Олн-әмтнә җирһл ясрулх күслтәһәр

Суңһвр болсн өдрмүдт Элстд болн таңһчин райодар үүлдсн суңһврин әңгүдт дууһан өгсн суңһачнр ухан-тоолврарн хувалцв:

Әрәсән Федерацин сенатор, «Негдсн Әрәсә» партин таңһчин күцәгч комитетин һардач Байир Путеев Орн-нутгин Хүүвин депутатнрин суңһврин түрүн өдр иргнә зөвән күцәв. Элстин 4-ч тойгта сурһулин улд 27-ч тойгта суңһврин әңгд эн дууһан өгв.
«Хальмг Таңһч – мана төрскн һазр, Әрәсә болхла мана ик орн-нутг мөн. Сарул-сәәхн иргчин төлә күн болн даавртаһар болн шунмлттаһар көдлх зөвтә», – гиҗ Байир Эдуардович темдглв.
«Мана таңһчин олн улсла хамдан үүдәлтин, делгрлтин, мана таңһчин болн цуг орн-нутгин шинрлтин төлә дууһан өгчәнәв. Иргчдән мана орн-нутгт эвин бәәдл, сән-сәәхн җирһл батртха!» – гиҗ сенатор дурдв.

Суңһврин керг-үүлдврмүдт шаҗна элчнр орлцсинь бас заах кергтә. Элстин болн Хальмгин Архиепископ Юстиниан С.Радонежскийин нертә Орс келн-улсин гимназьд ирҗ дууһан өгв. Суңһврин әңгин гешүд орс чонҗин шаҗна үүлдәчиг келн-улсин хувцта тосв.

Өдгә цагт цергә шишлң керг-үүлдврин ветеранмуд олна бәәдл-җирһлд шунмһаһар орлцҗахинь онц темдглх кергтә. Элст балһсна Хургин депутат, СВО-н ветеран Чумуда Николай нефтин болн газин колледжд көдлсн суңһврин әңгд ирәд, дууһан өгв. Цергә шишлң керг-үүлдврин ветеран Ханан Дольган болхла төрскн Баһ Дөрвд селәндән суңһврин 115-ч тойгта әңгд чинртә кергт орлцв.

Тосхлтын, көлгн-күчнә болн хаалһин эдл-ахун таңһчин министрин үүл дааҗадг Шахана Андрей өрк-бүлтәһән суңһврин түрүн өдрлә иргнә даалһвран күцәв. Элстин 12-ч тойгта сурһульд бәәршлсн 33-ч тойгта суңһврин әңгд һардач дууһан өгв. Күн болһн суңһврт орлцх зөв эдлсн деерән төрскн таңһчин болн цуг орн-нутгин төлә дааврта болх зөвтә гиҗ эн темдглв.
«Эндр бидн өрк-бүләрн ирвидн, эннь кесг җилд батрсн мана авъяс мөн. Тиигҗ бидн дорас өсчәдг үйнрт сән үлгүр үзүлҗәнәвидн. Мана һазра улсин кесгнь бас күүкдтәһән нааран ирв. Тегәд орн-нутгин болн таңһчин делгрлтиг түргдүлх седклтә әмтнә то Орн-нутгин Хүүвд өсәд бәәхлә, мана җирһл темдгтәһәр ясрхнь лавта», – гиҗ Шахана Андрей тоолврарн хувалцв.

Дууһан өглһнә керг-үүлдврмүдин йовудт өвәрц йовдлмуд учрснь бас тодлгдв. Ик Буурл селәнд бембә өдрлә шинкн өркән өндәлһсн Нарн болн Саглр Настаевихн ЗАГС-т бәрмт цаасан авад, дарунь суңһврин әңгд ирәд, дууһан өгсмн.
Яшалта селәнд болхла района ветеранмудын «Надежда» хорин ханьд дуулдг улс ке-сәәхн хувцта, гарма татад, суңһврин әңгд ирв. Городовиковск района Ульяновское селәнд бәәдг йиртә медәт Бялкия Давришева җичнрән дахулҗ суңһврт орлцснь темдгтә болв. Тер мет насни дигт күрсн арвтнр түрүн болҗ дааврта кергт бас орлцв. Б.Б.Городовиковин нертә Хальмг ик сурһулин оютн Малзана Эльдар хальмг бүшмүдтә Элстин 48-ч тойгта суңһврин әңгд дууһан өгәд, белгән авад һарв.
Терүнәс нань тогтсн авъясар медәтә, эрмдгтә болн гертәсн һарч чаддго улс тал суңһврин комиссин гешүд бийснь одсинь бас заахмн.
Һаха сарин 20-д, суңһврин сүл өдр мана таңһчд олн үртә өрк-бүлмүдин сән Өдрлә ирлцв. Эн өдрлә һурвн болн энүнәс даву үртә бүлмүд суңһврт хамдан ирәд, шишлң белгүдәр цуһар темдглгдв.

Басң өдрлә Хальмгт үүлддг келн-улсин сойлын төвмүдин элчнр суңһврт бас орлцв. Таңһчин сойлын болн зуульчллһна министр, Әрәсән келн-улсин Ассамблейин Хальмг әңгин һардач Бембин Евгенийин келсәр, таңһчин иргн болһн чинртә кергт эрк биш орлцх зөвтә. Корей улсин нарт-делкән «Косарен» ниицәнә гешүн Улана Наталья Тен Наталья хойр хамдан суңһврт ирв. Эдн корей улсин ке-сәәхн хувцан өмсәд, суңһврин әңгин гешүдиг байрлулв. Күүкд улсин темдглсәр, мана орн-нутг, нег үлү Хальмг Таңһч өсәд-өргҗәд, улм делгрәд, манад бәәдг олн келн-улс ниитәһәр бәәхин төлә эдн дууһан өгсән медүлв.
ОЛЬДАН Цаһан

«Темәнә арл» гидг эдл-ахуд көдлҗәдг Очргоряевихнә өрк-бүл Элстин 13-ч тойгта суңһврин әңгд темәһән унад ирв. Келн-улсин кезәңк янзта хувцан өмсәд, өвкнрин авъясан, хальмг сойлан күндлҗ терүг хөөтк үйнрт күргҗ седклән медүлв, гиҗ ТАСС-ин соңсхврт келгдв.
«Темәнә арл» – хальмг авъясин, сойлын болн зуульчллһна төв болна. Нүүдл улсин сойлд болн авъяст тохрсн мал өсклһнә кергән хальмг улс кесг зун җилин эргцд күцәҗәнә. Эдл-ахун толһач Очрһәрән Леонид кесг җилдән ах үкрч болҗ көдлҗәлә, түрүн темәһән болхла 2001 җиләс авн асрҗана. «Яһад бидн темәһән унад, суңһврин әңгд ирвидн гихлә, энтн мана өвкнрин бәрҗәсн мал, мана улсин кезәңк авъясла залһлдата мөн. Келн-улсин заңшалан хадһлҗ бидн Хальмг Таңһчин болн Әрәсән сәәхн иргчин төлә дууһан өгчәнәвидн», – гиҗ Леонид Борисович седкүлчнрт келв.
ҖААХАН Бадм

Новости по теме

• 

  Ик чинртә йовдл
  Ик чинртә йовдл
• 

  Таңһчин цецгәрлтин төлә
  Таңһчин цецгәрлтин төлә
• 

  Суңһвр дигтә-даратаһар давв
  Суңһвр дигтә-даратаһар давв
• 

  Олн-әмтнә җирһл ясрулх күслтәһәр
  Олн-әмтнә җирһл ясрулх күслтәһәр