Дулаһар тетклһнә кемд белдв

08-10-2026, 13:01 | Общество, Таңһчин зәңгс, Зіњг

Эн намрин сармуд дулан өдрмүдәр мадниг байрлулв. Зуг зәрмдән киитрәд чигн бәәв. Нарта өдрәр Элстин төв уульнцсар болн паркст әмтн сандл деер сууһад амрчахиг үзҗ болв. Ода өрүн болһн зөвәр серүн болна гиҗ келх кергтә, зәрмдән салькн чигн көдлнә. Сөөһәр болхла, гермүдт киитн болад, цуһар дулаһар тетклһнә кемиг күләҗәнә. Намр гүргүдән орчкв, намрин өдрмүд дулан киитн чигн болад нег-негән соляд бәәнә.
Әрәсән регионмудт дулаһар тетклһнә кем һаха сарин 1-әс хулһн сарин 15 күртл эн цагин болзгт эклнә. Эн кем кезә эклхинь балһсн болһна муниципальн һардвр эврән шиидвр авна. Теңгрин аһарин кемҗән учртан авгдҗ дула өглһнә өдр батлгдна. Тавн өдрин туршарт аһарин кемҗән 8 градусас дор унхла, муниципальн һардвр олн давхрта гермүдиг дулаһар экләд теткхәр шииднә. Нурһлҗдан хулһн сарин 15-д таңһчин коммунальн цергллтс өдр-сө уга диг-дараһар көдлдгиг эклнә. Эн җил болхла теңгрин бәәдл учртан авгдад, дааврта кем цаг-болзгтнь эклхмн.
Дулаһар тетклһнә кем төгссн дару ирх үвлд белдвр эклҗ, турвасин болн кергслин ясвр күцәгднә. Котельнсин көдләчнр хуучрсн кергслиг шинрүлҗ, ямр нег дуту-дунд илдкҗ терүг ясна, көдлмшч ормдан сән таал тогтана.
Шидр таңһчин гер-бүүрин эдл-ахун болн энергетикин министерствин мергҗлтнрин кесн то-дигәр, таңһчин райодын болн Элст балһсна коммунальн цергллтс дааврта кемд йирн тавн процентд белн бәәнә гиҗ заагдв. Элстд бәәдг 27 котельнсин кесгтнь ясвр күцәгдв. Эвдрсн кергсл, дула өглһнә сурвлҗн болн нань чигн тоот ясгдв. Темдглхәс, хамгин түрүнд социальн бүрдәцст дулан өггднә.
Терүнәс нань зәрм әңгүдт усна, канализацин, электрокүчнә сурвлҗн бас ясгдсн билә. Җил болһн котельнс дулаһар тетклһнә кемд ямр кевәр белдвр күцәсиг Элстин һардврин, таңһчин гер-бүүрин эдл-ахун болн энергетикин министерствин болн «Ростехнадзорин» мергҗлтнрин орлцлһтаһар бүрдәгдсн шишлң комиссь хәләҗ бүрткнә. Эн җил цуг котельнс цаг-болзгтан ясгдад, үвлин кемд белдв, гиҗ комиссь шиидвр һарһсмн. Элст балһсна бүрдәцс болн олн патьрта гермүдт бәәдг улс цугтан дулаһар тетклһнә кемиг күләҗәнә.
Мана таңһчд намрин-үвлин цаг ик киитн угаһар давна. Үвлин теңгрт иткдг уга гиҗ келдг, тегәд эртәснь сән белдвр кеснә ашт мана гермүдт дулан болх гисн ицл бәәнә. Удл уга котельнст көдлдг мергҗлтнр өдр-сө уга күцәх көдлмштән орхмн.
КАРСАНА Евгения

Видео