Хальмг депутатнрин седвәриг дөңнв

Сегодня, 15:37 | Общество, Таңһчин зәңгс, Зіњг

Хальмг Таңһчин Улсин Хуралын (Парламентин) Ахлач Артем Михайлов эн өдрмүдт Санкт-Петербург балһснд Әрәсән Федерацин Хүүвин медлд үүлддг зака үүдәһәчнрин Хүүвин керг-үүлдврмүдт орлцв. Әрәсән Орн-нутгин Хүүвин 120 җилин өөнд нерәдгдҗәдг керг-үүлдврмүдин йовудт Әрәсән зака үүдәһәчнрин Хүүвин Президиумин сүүр болн комиссьмүдин селвлцән болв.
Әрәсән субъектст өгъәлҗ авсн мөңгнә өр даңцалһна дамшлтыг ясруллһна, орн-нутгин мелиорацин халхиг делгрүллһнә төрмүд терүнд хәләгдв. Әрәсән финансин министерств регионмудыг дөңнхин төлә өринь даңцалһна керг-үүлдвриг күцәхдән белн бәәнә. Тиигәд, сән кец-таал тогталһна, әмтнә җирһл ясруллһна көдлмшт мөңг олзлсн болхла, регионд өринь даңцахин туст немр эв-арһс олзлгдхмн гиҗ зуралгдҗана. Коммерцин халхар мөңг өгъәлҗ авхин ормд, ЖКХ-н, хаалһс тосхлһна, зуульчллһ делгрүллһнә төрмүдт эрк биш олзлхин төлә орн-нутгин хазнас мөңг йилһҗ өгхлә, регионмудт ик дөң болхмн гиҗ сүүрт келгдв. Мелиорацин халхиг делгрүллһнә төлә услврин кергслиг шинрүллһнә, усна эдл-ахун бүрдәцсин ясврин болн кадрмуд белдлһнә төрмүдиг хамгин түрүнд хаһлх кергтә гиҗ сүүрт орлцачнр темдглв. Селәнә эдл-ахун, һазриг көдәрлһнәс харслһна төлә модд суулһх һазр йилһҗ өглһнә диг-дараг шинрүлх кергтә гиҗ бас келгдв.
Регионмудын зака үүдәгч Хургудын элчнр Әрәсән зака үүдәһәчнрин Хүүвин комиссин сүүрт орлцснь темдгтә болв. Артем Михайлов нилхд төрлһиг урмдуллһна төрәр болсн сүүрт орлцв. Харһлтд орлцачнр нилхд төрлһиг урмдуллһна туст орн-нутгт болн регионмудт батлгдсн керг-үүлдврмүдин, өрк-бүлмүдиг дөңнлһнә сән дамшлтсин тускар күүндв. Артем Михайлов мана таңһчд өрк-бүлмүдиг дөңнлһнә керг-үүлдврмүдин тускар цәәлһәд, бичкдүдиг асрҗадг өрк-бүлмүдин төлә гер-бүүр тосхлһнд субъектст шаңһас дөң күрглһнә орн-нутгин көтлвр батллһна туст седвәр орулв. Хальмг депутатнрин седвәриг сүүрт орлцачнр дөңнсинь темдглхмн. Гемтә-шалтгта бичкдүдиг асрҗадг өрк-бүлмүдиг дөңнлһнә немр керг-үүлдврмүдин, экин сертификатын көтлвриг шинрүллһнә, оютнрин болн олн үртә өрк-бүлмүдиг дөңнлһнә, бичкдүдин дөңцл мөңг авхин төлә өрк-бүлин олз-оруһин кемҗә сольлһна болн нань чигн төрмүд комиссин шиидврин төсвд орулгдв. Хөөннь эннь орн-нутгин йосна бүрдәцст йовулгдхмн.
Мөрн сарин 27-д Артем Михайлов келн-улсин хоорндк хәрлцәнә төрәр болсн селвлцәнд орлцв. Әрәсән Федерацин Хүүвин Ахлач Валентина Матвиенкон һардврт болсн селвлцәнд Әрәсән Орн-нутгин Хүүвин, орн-нутгин залврин болн регионмудын зака үүдәгч Хургудын һардачнр орлцв. Әрәсән Президентин шиидврәр зарлгдсн улсин ниицлтин җилд мана орн-нутгт келн-улсин шаңһа политикин зура эн җилин эклцәс авн күцәгдҗәнә. «Келн-улсин шаңһа политикиг күцәлһн» гидг орн-нутгин көтлврин йовудт керг-үүлдврмүд күцәлһнд йилһгдҗәдг мөңгнә кемҗән хойр холванд икдәд, 4,9 җува арслң тогтав гиҗ Валентина Матвиенко зәңглв.
Тер өдрин бийднь Әрәсән Президент Владимир Путин зака үүдәгч бүрдәцсин элчнрлә харһад, орн-нутгин парламентаризмин 120 җилин өөнлә йөрәв. Орн-нутгин толһач эндрк амр биш таалд цуһар ниитәһәр көдлҗ, Төрскнәннь делгрлтд ач-тусан күргҗәдг төләднь регионмудын зака үүдәгч Хургудын элчнрт ханлтан өргв. Цергә шишлң керг-үүлдврт орлцачнриг дөңнлһнә, әмтнә социальн харслтын болн алвна халхин закад батлсиг Владимир Путин онц темдглв. Орн-нутгин регионмудыг дөңнлһнә керг онц чинртә төр болҗахиг зааһад, эн җил мөңг өгъәлҗ авсн өриг хөөннь даңцахин туст «Негдсн Әрәсә» парть орулсн седвәриг дөңнв. Эн җил намрар болх Орн-нутгин Хүүвин депутатнрин суңһвр заканла ирлцәтәһәр дигтә-даратаһар бүрдәгдх зөвтә гиҗ Әрәсән Президент цугтаднь тодлулв.
БАТАН Сәәхлә

Видео