Дагестана ахнр-дүүнриг дөңнәд

Сегодня, 13:54 | Общество, Таңһчин зәңгс, Зіњг

Моһа сарин чилгчәс авн ик хур орсна ашт Дагестанд һолмуд дүүрәд, кесг балһсд-селәд уснд авгдад, ик аюл учрв. Бәәрн улсин гермүдт усн орад, нәрн бәәдл тогтв. Тер мет уулын һазрт цасн икәр орад, бас зеткртә йовдл учрв. Әрәсән Президент Владимир Путин орн-нутгин залврт Дагестанд дөң-нөкд болхин туст даалһвр өгсмн. Мана ик орн-нутгин булң болһнас әмтн эврә сән дурар Дагестанд одад, дор ормднь әмтнд дөңгән күргҗәнә. Әрәсән регионмудт шишлң әңгүд секгдәд, буйнч седклин керг-үүлдврмүд эклв. Хальмг Таңһч хам-хоша бәәдг Дагестана ахнр-дүүнрән эн күнд цагла бас дөңнхәр шиидв. Таңһчин Толһач Хаска Батун даалһврар Элстәс Дагестан Республикүр хот-хол, эм, дулан хувцн йовулгдв.
Хальмг Таңһчин эрүл-менд харлһна министерств эн буйнч седклин кергт бас шунмһаһар орлцҗ, уснд авгдад бачм бәәдл учрсн Дагестана улст хот-хол, ус, эм, өдр болһн олзлдг олн зүсн кегдлмүд цуглулв. Райодын болн таңһчин эмнлһсин көдләчнр цуһар гилтә эн кергт бас орлцхар шунв. Шидр цуглулгдсн хамг юмиг Б.Б.Городовиковин нертә баһчудын Төвд күргҗ цааранднь Дагестанд йовулхар белдв.
Түргн дөң күрглһнә болн аюлын медицинә Төвин көдләчнрин келсәр, эдн өдр болһн гилтә әмтнд түрүн дөңгән күргдг мөн. Бачм бәәдл учрсн кемд дарунь дөң күргх кергтәг бидн сәәнәр меднәвидн. Нег үлү Әрәсән улсин ниицлтин җил зарлгдсн цагт бидн ниитәһәр нег-негән дөңнҗ, бәәсәрн хувалцҗ хамцу бәәх зөвтәвидн. Дагестана болн Хальмг Таңһчин улсин ах-дүүһин хоорндк залһлдаг улм батрулх кергтә, – гиҗ Төвин көдләчнр келнә.
Урҗ өдр Хальмг Таңһчас дәкәд 20 тонн ацан Дагестана әмтнд йовулгдв. Ода таңһчин улс цуглулсн хамг юмн Хасавюртовск района әмтнд күрггдв. «БиднХамдан» олна ниицәнә таңһчд үүлддг штабин һардач Шахныка Татьянан келсәр, арһлачнр, сурһуль-эрдмин, эрүл-менд харлһна бүрдәцсин көдләчнр, эгл улс хам-хоша бәәдг региона әмтнә зовлң хувалцад, дулан хувц, уудг ус, хот-хол, эм, ус сордг болн дулалдг кергслмүд болн нань чигн тоот цуглулв. Цергә болн спортын белдврин «Дәәч» Төвин, «Навигаторы детства» болн «Движение первых» бичкдүдин олна бүрдәцсин гешүд эн кергт бас шунмһаһар орлцснь темдгтә болв. Арвтнр Дагестана әмтнә төлә цуглулсн тоотыг машинд ачҗ хол хаалһднь йовулв.
- Таңһчин әмтн, райодын муниципальн бүрдәцс, арһлачнр, күч-көлсч коллективс цуһар арһ-чидлән хамцулад, аюл учрсн Дагестана улст нөкд болҗана. Ик-бичкн уга буйнч седклин кергт демән өгч сана зовҗана. Йириндән мана орн-нутгин әмтн күнд цагла нег-негндән түшг болҗ, ах-дүүнр кевтә бәәдг юмн. Бидн дарани аца йовулҗанавидн, буйнч седклин керг цааранднь давулгдхмн, - гиҗ таңһчин баһчудын керг-төрин Агентствин һардач Камиль Маркеев темдглв.
Дагестана «Содружество» сойлын төвин һардач Аслудин Калабегов болхла таңһчин әмтнд ик ханлтан өргҗ, эн кергт туслсн улс бахмҗ үүдәҗәнә гив.
БАТАН Наталья
ЗУРГТ: түргн дөң күрглһнә болн аюлын медицинә Төвин көдләчнр

Видео