Сойлын көдләчнриг магтҗ ачлв

Сегодня, 17:20 | Общество, Таңһчин зәңгс, Зіњг, Сойл

Сойл - келн-улсин үндсн болдгинь җирһлин тууҗ медүлҗәнә. Давсн цагиг, эндрк өдриг залһлдулҗ, сойлын көдләчнр җилин дөрвн цагт әмтнд сергмҗ үүдәҗ, билг-эрдмәрн байрлулна.
Эн җил сойлын көдләчнрин байрин хург моһа сарин 26-д давв. Эн өдр хотл балһсна болн район болһна сойлын көдләчнр Элстд цуглрҗ ирв.
Хальмг Таңһчд хойр миңһн шаху күн сойлын халхар көдлҗ йовна. Селәнә сойлын гермүдт, дегтрин саңгудт, музеймүдт, театрмудт, үүдәгч коллективст, сойлын сурһулин бүрдәцст медрлтә болн сән белдвртә мергҗлтнр көдлҗәнә. Таңһчин сойлын болн зуульчллһна министр Бембин Евгений байрин хургиг хальмг йөрәләр эклв. Сойл уга келн әмтн уга гиҗ хальмгуд келдг мөн. «Сойл гисн күүнә җирһлин һол учр-утхнь болн күмн әмтиг хамцулгч үнтә тоот» гиҗ номт Дмитрий Лихачев келсн үгмүдиг министр тодлулв. Сойлын үүлдәчнрин көдлмшин чинринь эн үгмүд сән кевәр медүлҗәнә. Сойлын делгрлтин эклцд йовсн Очра Номтын, Душан Үлмҗин, орс үүлдәчнрин чигн нердиг Евгений Владимирович зааҗ Хальмгин сойл делгрүллһнд хара биш тәвцән орулсинь темдглв. Улсин ниицлтин җилд Семен Залкиндын, Николай Пальмовин, нань чигн билгтнрин ач-тусиг үнләд, хальмг сойл ик тууҗта болҗахиг заав. Н. Пальмовин нертә Келн-улсин музей 105 җилин өөнән темдглҗәнә, Басңга Баатрин нертә Келн-улсин театр 90 җилин өөндән өөрдҗ йовна. Тууҗан мартлго, авъясмудан делгрүләд, темдглсн зурасан күцәҗ, эндр сойлын көдләчнр шунҗ йовхиг министр онц темдглв.
Сойлын көдләчнрин өдр болһни шунмһа үүлдврин нилчәр келн-улсин зөөр әрүнәр хадһлгдҗ, билг-эрдмин халх таңһчд өргнәр делгрҗ йовна гиҗ Хальмг Таңһчин Толһач Хаска Бату сойлын көдләчнриг йөрәҗ, үүлдвринь өөдәнәр үнлв. Таңһчин залврин Ахлач Босхмҗин Гилән таңһчин Толһачин йөрәлин үгиг олнд соңсхв.
Сойл-таңһчин җирһлин чинртә нег әңгнь болҗахиг темдгләд, эн халхд көдлҗәдг олн улсин цуцрлтан уга көдлмшиг Гиляна Герасимовна зөвтәһәр үнләд, «Хальмг Таңһчин ачта артист» болн «Хальмг Таңһчин сойлын ачта көдләч» гидг өөдән нер зүүсн көдләчнрт ачлвринь бәрүлҗ өгв (зургт). Ачлгдсн әмтнд нерәдҗ, хальмг улсин артист Мергн Ким дуулсн дун цугтад сергмҗ үүдәв.
ЮФО-д РФ-н Президентин күцц зөвтә элчллтин һардврин Хальмг Таңһчар үүлддг федеральн ах инспектор Александр Беляев улсин зөөр хадһлҗ, цааранднь делгрүлҗәдг сойлын көдләчнриг йөрәһәд, Әрәсән Президентин Ханлтын бичгиг «Хальмг үнн» газетин седкүлч Түрвән Һунад (зургт) болн нертә дууч, шаңһа филармоня һардач Очкан Аннад бәрүлҗ өгв.
Кен-негнь бичкнәсн авн сойлла эклҗ таньлдна. Экин саатулын дун, аавин келҗ өгсн тууль мадниг сойлын делкәд орулна, - гиҗ Хальмг Таңһчин Улсин Хуралын (Парламентин) Ахлач Артем Михайлов сойлын көдләчнриг йөрәҗ келсн болдг. Улсин Хуралын дипломсар сойлын олн көдләчнриг эн ачлв. Олн җилин туршарт сойлын халхар көдлҗ йовдг седвәртә болн медрлтә олн көдләчнр таңһчин сойлын болн зуульчллһна министерствин ачлврмудар мөрәлгдв.
Сойлын көдләчнрин профсоюзин таңһчин хүүвин ахлач Очр Иванов сойлын ветеранмудт Ханлтын бичгүд болн мөңгнә мөрәс бәрүлҗ өгв. Таңһчин сойлын делгрлтд ик тәвцән орулсн Хальмгин Баатр Нәдвдә Петр, хальмг улсин артист Александр Щеглов, Хальмг Таңһчин билг-эрдмин ачта үүлдәч Людмила Толкачева, Хальмг телеүзлин нертә седкүлчнр Харлун Бадма болн Чуучән Валентина профсоюзин ачлврар темдглгдв. Сойлын ветеранмудыг таңһчин залврин Ахлач Босхмҗин Гилән үнн седкләсн йөрәв.
Байрин хургт Хальмг улсин артистнр Мукөвүнә Кутлан болн Бурлака Эдуард, дууч Александр Ванькаев сойлын цуг көдләчнрт дууһан нерәдв. Цевгә Төлән нертә дууна коллективин Төрскнә тускар дуулсн дун кен-негнднь бахмҗ үүдәснь лавта.
ХӨӨЧИН Галина

Видео