Хальмг Таңһч – чидл урһадг һазр

Сегодня, 15:59 | Общество, Таңһчин зәңгс, Зіњг

Шидр РАНХиГС-ин Президентин академин ВШГУ-н шишлң көтлврт орлцачнр Элстд ирәд, бүкл долан хонгтан көдлв. Басң өдрлә таңһчин залврин герт Хальмгин һардврин орлцлһтаһар ашлгч сүүр болв. Хальмг Таңһчин Толһач Хаска Бату, залврин ахлач Босхмҗин Гилән болн залврин гешүд терүнд орлцв.

Орн-нутгин регионмудын һардачнр, шаңһа болн муниципальн көдләчнр, «Әрәсән нүүрләчнр» марһана дииләчнр чинртә көтлврт орлцв. Эдн цуһар эврә халхарн дамшлтта болн гүн медрлтә мергҗлтнр мөн.
Долан хонгин туршарт мана таңһчла өөрхн таньлдад, экономикин ул тогтаҗадг тоотынь йилһв. Мана таңһчд селәнә эдл-аху экономикин һоллгч халхнь болҗахиг шинҗләд, орн-нутгин хот-хоолын әәмшг уга бәәдлд тогталһнд тәвцән орулҗахиг онц темдглв.
Тер мет сүүрт орлцачнр промышленностин, зуульчллһна, көлгнә, БПЛА-н делгрлтин төсвс күцәлһнә болн талдан төрмүдәр ухан-тоолврарн хувалцв. «Зонтичный бренд» болн маркетингин талдан төрмүдт онц оньг тусхагдв. Энүнә эв-арһар мана таңһчд кеҗ һарһдг олн зүсн эд-тавр орн-нутгин рынкд чинртә орман эзлҗ чадхмн.
Терүнәс нань шинрлтин бүрдәц болн IT-парк бүрдәлһнә, селәнә эдл-ахун арһлачнриг хамцуллһна «Земск мергҗлт» көтлвр күцәлһнә болн талдан төрмүдәр күүндвр бас болв.
Деер келгдсн цуг төсвсиг тер дарунь гилтә күцәх керг уга, тер юңгад гихлә дор ормдан дәкәд күүндҗ, хамгин чинртәһинь йилһәд шинҗлх кергтә, гиҗ сүүрт орлцачнр шиидв.
Рязанск мүҗин губернаторин һардврин ахлачин дарук Яна Стрельцован келсәр, Хальмг Таңһчд долан хонгтан бәәһәд, тана тууҗла, сойлла болн авг-бәрцлә өөрхн таньлдсн болв. Йосна болн бизнесин элчнрлә АПК-н болн социальн бүрдәцст одвидн. Тер мет Хальмг ик сурһульд «Баатрмуд 08» көтлврт орлцачнрла болсн харһлтыг бас темдглх кергтә, гив.
– Хальмг Таңһч йосндан чидл-омг өгчәдг һазр болҗахиг ил медвидн. Энд авъяс-заңшалын күчн ямр чигн күсл болн төсв күцәлһнд туслхнь лавта. Тана һазрт цаһан седклтә, тевчңгү улс бәәнә. Альд йовв чигн цуһар нөкд болхан медүлв, эннь мадна седкл авлв, – гиҗ Әрәсән политикин селвгчнрин бүрдәцин вице-президент Алексей Куртов темдглв.
Таңһчин Толһач Хаска Бату сүүриг ашлад, ухан-тоолврарн бас хувалцв.
– Мана таңһчд ирәд, ик өргн көдлмш күцәсн бәәнәт. Шаңһа заллтын ик сурһуль кадрмуд белдлһнә чинртә талвң болна. Тана өгсн соньн цуг седвәриг болн селвгиг учртан авч төсвстән тохрахвидн. Тадн йоста ниитә баг болҗахан маднд медүлвидн. Цуг тана багд ик ханлтан өргҗәнәв, – гиҗ Бату Сергеевич харһлтыг ашлв.

КАРСАНА Евгения

Видео