Бичкдүдт килмҗән тусхаҗ

Сегодня, 13:18 | Общество, Таңһчин зәңгс, Зіњг

Маңһдур, һаха сарин 27-д, сурһмҗлачин Өдр мана таңһчд болн цуг орн-нутгт темдглх. Яһад гихлә ода дошкольн сурһуль-эрдмин җил болҗана. Сурһмҗлачнр бичкдүдиг умшдг, бичдг дасхна, эднә билг-эрдминь делгрүдҗ теднд төрскнч сурһмҗ өгнә. Тегәд сурһмҗлачин болн бичкдүдиг асрдг бүрдәцин чинрнь цаг ирвәс өсәд йовна.
Эн сән өдрлә цуг сурһмҗлачнриг йөрәҗәнәвидн, эндр болхла Городовиковск балһсна «Солнышко» садын этносойлын багин сурһмҗлач Какинә Зинаидан тускар келхәр седҗәнәвидн. «Һурвн җилдән мана садт этносойлын баг көдлҗәнә, энүг чадмг кевәр Зинаида Игоревна һардҗана. Дамшлтта мергҗлт Элстин багшнрин колледж төгсәснә хөөн мана тал ирлә. Үүдәгч кевәр көдлҗ кесг керг-үүлдврт бичкдүдиг орлцулна.
Энүнә багин бичкдүд орс болн хальмг туульс меднә, наадһасин театрт орлцна, билг-эрдмән делгрүлҗ, хальмг болн орс ду дуулҗ, би биилнә. Масленица байрла эдн эк-эцкнртәһән орс целвг кенә, Цаһан Сарла хальмг улсин авъяс дасад, боорцг шарна», - гиҗ «Солнышко» садын һардач Лилия Велигурина келнә.
Этносойлын багд дамшлтта багш Увшин Нина хальмг кел дасхна. 50 җилдән сурһмҗлач болн багш болҗ ветеран көдлҗәнә. Бас Элстин багшнрин колледж төгсәһәд, сурһмҗлачар экләд көдллә, дәкәд Хальмг ик сурһульд сурад багш болв. Төрскн кел дасхлһна байн дамшлт хоршасн учрар бичкдүдт бат медрл өгнә, сурһмҗлачнрт чигн хальмг кел даслһна, терүг олн зүсн керг-үүлдврт олзлҗ өргҗүллһнә халхар дөңгән күргнә.
«Мини багд кесг келн-улсин бичкдүд сурна. Бичкн болһн эврә уңг-тохман, тууҗан медҗ талдан келн-улсин сойлыг чигн күндлҗ өстхә гиҗ шуннав, - гиҗ баһ наста мергҗлт-сурһмҗлач келнә.
Эврәннь көдлмштән Зинаида Игоревна кесг эв-арһ олзлна. Наадна йовудт бичкдүд кесг келн-улсин авъясла, тууль-тууҗла, урчнрин кегдлмүдлә таньлдна. Тернь бичкдүдт икәр таасгдна. Мана келн-улсин хувц-хунр хулдҗ автн, гиҗ эдн эк-эцкнрән ээрнә.
Бичкдүдин ээҗ-аавнь чигн ачнр-зеенртән кезәңкән, тууль тууҗан келҗ олна керг-үүлдврт орлцна, эк-эцкнр болхла келн-улсин хот-хол кедг авъясарн хувалцна. Тиигҗ Зинаида Игоревнан һардврт бичкдүд нег өрк-бүл мет ниитәһәр бәәнә.
Баһ наста мерҗлт Какинә Зинаидан үүдәгч үүлдвриг садын һардвр үүрмүднь дөңннә, кесг эв-арһс дасад, дамшлтынь хоршана. Дамшлтта сурһмҗлачнрин тоод района марһана нүүрләчнр Валерия Симбирцева болн Елена Касымова бас заагдв.
ТҮРВӘН Һуна

Видео