Шинрүллһнә эв-арһ олзлҗана

Сегодня, 10:54 | Общество, Таңһчин зәңгс, Зіњг, Сурєуль-эрдм

Хальмг ик сурһульд шин эв-арһс олзллһнд һол оньган өгнә. Эндрк өдрин девшлтиг түргдүлхин төлә Хальмг ик сурһульд Адыгейин шаңһа ик сурһулин, Краснодарин эмнлһнә болн Москван тосхлтын ик сурһульмудын мергҗлтнр-шинҗләчнр ирҗ, хойр өдрин эргцд бәәрн номтнрла олн төрәр өргн күүндвр кев.
Хальмг номтнр теднә сүв-селвгиг өөдәнәр үнлв. Тер төрәр тооһин заллтын һардач Андрей Онтаевин келсн үг онц чинртә болв. Төсв белдлһнә кемд үүрмг кергүдт бас оньган өгх кергтә, гиҗ күндтә шинҗләчнр селвглв, терүг бидн дарук төсв белдлһнд эрк биш олзлхвидн. Төсвиг бидн үкр сард харсх зөвтәвидн, тиигхд талдан вузас ирсн мана үүрмүд дөңгән күргәд бәәх, гиҗ эн темдглв.
Ик сурһульд абитуриентнриг авлһна, көдлмшәр теткдг бүрдәцслә нөкцәд, сурһуль-эрдмин чинриг үлмә угаһар үнллһнә төрмүдиг Хальмг ик сурһулин һардачин селвгч Натра Байр күцәх болв. Урднь Байр Александровна һардачин дарукар көдлҗәсмн. Ода тер үүлд Ороса Санан батлгдв.
Тер мет Хальмг ик сурһулин ханьд агробиотехнологин шин күрәлң бүрдәгдв. Аграрн дацң, химийин, биологийин болн агроинженерин әңгүд түүнә ханьд орв. Энүг нарт-делкән нөкцлт күцәдг һардачин дарук Конин Оксана толһалв. Тиим кевәр шин күрәлң таңһчин АПК-н халхар номин төв болх зөвтә, эн кергин ашнь күцәмҗтә болх зөвтә гиҗ Хальмг ик сурһулин һардач Салан Бадм заав. Биологийин болн экологин тиңкм шин күрәлңгин ханьд орв.
Арвн җилдән эсвин болн физикин дацңгиг Сумьяна Елена күцәмҗтәһәр һардҗ йовла. Ода Елена Владимировна зәңгллһнә технологин болн тооһин тиңкмин һардач болхмн. Тиигчкәд номт өөрхн иргчд Хальмг ик сурһулин тооһин шин төв һардх болв.
Тер мет эн дацңд «Астрофизика» нертә номин төв секгдҗәнә. Энд физикин эрдмәр магистрантнриг болн астрофизикәр аспирантнриг белдх. Астрофизикин төрәр Хальмг ик сурһульд профессор Бадм Михаляевин һардврт гүн шинҗллтс кегдҗәнә, түүнә тускар цуг орн-нутгт меднә, хальмг номтнр ик компаньсла нөкцлтин бооца батлсн бәәнә. Әрәсән кесг вузмудла болн номин бүрдәцслә хамцу шинҗллт күцәҗ, шин эв-арһс үүдәҗәнә, физикин салврар номин өргн көдлмш күцәҗәнә.
Хальмг филологин болн дорд үзгин төрәр бәәдг күрәлңгин номтнр түрг-моңһл делкән төв тогталһнд орлцҗана.
Тиигәд Хальмг ик сурһуль шинрлтин хаалһд орв, делкән кемҗәнд бәрсн күцәмҗән өргҗүлҗ, Хальмг Таңһчин номин нер һарһх төр тәвгдҗәнә, тегәд сансн санань күцәд, цаһан хаалһнь күцәмҗтә болтха!

ҖААХАН Бадм

Видео