Хальмгт спорт өргнәр делгрҗәхиг темдглв

Сегодня, 13:28 | Общество, Таңһчин зәңгс, Зіњг

Шидр мана таңһчур гиигн атлетикин Цугәрәсән федерацин (ВФЛА) элч, нертә футболист Алексей Смертин болн ВФЛА-н вице-президент, Сиднейд болсн Олимпийск наадын дииләч Ирина Привалова ирсн билә. Эн җил Әрәсән 22 балһснд, тер тоод Элстд, гүүлһнә төлә өдгә цага төв тосхгдҗ эдлврт орулгдхмн. Күндтә гиичнр болн Хальмг Таңһчин Толһач Хаска Бату хамдан хотл балһсна 5-ч микрорайонд босхгдҗадг шин тосхлтыг хәләһәд, спортар соньмсдг улсиг дөңнлһнә тускар күүндв.
Спортын төвд гиигн атлетик делгрүлхин төлә цуг таал тогтагдхмн, төвин һаза шишлң девскртә хаалһс бас тосхгдхмн. Эн төвд спортсменмүдәс нань талдан улс бас хамдан гүүҗ, сул цаган тустаһар давулҗ чадхмн. Эн төв һаха сард секгдхмн гиҗ зуралгдҗана.
Алексей Смертин «Уралан» командын ханьд наадсан тодлад, Хальмг Таңһч энүнә седкл авлсинь темдглв. Хальмгт наадсна хөөн энүг Әрәсән хамцу командын ханьд орс билә. Хөөннь Алексей Смертин Әрәсән командын капитан болсмн. «Өрүн эрт босад, балһсна уульнцсар невчкн зуур гүүх саам учрв. Хөрн нәәмн җил давсн бийнь әмтн намаг таняд, байртаһар тосв», - гиҗ Алексей Геннадьевич ханмҗта бәәхән медүлв. Ода эн «Бег со смыслом» гидг төсв күцәлһнә халхиг бүрткҗ һардҗана. Цугәрәсән гиигн атлетикин Федерацин элч болад, эн регионмудт тосхгдҗадг төвмүдиг одҗ хәләҗ, сүв-селвгәрн хувалцна.
Элстд төвин тосхлт дигтә-даратаһар күцәгдҗәнә, һаңначнр төмр турвас залһад, һол бахнс углҗ тәвҗәнә. Төвиг дарунь цуглулҗ болхмн, тегәд тосхачнр удл уга терүг эдлврт орулхар зуралҗана. Хальмг Таңһчин Толһач Хаска Батун келсәр, спортар соньмсдг улсин төлә сән таал тогталһнд ик оньг тусхагдҗана. Эн төв секгдснә хөөн Ленинә нертә уульнц күртл шишлң хаалһ тосхх зура бәәнә. Эн төв Хальмг ик сурһулин өөр-шидр бәәхнь баһчудыг спортд орлцулхд туслх гиҗ Бату Сергеевич темдглв.
Урҗ өдр асхар хотл балһсна төв талвңд «Бег со смыслом» гидг керг-үүлдвр болв. Элстихн Хальмг Таңһчин Толһач Хаска Батула нертә футболист Алексей Смертинлә болн олимпийск чемпионк Ирина Приваловала хамдан тавн дуунад гүүв. Алексей Смертинә келсәр, футбол нааддг цагтан эн гүүһәд, цогц-махмудан батрулдг бәәсмн, ода болхла гиигн атлетик энүнә җирһлин һол керг болна. Мана таңһчур түрүн болҗ ирсн Ирина Привалован үгәр болхла, Хальмг Таңһч Цугәрәсән гиигн атлетикин Федерацин төсвд орлцснь орта болв, юңгад гихлә энд спорт өргнәр делгрҗәнә гив. Хальмг Таңһчин Толһач Хаска Бату күндтә гиичнрт ханлтан өргәд, шин төвд ик-бичкн уга цаган тустаһар давулхиг темдглв.
Өцклдүр Алексей Смертин уйн наста спортсменмүдлә дамшлтарн хувалцад, футбол наадв.

БАТАН Сәәхлә

Видео