Иньгллтин залһлдан батрҗана

Сегодня, 17:17 | Общество, Таңһчин зәңгс, Зіњг

Хальмг Таңһчин болн Луганск Улсин Республикин Антрацитовск района хоорнд батлгдсн нөкцлт цуг халхар делгрҗ, иньгллтин залһлдан өдр ирвәс батрҗана. Таңһчин эрүл-менд харлһна, сурһуль-эрдмин, социальн теткврин, жилищн-коммунальн болн тосхлтын бүрдәцсин көдләчнр, арһлачнр дөң-нөкд болҗ, хамцу керг-үүлдврмүд давулҗ, дамшлтарн хувалцна. Шидр мана таңһчур Антрацитовск района әмтнә социальн теткврин төвин көдләчнр болн бүрдәцин хәләврт бәәдг гемтә-шалтгта бичкдүд ирв. Бүрдәцин мергҗлтнр энд дамшлт хоршаҗадг болхла, күүкд-көвүд эрүл-мендән батрулҗана.
Таңһчин гемтә-шалтгта бичкдүдин реабилитацин төвин һардач Балдашинә Аннан келсәр, Антрацитас дөрвдгч баг мана тал ирҗәнә. Эдн социальн бүрдәцин «Эк болн үрн» гидг әңгд бәәһәд, энд эрүл-мендән батруллһна, эмнлһнә керг-үүлдврмүдт орлцсн деерән төвин мергҗлтнрин кичәлмүдт медрлән гүүдүлнә, билг-эрдмән делгрүлнә. Хол һазрас ирсн гиичнрин төлә соньн көтлвр белдгдв, тегәд бичкдүд «Ойрат-Арена» спортын төвин бассейнд усчна, ипподромд болн «Темәдин арлд» одад мөр болн темә унҗ сергмҗтәһәр амрв. Хойр долан хонгин эргцд энд бәәх гиичнрин төлә өдр болһн соньн харһлтс, экскурсь, нань чигн керг-үүлдвр давулхвидн. Эдн гертән бәәснлә әдл бәәҗ, сән эмнлһ авад, цогц-махмудан чаңһаһад амрад хәрхмн, гиҗ Анна Андреевна келв.
- Би Антрацитовск районд гемтә-шалтгта бичкдүдин реабилитацин әңгд сурһмҗлачар көдлнәв. Мана әңгин хәләврт эрмдгтә 52 күүкн-көвүн бәәнә. 2023 җиләс авн бидн Хальмг Таңһчла бат залһлда бәрҗ хамцу үүлдҗәнәвидн. Урднь бидн ниигмин сүлҗәнә эв-арһар залһлда бәрҗ, олн зүсн төрәр Хальмгин мергҗлтнрин дамшлтла таньлдҗ, көдлмшин халхар сүв-селвг авдг биләвидн. Эдн манад бичкдүдин садмуд, дунд сурһульмуд, хаалһс ясч, дөңгән күргнә. Эмчнр дару-дарунь ирҗ, бәәрн әмтнә эрүл-мендин бәәдл шинҗлнә. Нааран ирсн мадниг үр-иньглгч таалд тосв. Дәкәд намаг дахад ирсн Виктория зе күүкм энд эмнлһ авчана (зургт), тегәд нег үлү байрлҗанав. Зе күүкм сурһулян йилһән сәәнәр сурна, тегәд нааран ирх арһ учрснь энүг урмдулгч зуульчллһн болв. Эн өдрмүдт бидн «Иньгллт» паркин фермд олн зүсн аң-аһрус үзвидн, кинод одвидн, мана бичкдүдт цугнь таасгдҗана. Би болхла көдлмшин халхар мергҗлтән өөдлүлҗ, таңһчин социальн бүрдәцсин үүлдврлә өөрхнәр таньлдҗ, дамшлт хоршах арһ учрснд ханлтан өргҗәнәв, - гиҗ Виктория Мяльдзина келв.
Антрацитын социальн бүрдәцин медицинск эгч Оксана Дишли бас Ульяна күүктәһән ирҗ. Күүкд күн энд эрмдгтә бичкдүдин цогц-махмуд батруллһна эмнлһнә туст бәәрн мергҗлтнрлә селвлцнә. Оксана Валерьевнан келсәр, ода тавн күүкн-көвүн ирв. Таңһчин бичкдүдин эмнлһнә мергҗлтнр эднә эрүл-мендин бәәдл шинҗләд, эмнлһнә туст селвг өгв. Антрацитын гемтә-шалтгта бичкдүдин реабилитацин төвин һардач Людмила Астафьева бас мана таңһчур түрүн болҗ ирсмн. Хойр җилин эргцд эдн мана таңһчин социальн делгрлтин, күч-көлснә болн көдлмшәр тетклһнә министерствлә болн социальн бүрдәцслә нөкцҗ үүлдҗәнә.
Антрацитовск района әмтнә социальн теткврин төвин көдләчнр мана таңһчин күүкд-көвүдт «Хавр, менд!» гидг наадһасин наад үзүләд, эдн дунд олн зүсн марһа давулҗ сергмҗ үүдәв.

ДООҖАН Наталья

Видео