Цергллтс шинрүлгдҗәнә

Сегодня, 14:01 | Общество, Таңһчин зәңгс, Зіњг

Шидр Әрәсән күч-көлснә болн көдлмшәр тетклһнә цергллтин һардачин дарук Ян Талбацкий мана таңһчд ирәд, әмтиг көдлмшәр тетклһнә цергллтсиг шинрүллһнә керг-үүлдврин йовудыг бүрткв. Хальмг Таңһчин залврин Ахлач Босхмҗин Гилән күндтә гиичлә харһад, «Кадрмуд» келн-улсин төсвин йовудт күцәгдҗәдг керг-үүлдврмүдин тускар күүндв.
Хальмг Таңһч эн келн-улсин төсвин йовудт әмтиг көдлмшәр тетклһнә цергллтсин үүлдвриг шинрүллһнә көтлвр күцәҗәдг регионмудын тоод орв. Тиигәд, эн җил Элст балһснд болн райодт әмтиг көдлмшәр тетклһнә төвмүдин үүлдвр ясруллһнд 300 сай арслң һарһгдхмн. Әрәсән күч-көлснә болн көдлмшәр тетклһнә цергллт мана таңһчиг дөңнҗ, райодт болн хотл балһснд көдлмшәр тетклһнә төвмүдин бәәрнд бат ясвр келһнд, кергсләр теткҗ теднә ул батруллһнд ик оньг тусхаҗадг болна. «Бидн җил болһн шин көдлмшч орм бүрдәнәвидн, арһлачнр шишлң төсвс күцәнә, тегәд кадрмуд белдлһнә, немр сурһуль сурч шин эрдм даслһна халхар күн болһнд тусан күргҗ, көдлмш олҗ авхд дөң болх кергтә», - гиҗ Босхмҗин Гилән темдглв.
Әрәсән күч-көлснә болн көдлмшәр тетклһнә цергллтин һардачин дарук Ян Талбацкий Элст балһсна әмтиг көдлмшәр тетклһнә болн Заллтын Төвмүд бәәршлх хорас хәләҗ шинҗлснәннь тускар келв. Зәрм райодт бас одад, цергллтсиг шинрүллһнә йовудт ямаран көдлмш күцәгдҗәхиг бас хәләхмн. Ода көдлмшәр тетклһнә бүрдәцс шин таалд көдлхдән белдҗәнә, ясвр кегдҗәнә, шин кергсл болн өлг-эд хулдҗ авгдҗана. Таңһчин әмтиг көдлмшәр тетклһнә цергллтс «Әрәсән көдлмш» гидг кадрин Төв болҗ үүлдхмн. Харһлтд орлцсн Хальмг Таңһчин залврин Ахлачин дарук –таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан келсәр, ясврин көдлмш дигтә-даратаһар кегдҗәнә, әмтнә болн мергҗлтнрин төлә сән таал тогтагдҗана. Көдлмшәр тетклһнә төвд өдгә цага эв-арһс олзлҗ туслмҗ күрглһнә, бичкдүдин төлә нааддг хорас бас секгдхмн. Район болһнд кадрин Төв бас үүлдхмн.

БАТАН Наталья

Видео