төсвс белдв.
«Strategy Partners» бүрдәцин элчнр эднд нөкд болҗ, үүлдвринь зүүцүлв. Келхд, шаңһа бүрдәцст олз- оруһан икдүлхин төлә шинҗләчнр район болһнд одад, таңһчин гиичнрлә болн бәәрн улсла харһад, теднә ухан-тоолвр тоод авсн билә. Эн төр шинҗлснә хөөн эдн цугинь ашлад, сүл цагт мана таңһчд зуульчллһн өргнәр делгрҗәхиг медв, зуг нааран ирсн гиичнр нурһлҗ нег өдрәр энд бәәхнь илдкгдв. Зуульчнрин төлә сән таал тогталһна болн гиичнриг соньмсулх зәңг тархалһна төрмүдиг эрк биш хаһлх кергтә гиҗ эдн товчлв. Нег үлү таңһчар давҗадг хаалһсин хаҗуд зуульчлҗ йовдг улсин төлә амрлһна олн зүсн ормс бүрдәх кергтә гиҗ эдн селвглв.
Хальмг Таңһчин Толһач Хаска Бату хургт орлцачнрла харһад, эднә белдсн төсвсин тускар медҗ авв. «Тадн ик чинртә керг күцәҗәнәт. Хамцу көдлмш төрскн таңһчин делгрлтд эрк биш туслх. Мана таңһч өвәрц, ке-сәәхн, энд төрскнч, арһта, гиичнрән сәәнәр тосдг улс бәәнә. Хальмг Таңһчин тускар мана гиичнрт медүлҗ соньмсулхин төлә көдлмшән чикәр бүрдәҗ, иим төсвс белдх кергтә. Мана таңһч зуульчнрт юуһарн соньн болдгиг олнд зәңглхмн. Мана хамцу үүлдвр Хальмгин сән-сәәхн иргчднь туслхнь лавта», - гиҗ таңһчин Толһач темдглв.
Дарунь хургт орлцачнр белдсн төсвсин тускар келҗ өгв. Тиигәд, хальмг улсин нүүдл авг-бәрцлә, бурхн-шаҗна сойлла таньлдад, әрүн чинртә ормсар зуульчлад, селәнә эдл-ахун көдләчнрин бәәдл-җирһләр соньмсад, зуни кемд эң-зах уга хальмг теегт сөөһәр һарад, теңгрт одд һәәхч амрснь соньн болхнь маһд уга. Хальмг Таңһч чидл урһадг һазр гиһәд эдн Үстин районд Иҗлин, Лаганя районд Көк теңгсин көвәд амрлһна, Көтчнрә, Баһ Дөрвдә болн Целинн райодын хурлмудт одад, Хар Һазра районд бәәдг заповедникд гөрәсдиг үзәд, төвд эмнлһнә халхар белдсн төсвс зуульчнриг эрк биш соньмсулх гиҗ эдн тоолҗана. Ниигмин сүлҗәнд селәнә эдл-ахун төрәр олн зүсн зәңг тархадг улсиг дөңнлһнә, хальмг кино делгрүллһнә төрмүд эднә төсвст бас босхгдв. Зуульчнр мана тал дару-дарунь ирҗ энд сергмҗтәһәр амрхин төлә шин гиичлүр тосхлһна, хаалһин хаҗуд амрлһна сән таал тогталһна, урчнриг дөңнҗ ке-сәәхн кегдлмүд кеҗ һарһлһна төрмүд хаһлх кергтә гиҗ эдн ухан-тоолврарн хувалцв.
Хальмг Таңһчин Толһач Хаска Бату эднә төсвст оньган өгч, цуһар ик көдлмш күцәсиг темдглв. «Тана белдсн төсвс йир соньн, мана таңһчин тууҗин, сойлын, авъясин тускар медүлҗ, зуульчнриг эрк биш соньмсулх гиҗ санҗанав. Ода болхла тадна белдсн төсвиг күцәхин төлә терүг дөңнх арһлачнриг болн ик бүрдәцсиг олҗ авх кергтә. Мана район болһн соньн, өвәрц, тегәд зуульчллһ делгрүллһнә төсвс мана таңһчин нер өөдән өргхнь лавта болхмн», - гиҗ Бату Сергеевич харһлтыг ашлв.

ДООҖАН Наталья

Видео