Билгтә оютнриг йөрәв

Сегодня, 11:07 | Общество, Таңһчин зәңгс, Зіњг, Сурєуль-эрдм

Хальмг Таңһчин Толһач Хаска Бату болн таңһчин залвр номтнрин үүлдвриг үнлҗ, цуг халхин дөңгән күргҗәнә. Одахн таңһчин Толһачин һардврин ахлачин дарук Шипин Екатерина болн сурһуль-эрдмин болн номин министр Александр Ким ик сурһулин оютнриг ик күцәмҗләнь йөрәхәр ирв.
Яһад гихлә одахн 47 оютн Әрәсән Президентин болн РФ-н Залврин мөрәсәр ачлгдв. Эннь цааранднь чигн йилһән сәәнәр сурад, номин көдлмшән улм гүүдүлх неквр тәвҗәнә. Хальмг ик сурһульд болхла номин көдлмшән кесг халхар күцәх арһ бәәнә, өдгә цагин кергслиг оютнр олзлҗ чадҗана гиҗ күндтә гиичнр темдглв.
Мөрә авсн оютнр эврә үүлдврин тускар тодрхаһар келәд, җил ирвәс цуг таал ясрад йовна гиҗ онц темдглҗ, ик сурһулин һардврт ханлтан өргв.
Гуманитарн номар таһчин һоллгч вузин 5 оютн дииләч болв, орн-нутгт болхла эдн 4-ч орм эзлв. Багшин болн сурһуль-эрдмин номар Хальмг ик сурһульд 9 дииләч заагдв.
Хальмг ик сурһулин 47 оютн өөдән мөрә авснь энтн урднь үзгдәд уга үзмҗ болҗана. Тернь оютнрин, номин һардачнрин болн багшнрин цуцрлтан уга көдлмшин аш болҗана. Тиигҗ эртәс номин шинҗллһнә номин көдлмш күцәҗ цааранднь номтын үүлдврән өргҗүлхин төлә бас цуг таал бәәнә. Нег үлү билгтә оютнриг йилһҗ авлһна көдлмш Хальмг ик сурһульд сәәнәр бүрдәгдсмн, тернь номин кесг шин илдклин төлә бат ул-сүүрнь болхнь чигн лавта.
ТҮРВӘН Һуна

Видео