Таңһчин һардврин көдлмш өөдәнәр үнлгдв

Сегодня, 15:07 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Эн долан хонгт мана таңһчд Әрәсән тосхлтын болн гер-бүүрин эдл-ахун министр Ирек Файзуллин керг-төрин халхар ирв. Тодлхас, 2021 җилин үвләр Ирек Энварович Элстд ирәд, дәәнә ветеранмудын госпиталин болн бичкдүдин поликлиникин тосхлтыг бүртксн билә. Эн ирлһндән болхла секгдсн госпиталин герин болн талдан тосхлтсиг хәләҗ үнлв.

Дәәнә ветеранмудын госпитальд Хальмгин залврин Ахлачин дарук Өлзәтин Марина, эрүл-менд харлһна министрин үүл дааҗадг Мушаран Арслң болн бүрдәцин көдләчнр күндтә гиичиг тосч авв. Марина Петровнан цәәлһсәр, өдгә цагт госпитальд дәәнд болн цергә үүлдврмүдт орлцсн ветеранмуд эмнлһ авч эрүл-мендин бәәдлән батрулна. Өдр болһн зун шаху күн госпиталин эмчнрин хәләврт орна, эднд олн зүсн туслмҗ күргнә. Тер мет эмнлһнә чинринь өөдлүлхәр энд шишлң кергсл углҗ тәвгдв. Әрәсән министр бүрдәцин сарул-сәәхн хорасар йовад, тенд көдлҗәдг мергҗлтнрлә күүндв. Хальмг Таңһчин социальн-экономикин делгрлтин шишлң көтлвр күцәлһнә йовудт эн госпиталь тосхгдснь темдглх кергтә. Харһлтын ашар таңһчин йосна элчнр госпитальд немр әңг тосхлһна төр босхв.
Дарунь күндтә гиич балһсна доладгч микрорайонд тосхгдҗадг Кириллин болн Мефодийин нертә чонҗин өөр болсн байрин нәәрт орлцв. Тенд Элстин чонҗд Иисус Бурхн бууҗ ирснә 80 җилин өөнд нерәдсн керг-үүлдвр болв. Терүнә йовудт Хальмг Таңһчин тосхлтын халхар олн җилдән үнн-чик седклтәһәр көдлсн мергҗлтнриг Ирек Файзуллин шаңһа ачлврмудар темдглв. Тедн дунд Домбринә Мергн, Мацга Раиса, Хаалһин Амр-Санан, Саган Вячеслав, Өлзәтин Николай болн талдан улс заагдв.
–Мана орн-нутгт тосхлтын сән Өдр батлгдад, эн җил дигтә 70 җил болв. Ончта өөнлә цуг таанриг йөрәҗәнәв, цааранднь чигн седклән тәвҗ көдләд, төрскн һазрин делгрлтд ач-тусан күргҗ йовтн, – гиҗ Ирек Энварович цугтаһинь йөрәв.
Тер өдр Әрәсән министр таңһчин Толһач Хаска Батула харһҗ күүндв. Хальмгт цуг төсвс шаңһа төвин орлцлһтаһар күцәгдҗәнә, гиҗ темдглх кергтә. Сүл җилмүдт нег сай шаху дөрвлҗн метр аһута гермүд тосхгдсиг үнлхмн. Шаңһа көтлврмүдин йовудт орн-нутгин, нег үлү мана таңһчин балһсд-селәдт сән кец-таал тогтагдҗана. Элстд кесг паркс болн амрлһна ормс бүрдәгдв. Орн-нутгин иргнмүд эн төсвсиг дөңнәд, дууһан өгснә ашт Әрәсән Президент Владимир Путин ирлцңгү көтлврмүд 2030 җил күртл күцәгдхиг темдглв.
–2019 җиләс авн болхла мана таңһчд эрүл-менд харлһна, сурһуль-эрдмин, сойлын болн талдан 65 бүрдәц эдлврт орулгдв. Дәәнә ветеранмудын госпиталин тосхлт нилчән күргсн Ирек Энваровичд онц ханлтан өргҗәнәв, – гиҗ Бату Сергеевич келсн болдг.
Ирек Файзуллинә темдглсәр болхла, мана таңһчд тосхлтын халхар шаңһа цуг төсвс болн көтлврмүд сән йовудтаһар күцәгдснь ил медгдв. Тосхлтс цаг-болзгтан эдлврт орҗахнь бас байрта йовдл мөн. Терүнәс нань Ирек Энварович одахн таңһчин һурвн төсв Цугәрәсән марһанд йилһрәд, онц кевәр темдглгдснә тускар келв. Хальмгин Толһач Хаска Батуд болн энүнлә хамдан көдлҗәдг улст бүлән үгән нерәдҗ, күцәмҗ дурдв.
Дарук өдртнь күндтә гиич Элст балһсна 9 микрорайонд удандан тосхгдсн 50-ч тойгта гер болн дорд үзгт бәәдг «Буйслһн болн босхмҗ» нертә бумб хәләв.Санлын бумбин эргндк һазртнь сән таал тогтагдхмн.
Әрәсән тосхлтын болн гер-бүүрин эдл-ахун министр Ирек Файзуллин Элст балһсна төвд шинрүлгдсн ормс бас хәләв. Хальмг Таңһчин залврин Ахлач Босхмҗин Гиләнлә хамдан эдн уульнцсар эргндк бәәдлиг һәәхв. А.С.Пушкинә нертә сквер, Көглтин Даван бумб, Алтн Босх, Баатрмудын Аллей, Виктор Цойин бумб, көгҗмин тагт, «Җаңһр» дуулврин баатрмудын зургуд гиич соньмсч хәләв. Нидн шар шаҗна нарт-делкән ик хургт белдәд, ик кемҗәтә көдлмш кегдснә тускар Элст балһсна һадврин толһачин дарук Хаска Сергей цәәлһҗ келв.
Тер өдр Ирек Файзуллин Элстин чонҗд болсн Иисус Бурхн бууҗ ирснә 80 җилин өөнин керг-үүлдврмүдт бас орлцснь темдгтә болв.
– Хальмгт тосхлтын халхар көдлмш сән йовудтаһар күцәгдҗәнә. 2026 җилд «Балһснд сән кец-таал тогталһн» төсв күцәлһнә йовудт нәәмн бәәрнә таалнь ясгдв. Хальмгин Толһач Хаска Батун болн таңһчин һардврин көдлмшиг өөдәнәр үнлх кергтә, – гиҗ Ирек Энварович седкүлчнрлә күүндсн саамд товчлҗ келв.

КАРСАНА Евгения

Видео