Элстд юстицин шишлң бәәрн тосхгдхмн

Сегодня, 14:02 | Общество, Таңһчин зәңгс, Зіњг

Урҗ өдр Әрәсән юстицин министр Константин Чуйченко мана таңһчд керг-төрин халхар ирв. Хальмг Таңһчин Толһач Хаска Бату күндтә гиичлә хамдан засгла харһсн улсин төвд, Әрәсән УФСИН-ә 1-ч СИЗО-д, таңһчин Әрәсән юстицин министерствин заллтд одад, эднә үүлдврлә таньлдв. Сән авъяст тохрсар, Бурхн Багшин Алтн сүм болн Элстин чонҗ үзүлҗ, хальмг улсин сойлын, тууҗин, энд олн келн-улс ниитәһәр, кен-негнәннь авъяс күндлҗ бәәдгин тускар гиичд келҗ өгв. Тиигәд, нидн мана таңһчд шаҗна нарт-делкән ик хург болсна, эн җил болхла Христос Бурхн бууҗ ирснә әрүн йовдлын 80 җилин өөнин керг-үүлдврмүд өргмҗтәһәр давулгдсна тускар келснь гиичд өврмҗтә болв.
Тер өдрин бийднь асхар таңһчин Толһач Хаска Бату Әрәсән юстицин министр Константин Чуйченко көдлмшч харһлт давулҗ, «Юстицин квартал» гидг төсв күцәлһнә тускар күүндв. Бату Сергеевич таңһчин социальн-экономическ делгрлтин тускар ахрар цәәлһәд, экономик делгрүллһнә керг-үүлдврмүдин тускар келв. Тер мет таңһчд шаңһа туслмҗ болн юридическ дөң өңгәр күрглһнә халхд шин эв-арһс өргнәр олзлҗ, дарунь бәрмт болн иткл цаасд авлһна туст орулгдсн шинрлтсин тускар Хаска Бату гиичд медүлв. Таңһчд юридическ шаңһа бүрдәц үүлднә, терүнә мергҗлтнр хотл балһсна болн райодын әмтнд олн төрәр цәәлһвр өгч, зарһд эднә зөв харсад, ямр нег иткл цаас белдхд нөкд болна. Тиигәд, эн җилин түрүн өрәлд 1156 иргнд зөв-йосна халхар олн зүсн төрәр өңгәр дөң күрггдв. Цергә шишлң керг-үүлдврт орлцачнрт болн эднә өрк-бүлмүдин гешүдт дөң-нөкд күрглһнд онц оньг тусхагдна. Тер мет Луганск Улсин Республикин Антрацитовск района улст мана мергҗлтнр бас дөңгән күргҗ, күн болһна эрлһиг күцәхәр шунна, гиҗ таңһчин Толһач келв.
- Әрәсән юстицин министерств орн-нутгин регионмудт «Юстицин квартал» гидг төсв күцәдгин тускар бидн меднәвидн. Мана таңһчд тиим төсвиг хальмг улсин кев-янз олзлҗ өвәрц кевәр кеҗ болхмн. Тиим төсв манад чигн бәәдл-җирһлд тохрагдхд ицҗәнәвидн, - гиҗ Хаска Бату темдглв.
Мана таңһчд үүлддг зарһин приставмудын болн засгла харһсн улсин орн-нутгин цергллтсин заллтсин үүлдвриг Константин Чуйченко өөдәнәр үнлв. 2022 җиләс авн мана таңһчд үүлддг засгла харһсн улсин төвд бәәсн 400 һар күн буру йовдл һарһсн уга. Засгла харһад, бәрәнд авгдсна хөөн эдн хөөннь көдлмш олҗ, чик хаалһд орв. Таңһчд үүлддг зарһин приставмудын цергллт күцәмҗтәһәр үүлдҗ, үрдән эс асрҗадг эк-эцкнрәс теткврин мөңг некч авлһна туст аһу ик көдлмш күцәснь бас темдгтә. Дәкәд таңһчин закадыг орн-нутгин закадла ирлцүллһнә көдлмш сән кевәр күцәгдҗәхиг Әрәсән юстицин министр бас темдглсн болдг.
- Бидн Хальмг Таңһчд зарһин шинҗллтин лабораторь секхәр зуралҗанавидн. Ода энд Аһшин лабораторин бичкн әңг үүлднә. Иргчдән энд онц лабораторь көдлхмн, тенд баһ гиснь 20-25 мергҗлт көдлхмн. Шинҗллтин көдлмш күцәхин төлә сән таал тогтах кергтә. Дәкәд таңһчд үүлддг мана заллт олн давхр герин негдгч давхрт бәәр нәәмәдлҗәнә, тегәд деер келгдсн төсв күцәлһнә төр хаһлхвидн. Тер цагт тенд министерствин заллт, әмтнә зөв харслһна туст туслмҗ күрглһнә оютнрин юридическ бүрдәц бәәршлхмн. Өдгә цага некврлә ирлцҗәдг төсв күцәхин туст хамцу шиидвр батлх кергтә. Бидн Хальмг Таңһчла нөкцҗ хамцу кевәр көдлхдән белн бәәнәвидн, - гиҗ Константин Анатольевич иткүлв.
ДООҖАН Наталья

Видео