Торма шинрүлгдв

Сегодня, 15:44 | Общество, Таңһчин зәңгс, Зіњг

Одахн Хальмгин Шаҗн Лам гевш Тензин Чойдакин үрврәр мана таңһчд ирсн гевш лхарамб Чой Гьяцо бурхн-шаҗна үүлдвриг цааранднь делгрүлхин төлә әрүн керг күцәв.

Энткгин Гьюдмед хурлас ирсн лам Хальмгин төв хурлд Цаһан Сарин байрин өмн шар шаҗна әрүн керг торма күцәсмн. Хаврин байрла мөргүлд ирсн олн-әмтн терүг үзәд, мөргәд зальврсмн. Гевш лхарамб Чой Гьяцо торма кедг эвтә эрдмч болна. Олн зүсн өңгтә хорһн тоснла хольҗ кедг әрүн тоотнь шар шаҗна халхар өргнәр олзлгдна. Хальмг Таңһчин Төв хурлд әрүн тоотыг күцәснә хөөн гевш лхарамб Чой Гьяцо Баһ Дөрвдә болн Лаганя райодт одад, тенд бәәдг хурлмудт бас торма кев.
Онц темдглхд, шидр гевш лхарамб Чой Гьяцо «Хальмг үннд» ирҗ шаҗна керг күцәв. Тодлхас, хөрн һар җил хооран Энткгин Гьюдмед хурлын ламнр Хальмгт ирхләрн мана редакцд гиичлҗ ирсн билә. Тиигхд, ном умшад, тавн торма белглсн юмн. Эн җилмүдин эргцд редакцин көдләчнр әрүн эн белгиг әрүнәр хадһлҗ йовсмн. Хойр өдртән күндтә гиич манад көдләд, өңгән геесн торма шинрүлв, Гевш лхарамб Чой Гьяцо көдлмшән күцәсн хөөн Төв хурлын демч лам Гецул Тубтен Цультимла хамдан ном умшад, торма дәкнәс әрвсләд әмдрүлв. Редакцин көдләчнр әрүн тоот күцәсн шаҗна элчнрт зүркни ханлтан өргв.

БАДМИН Занда

Видео