Көдәрҗәдг һазрин тускар күүндв

Вчера, 16:04 | Общество, Таңһчин зәңгс, Зіњг

Хальмг Таңһчин Улсин Хуралын (Парламентин) селәнә эдл-ахун, йиртмҗ харлһна әңгин седвәрәр һазр көдәрлһиг ууруллһна төрәр өргн сүүр болв. Мана таңһчла хам-хоша бәәдг Әәдрхнә болн Аһшин мүҗсин, Чечнян, Сарпулин крайин зака үүдәгч бүрдәцсин, таңһчин күцәгч йосна, прокуратурин, дорд үзгин райодын элчнр терүнд орлцв. Тер мет Әрәсән Федерацин Хүүвин гешүн Хачира Борис ниигмин сүлҗәнә эв-арһар залһлда бәрҗ сүүрт хәләгдсн төрәр ухан-тоолврарн хувалцв. Сүүриг селәнә эдл-ахун әңгин һардач депутат Кокан Михаил һардҗ давулв.
- Хәләгдҗәдг төр нәрн болна. Мана таңһчин бәәтхә, хам-хоша бәәдг Өмн үзгин болн Ар Кавказин регионмудыг һазр көдәрҗәдг йовдл бас үүмүлҗәнә. Тегәд бидн арһ-чидлән хамцулад, эн нәрн төр хаһлхин туст нег шиидвр батлҗ, сүүрин ашт Әрәсән Орн-нутгин Хүүвин болн Залврин хайгар бичг белдх зөвтәвидн. Доладгч хуралтын депутатнр сессин сүүрт болн талдан харһлтсин йовудт эн төр босхна. Тиигәд, 2024 җилд селәнә эдл-ахун һазриг тустаһар олзллһна туск закан батлгдсн билә. Бидн эн төрәр таңһчин прокуратурла, күцәгч йосна бүрдәцслә бас нөкцҗ үүлднәвидн. Һазр көдәрлһн региона экономикд ик харшлтан күргнә, тегәд зуг хамдан эн төр хаһлҗ чадхвидн. Мана ик сүүрт орлцхар ирсн гиичнрт ик ханлтан өргҗәнәв, - гиҗ Хальмг Таңһчин Улсин Хуралын (Парламентин) Ахлач Артем Михайлов харһлтыг нүр үгәр секв.
Хальмг Таңһчин селәнә эдл-ахун министр Гаван Тимур, таңһчин йиртмҗин көрңгин болн эргндк бәәдл харлһна министр Һооҗура Санл, Росреестрин таңһчд үүлддг Заллтын һардач Буватинә Дольган, «Әрәсән агрохимическ цергллт» ФГБУ-н әңгин һардачин селвгч Унканжинә Георгий, ИКИАТ-ын һардачин үүл дааҗадг Эрднин Ольда мана таңһчд һазр көдәрлһнә туст тогтсн бәәдлин, эн туст күцәгдҗәдг керг-үүлдврмүдин тускар зәңглв. Таңһчин һазрин бәәдл шинҗлснә ашт 88,16 миңһн аһу гектар һазр көдәрснь илдкгдв. «Ө-шуһу модд хадһллһн» гидг орн-нутгин көтлврин йовудт 2019 җиләс авн 2024 җил күртл 7595,6 гектар аһу һазрт урһа модд суулһгдв. Нидн болхла дәкәд 1454,6 гектар аһу һазрт хаалһсин хаҗуһар модд бас суулһгдсн билә. Һазр көдәрлһиг ууруллһна төлә «Приоритет 2030» гидг көтлврин йовудт Хальмг ик сурһульд «Шин тег» гидг төв бүрдәгдв. Урднь Хар Һазра болн Кизлярск идгүдин Заллт үүлддг бәәсмн, тегәд ирлцңгү шаңһа бүрдәц тогтах кергтә гиҗ таңһчин селәнә эдл-ахун министр Гаван Тимур селвг орулв.
Сүүрт таңһчд болн хам-хоша бәәдг регионмудын номин бүрдәцсин элчнр бас орлцҗ, малын идгүд хадһллһна, һазр көдәрлһиг зогсалһна керг-үүлдврмүдин тускар ухан-тоолврарн хувалцв. Тиигәд Чеченск Республикин селәнә эдл-ахун номин-шинҗллтин ик сурһулин һардач Магомед Гаплаев, Әрәсән номин академин агроэкологин, мелиорацин болн модд урһалһна номин төвин көдләчнр Дмитрий Кулик болн Людмила Рыбашлыкова дамшлтарн хувалцв. Сүүрт орлцачнрла ниигмин сүлҗәнә эв-арһар залһлда бәрҗ Әрәсән Федерацин Хүүвин гешүн Хачира Борис хәләгдсн төрәр ухан-тоолврарн хувалцснь темдгтә болв. Федерацин Хүүвин сүүрт ирлцңгү төрәр болсн өргн күүндврин тускар эн келв. Һазр көдәрлһн чинртә төр болҗана, тегәд Хальмг Таңһчин Улсин Хурал эн сүүрин седвәр татсиг гиичнр онц темдглҗ, зуг арһ-чидлән хамцулҗ эн төр хаһлҗ болхмн гиҗ келв.
Сүүрин йовудт чинртә төрәр олн зүсн сүв-севлг орулгдв. Хөн сард Әрәсән Өмн үзгин парламентск ниицәнә (ЮРПА) сүүр болхмн, тегәд терүнд Әрәсән шаңһа йосна бүрдәцсин хайгар дуудврин төсв орулх болҗ шиидгдв.

ДООҖАН Наталья

Видео