Төл авлһна кем эклв

Сегодня, 13:52 | Общество, Таңһчин зәңгс, Зіњг, Селәнә эдл-аху

Үвләр орсн цасн хәәләд, нарн мандлад, тег серәд, делгүдән көкрәд, хавр ирсиг медүлнә. Эн кемд малчнрин төлә төл авлһна дааврта кем эклнә. Энүг сән йовудтаһар давулхин төлә таңһчин селәнә эдл-ахун бүрдәцс, фермермүд малын теҗәлән эртәснь белдәд, хаша-хаацан ясад, дааврта кевәр көдлмшән күцәнә.
Хальмгин селәнә эдл-ахун министерствин зәңглсәр, таңһчин эдл-ахуст асргдҗадг 320 миңһн һар толһа бод мал, 1,5 миңһн һар хөн, 1000 шаху темән үвлзлһнд орсн билә. Цуг эдл-ахуст керглгдх малын хот белдгдсмн. Намрин сармудт зөвәр дулан болад, мал өдртән теегт идшләд, малын хот әрвнәр олзлгдв гиҗ келх кергтә.
Ода таңһчин эдл-ахуст төл авлһна көдлмш гүргүдән орчксн бәәнә. Район болһнд шишлң штаб бүрдәгдв. Энүнә медлд селәнә эдл-ахун бүрдәцст, КФХ-ст болн ЛПХ-ст төл авлһна кем яһҗ күцәгдҗәхнь даңгин бүрткгднә. Тер мет селәнә эдл-ахун министерствин мергҗлтнр СМО-син толһачнрла болдг харһлтст нәрн төрмүдиг арднь орҗ хаһлна.
Шидр кесн то-дигәр, таңһчин цуг эдл-ахуст 500 миңһн шаху хурһн болн 100 миңһн туһл авгдв. Төл авлһна кем цаарандан давҗана. Нег һазра селәнә эдл-ахун арһлачнр орн-нутгин хот-хоолын әәмшг уга бәәдл тогталһнд бас туслҗана гих кергтә.
Җил болһн малчнр олн зүсн көтлврмүдт орлцҗ, шаңһа дем авна, эннь кергән делгрүллһнд эрк биш олзта-туста болна. Тер мет Хальмг Таңһчин Толһач Хаска Бату селәнә эдл-ахун көдләчнрин үүлдврт онц оньган тусхаҗ цуг таларнь дөңннә.
Одахн Хальмгин селәнә эдл-ахун министерствд тохма мал өсклһнд йилһгдҗәдг шишлң дем һарһҗ өглһнә керг эклв. Ода болхла орҗ ирсн 1 миңһн һар эрлһн хәләгдәд, удл уга малчнрт мөңгнә дем өггдх зөвтә.
– Мана таңһч мал өсклһнә халхар болхла Әрәсән нүүрлгч регионмудын тоод орна. Эн нерән геех зөв угавидн. Идгүдин һазрин төрмүдт онц оньган тусхах кергтә. Идгүдин бәәдлиг шинҗләд, чинринь ясрулад, ирлцңгү керг-үүлдврмүд давулх кергтә, – гиҗ Бату Сергеевич таңһчин селәнә эдл-ахун министерствд даалһв.
Өдгә цагт олн эв-арһс олзлад, эврә эдл-аху бүрдәһәд, малын то икдүлҗ, кергән делгрүлхд цуг таал бәәнә. Мал өсклһнә өвкнрин кергиг нег һазра малчнр цаарандан даавртаһар күцәхнь лавта гиҗ сангдна.

КАРСАНА Евгения

Видео