Олн үртә бүлин байр-бахмҗ

Сегодня, 13:56 | Общество, Таңһчин зәңгс, Зіњг

Нидн Хальмгин күүкд улсин ниицәнә седвәрәр таңһчин Толһачин зәрлгәс иштә мана таңһчд олн үртә өрк-бүлин сән Өдр батлгдсн болдг. Һаха сарин һурвдгч нарн өдрлә эн байриг темдглх болҗ шиидгдсмн. Олн үрән өскчәдг эк-эцкнриг дөңнәд, өрк-бүлин чинриг улм өөдлүлхин төлә эн өдр батлгдснь лавта.

Өдгә цагт мана орн-нутгин һардвр олн үртә өрк-бүлмүдт онц оньган тусхаҗ, шаңһа дем өгәд, цуг халхар нөкд болхар зүткнә. Мана таңһчд болхла тиим өрк-бүлмүдин то өсәд йовхнь байрта йовдл гиҗ келх кергтә.
Городовиковск балһснд бәәдг Лиджиевихнә (зургт) өрк-бүлиг нег һазра улс сәәнәр меднә. Иван Петрович Надежда Борисовна хойр дөрвн үрән өскәд, бәәрн района болн балһсна олна бәәдл-җирһлд шунмһаһар орлцна. Эднә бүлд хойр күүкн болн хойр көвүн өсчәнә.
Иван болн Надежда хоюрн Лаганя районд өсч-босв. Ик сурһульд орад, шүүҗ авсн эрдмәрн сурв. 2003 җилд эдн ханьцад, өрк-бүлән өндәлһв. Надежда Борисовна цаг-зуур Җалһа селәнә сурһульд хальмг келнә болн утх-зокъялын багшар көдлв. Хөөннь герин эзн Иван Петрович Городовиковск балһснд полицин әңгд көдлмшт орад, Лиджиевихн тиигәрән нүүҗ һарв.
Лиджиевихнә Гилән ууһн күүкнь юрист болҗ Ростов-на-Дону балһснд көдлҗәнә, хойрдг үрнь Даяна Хальмг ик сурһулин оютн болна. Арвн зурһата Нигмяр йисн классан төгсәһәд, Башантан селәнә эдл-ахун колледжд сурчана. Отхн Заян болхла ода хө мөстә.
Гилән Даяна хойр бичкнәсн авн Городовиковск районд нер һарсн «Иньглян» ансамблин ханьд бииләд, таңһчин болн Цугәрәсән марһаст орлцҗ йовла. Гилән дунд сурһульд «Бичкн Төрскм» нертә марһанд ончрад, кесг дәкҗ дииләчин нер зүүсн болдг. Даяна болхла ах классмудтан Дельфийск нааднд орлцсмн, тер мет Хальмг Таңһчин Толһачин мөрәһәр эн ачлгдла.
Надежда Борисовна Городовиковск балһсна 3-ч тойгта дунд сурһульд багшлна. Дорас өсч йовдг үйнрт төрскн кел дасхсн деерән эн «Җаңһрин ачнр» нертә немр кичәлмүд өгнә. 2014 җилд болхла Лиҗин Надежда «Келни билг» мөрәһәр ачлгдв. 2021 җилд Лиджиевихн Хамгин сән гисн өрк-бүл болад бас диилвр бәрв.
Герин эзн Лиҗин Иван полицд хөрн һар җилдән көдләд, хойр җил хооран ачта амрлһндан һарв. 2022 җилин хулһн сарин 4-д Луганск Улсин Республик Әрәсән ханьд орв. 2023 җилин эклцәр Иван Петрович орн-нутгин шин иргнмүдт бәрмт цаасинь бәрүлҗ өгхәр тиигәрән йовсмн. Тенд һурвн сардан Славяносербск селәнд көдлсн болдг.
2025 җиләс авн орн-нутгин Президент Владимир Путин цергә шишлң керг-үүлдврт орлцачнрин төлә «Агромотиватор» нертә көтлвр батлв. Тегәд Төрскән харсачнр цергә даалһвран күцәснә хөөн, селәнә эдл-ахун халхар көдлҗ чадхмн. Мал асрхла, амн тоста гиҗ келдг. Эн көтлврин тускар соңсад Лиҗин Иван бод мал өскхәр шиидв.
Малчнрин төлә үвлзлһн хамгин дааврта кем болна. Өдгә цагт Иван малдан өвс болн шүрүн хот белдҗәнә, энүнд эцкнь нөкд болҗана.
Надежда Борисовнан келсәр, олн үртә бүлд өссн көвүд-күүкд нег-негндән дөңгән күргәд, ниитә болна. Онц темдглхд, эк-эцкнь дөрвн үртәһән бичкнәснь авн хальмгар күүнднә.
Олнд үлгүр-үзмҗ болҗадг Лиджиевихн эңкр дөрвн үрән өскәд, сән сурһмҗ өгч, чик хаалһднь орулх күслтә бәәнә.
КАРСАНА Евгения

Видео