Теегин Йосна Бичг – мана Һол Закан

Сегодня, 13:27 | Общество, Таңһчин зәңгс, Зіњг

Һучн хойр җил хооран 1994 җилин мөрн сарин 5-д Хальмг Таңһчин «Теегин Йосна Бичг» (Конституц) батлгдсмн. Эн мана таңһчин Һол Закан болҗана, тегәд энүнлә ирлцҗ Хальмг Таңһчин экономик, сурһуль-эрдм болн нань чигн халх өргнәр делгрҗәнә.
Сүл җилмүдт әмтн бәәдг гермүд, социальн бүрдәцс олар тосхгдҗана. Тер мет шин хаалһс эдлврт оруллһн, сурһульмудын, сойлын гермүдин шинрүллһн, арһлачнрин җисә делгрүллһн сән йовудта болҗана. Селәнә эдл-аху мана таңһчин экономикин һол халхнь болна, тегәд мал өсклһн, услврин һазрин кемҗә икдүллһн, селәнә эдл-ууш эд-бод келһн чинртә төрмүдт тоолгдҗ һол оньг өггднә. Әмтнә бәәдл-җирһлин таал ясрулҗ, олз-ору икдүлхин төлә көдлмшч шин ормс бүрдәгдҗәнә. Тиим неквр таңһчин Һол Заканд тәвгдҗәнә. Экономикин талдан чигн халхс делгрҗәхиг темдглх кергтә. Тегәд Теегин Йосна Бичгин некврлә ирлцҗ, әмтнә җирһл улм ясрҗана. Дорас өсч йовдг баһ үйнр билг-эрдм, спортын кесг янз делгрүлҗ, гүн медрл болн төрскнч сурһмҗ авч седвәртәһәр үүлдҗ, төрскн һазр-уснаннь өлзәтә үрд болхин төлә таңһчд сән таал тогтагдҗана. Эндр мана бичкдүд болн баһчуд таңһчин болн орн-нутгин олна бәәдл-җирһлд шунмһаһар орлцҗ, нер һарч бахмҗ үүдәнә.
Хальмг Таңһчин Һол Заканас иштә мана таңһчд күцәгч, зака үүдәгч болн муниципальн йосна бүрдәцс үүлднә. Хальмг Таңһчд эврә туг, частр болн титм бәәнә. Таңһчин меҗә мана зөв угаһар сольгдшго юмн. 2024 җилд Хальмг Таңһчин Улсин Хуралын (Парламентин) депутатнр Теегин Йосна Бичгт сольвр орулхин туск зака батлад, таңһчин залврин Ахлачин болн терүнә даруксин үүлд батлх улст зөв өгдг болв. Таңһчин закад Әрәсән закадла ирлцх зөвтә.
Орн-нутгин толһач Владимир Путинә шиидврәр улсин ниицлтин җил зарлгдв. Мана ик орн-нутгт, тер тоод Хальмг Таңһчд, олн келн-улс сойлан, төрскн келән, тууҗан делгрүлҗ хоорндан ниитәһәр бәәнә. Олн шаҗна элчнр кен-негнәннь авъяс күндлҗ ни-негн бәәхнь бас Теегин Йосна Бичгт заагдсн мөн.

ДАВАН Наталья

Видео