«Заясн бичг»

Сегодня, 12:41 | Общество, Таңһчин зәңгс, Зіњг

Хальмг Таңһчд һаха сарин 5-д хальмг келнә болн келн-улсин бичлтин Өдр темдглнә.
Шидр Н.Пальмовин нертә Келн-улсин музейд эн өдрлә ирлцүлҗ, өөрд-моңһл каллиграфин нарт-делкән VII һәәхүл секгдв. «Заясн бичг» гидг нертә эн һәәхүл доладгч кемдән давулгдв.
Хальмг келн-улсин бичлтин байрт нерәдҗ кегддг һәәхүл эн җил Әрәсән улсин келнә Өдрт нерәдгдв. Дәкәд болхла, эн байрин һәәхүл Әрәсән улсин ниицлтин җилд болҗахарн онц чинр зүүв. Һәәхүлин секлһнд орлцхар олн баһчуд ирснь сән йовдл болв. Келн-улсин тууҗ өвкнрин урн-үгин болн сойлын зөөр күүкд-көвүдин төлә соньн болҗахиг эннь медүлҗәнә.
Нарт-делкән һәәхүлд Хальмг Таңһчин билг-эрдмин ачта үүлдәч Татьяна Милованован театрин артистнр «Тод бичг» гидг наад үзүлснь ке болв. Кезәңк көгҗм, хальмг сәәхләсин эвтә өвәрц хувцн - цуг эн тоот улсин өвәрц соньн сойл үзүлв.
Келн-улсин музейин һардач Мучан Ирина һәәхүлиг нүр үгәр секв. Хальмг улсин уул цага үндсни бичгт нерәдсн нарт-делкән VII һәәхүл мана музейд болҗахнь ик байрта йовдл, – гиҗ Ирина Ивановна темдглв. – Эн җил мана музей 105 җилин өөнән темдглҗәнә. Музейин өөнин керг-үүлдврмүд дунд эн һәәхүл бас зөвтә орман эзлҗәнә. Хальмгин, Моңһлын, Китдин Шинҗәнә, Санкт-Петербург балһсна зурачнр болн урн бичлтин эрдмчнр энд цуглрв.
Хальмг улсин болн моңһл келтнрин сойлын җирһлд эн һәәхүл зөвтә орман олсна тускар таңһчин сойлын болн зуульчллһна министр, Әрәсән келн-улсин Ассамблейин әңгин һардач Бембин Евгений сойлын халхар үүдсн эн төсв ода авъяс болҗ мана җирһлд батрҗана гив. Һаха сарин 5-д болдг хальмг келнә болн бичглтин болн һаха сарин 8-д Әрәсән улсин келнә Өдрмүдлә ирлцҗ эн һәәхүл бүрдәгдҗәхинь онц темдглв.
Эн һәәхүлд Моңһлын, Китдин Шинҗәнә, Бурятин, Хальмгин, Санкт-Петербург балһсна бичлтин эрдмчнрин үүдәврмүд үзҗ болхмн билә. Һәәхүл хойр сардан көдлхмн.
Бембин Евгенийин келсәр, Хальмг келнә Өдр угтад, төрскн келнә сурһулин дегтрмүд шинәс барллһнд дөң болтн гисн дуудврта керг-үүлдвр күцәлһнд олн күн орлцсмн. Өсч йовдг күүкд-көвүдт сурһульднь туслх тоотыг барллһнд туслсн төрскнч седклтә улст Әрәсән Ассамблейин әңгин Ханлтын бичгүд Целинн района толһач Увшан Басңд, Элстин политехническ колледжин һардач Васькинә Галинад болн нань чигн улст бәрүлҗ өгв.
Хальмг келнә Өдрлә болн нарт-делкән һәәхүл секлһнд цуглрсн улсиг Хальмг ик сурһулин күрәлңгин һардач Лиҗин Мингиян, Элстин болн Хальмгин епархин сегләтр Алексий Грищенко, чечен улсин ниицәнә нерн деерәс Умар Эльжуркаев, номт, билг-эрдмин халхин доктор Батыра Светлана, Хальмг Таңһчин ачта зурач Саңһҗин Делгр йөрәҗ, бүлән үгмүд келв.
Хальмг Таңһчин билг-эрдмин ачта үүлдәч Татьяна Милованован келсәр, һәәхүл нарт-делкән чинр зүүҗәх болв. Шаҗна үүлдәчнр, номтнр, бичәчнр, зурачнр, багшнр «Тод үзгиг» олнд медүлҗ йовна, баһчуд хувцндан тод үзгүд орулҗахнь чигн ода йирин темдг болҗана. Элст балһсна уульнцст тод үзг зөвтә орм эзлҗ йовхинь ода кен эс үзнә. Корей келн-улсин ниицәнә нерн деерәс кеңкргүдән цокч эврә улсин айсан татҗ, таңһчд бәәдг корейцнр билгән үзүлснь йир соньн болв. Хөөткән сансн цецн, гидг үлгүрин чинриг «Заясн бичг» гидг һәәхүл медүлҗәнә.
Һәәхүлин йовудт әмтн ирсн гиичнрлә таньлдад, урн бичгин эрдмчнрин кичәлмүдт орлцҗ чадв.
ХӨӨЧИН Галина

Видео