Әәдрхнә эмчнр дөңгән күргв

25-04-2026, 11:57 | Общество, Таңһчин зәңгс, Зіњг, Эрўл-менд харлһн

Шидр Әрәсән ФМБА-н оториноларингологийин номин шинҗллтин төвин Әәдрхнд үүлддг әңгин мергҗлтнр мана таңһчд ирв. Эдн таңһчин әмтнә эрүл-мендин бәәдл шинҗлсн деерән хальмг эмчнрлә «төгрг ширән» сүүр давулҗ, эмнлһнә төрмүдәр күүндв. Харһлтын йовудт таңһчин эмчнр Әәдрхнә төвин улд мергҗлтән өөдлүллһнә төр бас босхв.
Хам-хоша бәәдг балһснас ирсн мергҗлтнр хойр өдрин туршарт 70 кү хәләһәд, эрүл-мендин бәәдлинь шинҗлв. Эмчнрин хәләврт орсн улс дундас 44 күүнд месллһ кех кергтә болв. Цергә шишлң керг-үүлдврт орлцачнрт эмчнр онц оньг тусхаҗ, эмнлһнә туст селвг өгв. Тиигәд, 15 ветеран эмчд бийән үзүлв.
Регионмудла залһлда бәрдг ах эмчин дарук Светлана Ольховская таңһчин эмчнр мергҗлтнрин хәләврт орсн улсин бәрмт цаас урдаснь белдҗ цуг шинҗллтс кесиг темдглв. Нег үлү өөдән чинртә эмчнрин дөң керглҗәдг улсин бәрмт цааснь дигтә-даратаһар белдгдв гиҗ эн үүрмүдән магтв.
- Мана таңһчд онц оньг тусхаҗ, бәәрн әмтн сән чинртә эмнлһ авхд туслдг Әрәсән ФМБА-н оториноларингологийин номин төвин һардач, Әрәсән эрүл-менд харлһна министерствин ах мергҗлт, профессор Николай Дайхест ик ханлтан өргҗәнәв. Тер мет Әәдрхнә мергҗлтнр таңһчин әмтнд килмҗән тусхаҗ эрүл-мендин бәәдлинь шинҗлҗ эмнлһнә туст селвгән өгч, өөдән чинртә дөң күргҗәхиг үнлх кергтә, мана нөкцлт күцәмҗтә болтха, - гиҗ таңһчин эрүл-менд харлһна министр Саран Булат дурдв.

Видео