Зөрмг йовдлынь тодлв

Сегодня, 15:21 | Общество, Таңһчин зәңгс, Зіњг

Эн җил Чернобылин АЭС-т зеткртә йовдл учрсн цагас авн дигтә 40 җил болв. Җил болһн мөрн сарин 26-д санлын Өдрт нерәдҗ мана орн-нутгин балһсдар тер болн селәдәр тер аюлын аш уга келһнд орлцсн улсин санл тевчҗ митингүд, харһлтс болна. Залу-зөрмгән үзүләд, аюлын аш уга келһнд орлцсн улсин ач-тус темдглҗ, ачлвр бәрүлҗ өгнә.
«Медрл» Әрәсән ниицәнә седвәрәр орн-нутгин регионмудт, тер тоод Хальмг Таңһчд, оютнрин болн сурһульчнрин төлә «Чернобыль. Время осмысления» гидг төрәр лекцс болв. Элстд бичкдүдин үүдәлтин Бәәшңд болсн харһлтд Элст балһсна һардврин толһачин дарук Довгопола Дмитрий таңһчин министерствсин баахн мергҗлтнрлә болн баһчудын ниицәсин гешүдлә харһв. Чернобыльд учрсн аюлын, иим бүрдәцст әәмшг уга бәәдл тетклһнә болн тер зеткртә йовдлын аш уга келһнд орлцсн улсин зөрмгин тускар күүндвр болв. Элст балһсна һардврин сойлын заллтын һардач Эрднин Данзн «Чернобылин АЭС-т учрсн аюлын аш уга келһнд орлцачнрт» гидг бумб босхлһна тууҗиг келҗ өгв. 1987 җилд тер аюлын аш уга келһнд орлцад, Зөрмгин орденәр ачлгдсн Һучна Борис тер һашута цагиг тодлад, үүрмүдтән нерәдҗ барлсн «Җирһлин төлә әмән әрвлсн уга» гидг дегтр үзүлҗ, удл уга ядерн шишлң бәәрнд, атомн кермст болн әәмшгтә әңгүдт церглҗ йовсн нег һазра улсин туск хойрдгч дегтр барас һархин тускар зәңглв.
Элстд әмтнә социальн теткврин Төвд «чернобыльцнрин» белвсн күүкд улст «Чернобылин АЭС-т болсн аюлын 40 җил» гидг өөнин медаль бәрүлҗ өгв. Тер мет таңһчин олна бәәдл-җирһлд, тууҗиг үнн кевәр хадһллһнд болн баһчудт төрскнч сурһмҗ өглһнд орлцдг төләдән кесгнь Әрәсән күүкд улсин ниицәнә Күндллһнә һашгар ачлгдв.

ДООҖАН Наталья

Видео