Малчнр үвлд эртәснь белдҗәнә

Сегодня, 11:08 | Общество, Таңһчин зәңгс, Зіњг, Селәнә эдл-аху

Удл уга малчнрин төлә үвлзлһнә дааврта кем эклхмн. Малан бүрн-бүтәр хадһлхин төлә таңһчин фермермүд малын теҗәлән эртәснь белднә. Эдн малын хаша-хаацан ясад, хоштан шимтә өвс зөөҗ орулад белдврин көдлмшән эклсн бәәнә. Өдгә цагт тосн-түләнә кемҗән баһрад, дааврта кемд белдлһнд бас харшлтан күргҗәнә.
Хальмгин селәнә эдл-ахун министерствин зәңглсәр, таңһчин эдл-ахуст асргдҗадг малд 388,9 миңһн тонн хот керглгдҗәх болна. Ода деерән 320 шаху миңһн тонн хот белдгдсн бәәнә.
Урдк җиллә дүңцүлхлә, малд керглгдҗәдг хотын кемҗән невчкн баһрв, гиҗ келх кергтә. Эн җил таңһчин селәнә эдл-ахун көдләчнр нег сай тонн буудя хураһад ончрсн билә.
Җил болһн малчнр олн зүсн көтлврмүдт орлцҗ, шаңһа дем авна, эннь кергән делгрүллһнд эрк биш туслдгнь лавта. Тер мет Хальмг Таңһчин Толһач Хаска Бату селәнә эдл-ахун көдләчнрин төрмүдт онц оньган тусхаҗ цуг халхар дөңннә. Үвлд икәр эс киитрхлә, намрин тәрәнәс ирх җилд элвг урһц авгдх гисн иткл бәәнә.
Таңһчин эдл-ахуст ут тоодан 1,8 сай мал асргдҗана, тер тоод 18 миңһн һар мөрн, 321,2 миңһн һар толһа бод мал, 1,47 сай шаху хөн мөн.
Җил болһн намрар һаза дулан болдг учрар мал өдртән теегт идшлҗәхәс шүрүн хот әрвлгднә гиҗ келх кергтә. Малын эмчнр болхла бас ирлцңгү керг-үүлдврмүд цаг-болзгтнь күцәнә.
Таңһчин райодт үвлзлһнд ямр кевәр белдҗәхәр шидр соньмсвидн. Тиигәд Көтчнрә района эдл-ахуст үвлзлһнд белдлһнә көдлмш төгсхдән өөрдҗ йовна. Ниднәк 20 миңһн тонн малын шүрүн хотас үлдв. 2026-2027 җилмүдин үвлзлһнд 14450 тонн хот, тер тоод 13 миңһн һар тонн өвсн болн 1280 тонн салм белдгдсн бәәнә. Крестьянск-фермерск эдл-ахус ут тоодан 8,5 миңһн һар тонн өвс болн 900 тонн салм белдсн болв.
Баһ Дөрвдә района муниципальн бүрдәцин АПК-н заллтын зәңглсәр, һаха сард ут тоодан32192 миңһн тонн шүрүн хот белдсмн. Урдк җилин үлдл хотыг тоод малд кергтә хот зун процентд белдгдв гиҗ келҗ болхмн. Района КФХ-ст 18301 тонн, ЛПХ-ст болхла 8350 тонн өвсн болн салм белн бәәнә.
Сарпан районд болхла 43 миңһн гектар аһу һазрт намрин буудя экләд тәргдв. Кеер мана орн-нутгт кеҗ һарһсн селәнә эдл-ахун шишлң техниклә зерглҗ беларусин трактормуд бас олзлгдҗана.
Үвлзлһнә дааврта кем эклхлә, район болһнд шишлң штаб бүрдәгднә. Селәнә эдл-ахун бүрдәцст, КФХ-ст болн ЛПХ-ст үвлзлһнә кем яһҗ давҗахнь бүрткгднә, тер мет района АПК-н делгрлтин әңгин мергҗлтнр СМО-син толһачнрла болдг харһлтст учрсн бачм төрмүдиг тер дарунь гилтә хаһлхар зүткнә. Яһдг-кегдг болв чигн таңһчин селәнә эдл-ахун көдләчнр үвлзлһнә дааврта кемән һару угаһар давулх күслтә бәәнә.

КАРСАНА Евгения

Видео