Көдлмш хәәҗәдг улст нөкд болхар

Вчера, 15:55 | Общество, Таңһчин зәңгс, Зіњг

Мөрн сарин 17-д А.Амр –Санана нертә Келн-улсин дегтрин саңгин улд көдлмшәр тетклһнә яарм болхмн. Сән авъяст тохрсн керг-үүлдвр дөрвн җил дарандан давулгдҗана. Шидр әмтиг көдлмшәр тетклһнә Хальмг Таңһчин төвин һардач Нимгрә Инҗ седкүлчнрлә харһад, эн керг-үүлдврин тускар тодрхаһар келҗ өгв.
- Эн керг-үүлдвр «Кадрмуд» гидг келн-улсин төсвин «Күч-көлснә күн» гидг орн-нутгин көтлврин йовудт бүрдәгднә. Мөрн сард түрүләд региона девсң болна, хөөннь мөчн сарин 27-д орн-нутгин девсң болхмн. Эн җил таңһчин 40 бүрдәц эн керг-үүлдврт орлцад, 400 һар көдлмшч ормин тускар медүләд, көдлмш хәәҗәдг улсла, сурһулян төгсәҗәдг оютнрла харһхмн. 2025 җилд көдлмшәр тетклһнә яармд күсдундур миңһн күн орлцв, теднәснь 162 күн көдлмш олҗ авв. Эдн нурһлҗ сурһуль-эрдмин, эрүл-менд харлһна, селәнә эдл-ахун, хулд-гүүлгәнә бүрдәцст тааста эрдмәрн көдлмш олҗ авсн билә. Эн җил болх керг-үүлдврт әмтн бас көдлмш олҗ авхнь лавта, - гиҗ Инҗ Григорьевич келв.
О.Шунгаеван нертә нилхд төрлһнә Төв, «Одн» завод, «Улан хөөч» эдл-аху, «Альтаир» КФХ, балһсна урһа модна эдл-аху, П.Жемчуевин нертә таңһчин эмнлһн, Зая-Пандитан нертә хальмг этносойлын гимназь болн нань чигн бүрдәцс эн җил көдлмшәр тетклһнә яармд орлцхмн. Таңһчин бүрдәцслә зерглҗ талдан регионмудын элчнр ниигмин сүлҗәнә эв-арһар орлцҗ, көдлмшч ормсин тускар келҗ өгхмн гиҗ зуралгдҗана.
Ирлцңгү яармд һурвн талвң көдлхмн. Тиигәд, таңһчин бүрдәцс ямаран эрдмтә көдләчнр эднд кергтә болҗахиг цәәлһәд, көдлмш уга улсла күүндәд, соньмсулҗадг сурврмудтнь хәрү өгхмн. Цергә шишлң керг-үүлдврин ветеранмудт онц оньг тусхагдхмн. Тегәд «Төрскән харсачнр» шаңһа саңгин таңһчд үүлддг әңглә хамдан ветеранмудт көдлмш олҗ авлһна, немр сурһуль сурлһна төрмүдәр цәәлһвр өгч эднд дөң күргхмн. Әмтнә социальн харслтын Элст балһсна цергллтин мергҗлтнр социальн бооца батлҗ эврә керг бүрдәлһнә тускар келҗ өгхмн. Дәкәд нег талвңд ах классмудын сурһульчнрт иргчдән тааста эрдм шүүҗ авхд дөң болхин төлә соньн харһлтс бүрдәгдхмн. Көдлмшәр тетклһнә төвин мергҗлтнр эн керг-үүлдврт орлцачнрла дамшлтарн хувалцад, көдлмш хәәсн цагт чикәр бийән бәрлһнә, бәрмт цаас орулҗ өглһнә туст сүв-селвг өгхмн.
БАТАН Наталья
Редакцин архивәс авсн зург

Видео