Дагестана улст нөкд болхар

Сегодня, 14:11 | Общество, Таңһчин зәңгс, Зіњг

Мана орн-нутгин әмтн ямр чигн әәмшгтә йовдлла, зеткрлә харһсн нег һазра улсан даңгин дөңнҗ нөкд болхар шунна. Цергә шишлң керг-үүлдвр эклснәс авн регион болһнд буйнч дөң цуглулдг әңгүд секгдсмн. Тенд цергчнрт керглгдҗәдг хамг юмн хураҗ илгәгднә.
Одахн ик хур-чиг орсна ашт хам-хоша бәәдг Дагестанд һолмуд дүүрәд, кесг балһсд-селәд уснд авгдад, аюл учрв. Олн патьрта кесг давхрта гермүдин ул-сүүрнь ода нурад унн гиҗәнә. Зеткрлә харһсн улсин туст амр биш бәәдл тогтв. Һундхас, әмнәсн хаһцсн улс бас илдкгдҗәхнь зәңглгдв.
Тер дарунь гилтә Әрәсән регионмудт шишлң әңгүд секгдәд, дөң цуглулгдв. Урҗ өдр Хальмгин Толһач Хаска Батун даалһврар хөрн һар тонн хамг юм ачсн ик машин Элстәс Дагестан Республик тал һарч йовв.
– Мана таңһчин улс эн буйнч кергт шунмһаһар орлцв. Седвәртә арһлачнрт, таңһчин бүрдәцст, цаһан седклтә цуг улст ханмҗта үгмүд келх кергтә. Мел иим цагла нег-негән дөңнҗ тусан күргх кергтә. Дагестана улс мана ахнр-дүүнр болна, – гиҗ Элст балһсна Хургин депутат, цергә шишлң керг-үүлдврин ветеран Чумуда Николай келнә.
Тер мет буйнч дөң хуралһнд баһчуд, оютнр, волонтермуд бас орлцв, көвүд-күүкд аца ачад нөкд болв. Таңһчин экономикин болн хулд-гүүлгәнә министрин дарук Көкән Санлын келсәр, нег һазра мана улс цуг орн-нутгин иргнмүдлә хамдан негдҗ, буйнч керг бүтәҗәнә. Ик зовлң учрсн Дагестана улст бидн эрк биш дөң-тусан күргх зөвтәвидн, эннь мадниг улм хамцулҗ батрулхмн. Хойр өдрин туршт нег һазра улс 1 сай шаху арслң цуглулв, өрәлнь болхла Әрәсән Улан Кирсин Хальмг әңгин хайгар илгәгдв. Наадк мөңгн әмтнд керглгдҗәдг эд-тавр хулдҗ авлһнд һарһгдв.
Хальмг Таңһчин Толһач Хаска Бату буйнч кергт орлцсн арһлачнрт, олна бүрдәцсин нүүрләчнрт болн бәәрн улст ханлтан өргв. Энүнә келсәр, амр биш иим цагла нег-негндән түшг болх кергтә. Дагестана иргнмүдт тесвртә бәәхиг дурдад, Хальмг Таңһч таднла хамдан! гиҗ Бату Сергеевич иткүлв.
«Бидн хамдан» штабин һардач Шахныка Татьянан темдглсәр болхла, цергә шишлң керг-үүлдвр эклснәс авн эдн кесг дәкҗ буйнч дөң хураһад, нег һазра цергчнрт илгәсн билә. Эн өдрмүдт Дагестана улст эрк биш нөкд болхвидн, нег орн-нутгт бәәдг иргнмүдт нег-негән дөңнх кергтә. Б.Б.Городовиковин нертә баһчудын Герт күн болһн дөңгән авч ирҗ чадҗана. Хот-хол, хувц-хунр, эм, уудг усн, ор-дер болн нань чигн тоот түрҗәдг улст кергтә болхмн. Удл уга буйнч ацан хойрдад Дагестанд йовулгдхмн, гиҗ Татьяна Ульяновна темдглв.

КАРСАНА Евгения

Видео