Селәнә улс эмчнрт ханлтан өргв

Сегодня, 13:13 | Общество, Таңһчин зәңгс, Зіњг, Эрўл-менд харлһн

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн!» гидг керг-үүлдврин дөрвдгч девсң төгсв. Эмчнр моһа сарин туршарт таңһчин хол селәдт одад, әмтнә эрүл-мендин бәәдл шинҗлв. Шидр Хальмг Таңһчин эрүл-менд харлһна министр Саран Булат эн керг-үүлдврин аш дигләд, селәнәхнә эрүл-менд харлһна кергт орлцсн эмчнрт ханлтан өргв.
- «Эрүл-менд бәәтн!» гидг керг-үүлдврин йовудт эмчнр 12 районд одад, ут тоодан 1300 күүнд дөңгән күргв. Эн керг-үүлдврин һол күслнь хол селәдт бәәдг улст дөң күрглһн, ямр нег гем эртәр илдкҗ дарунь эмнх керг мөн. Тиигәд, эмчнрин хәләврт орсн улс дундас 270 күн гемтә болҗ илдкгдв, тер тоод 2 күн гүлгн гемәр гемтснь медгдв. Авъяст тохрсар, эмчнр гемтә-шалтгта улст, медәтнрт, цергә шишлң керг-үүлдврт орлцачнрт болн теднә өрк-бүлин гешүдт онц оньг тусхав. Тиигәд, СВО-н 8 ветеран болн эднә өрк-бүлмүдин 39 гешүн эн керг-үүлдврин йовудт эрүл-мендин бәәдлән шинҗлҗ, эмнлһнә туст эмчнрин селвг авв. Ямр нег гемин уршгар эмнлһнд ирдг арһ уга 14 күн гер деерән шинҗлгдв. Эн керг-үүлдврин йовудт әмтн маммографь, флюорографь, УЗИ шинҗллт кев, терүнә төлә райодын эмнлһст бәәдг шишлң көлгн олзлгдв. Хәләврин ашт 39 күн П.Жемчуевин нертә таңһчин эмнлһнд йовулгдв, дәкәд 117 күн немр шинҗллт кех болв. Эрүл-мендин Төвин көдләчнр ут тоодан 400 күүнлә чик авг-бәрцин болн олн зүсн гемәс саглуллһна төрәр күүндв. Селән һазрт бәәдг әмтн эмчнр ирәд, эрүл-мендин бәәдлинь шинҗлҗ дөңгән күргсиг өөдәнәр үнлв. Эн керг-үүлдврт орлцсн эмчнрт ик ханлтан өргҗәнәв, эдн кергән үнн-чик седклтәһәр күцәв, - гиҗ Саран Булат келв.
«Эрүл-менд бәәтн!» гидг керг-үүлдвр эклснәс авн 10 миңһн күн эмчнрин хәләврт орв. Эн керг-үүлдвр җилд хойр дәкҗ бүрдәҗ давулгдна. Дарани девсң намрин эклцәр болхмн гиҗ зуралгдҗана.
БАТАН Сәәхлә

Видео