Бадм цецгин наадм

Сегодня, 12:54 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Давсн амрлһна өдрмүдт Лаганя районд бадм цецгин наадм болв. Җил ирвәс әрүн чинртә бадм цецг һәәххәр Әрәсән регионмудас ирдг зуульчнрин то өсәд йовна. Байрин керг-үүлдврмүд бембә өдрлә өрүн эрт Җалһа селәнд болн Лагань балһснд болв. Галсан хурлд ирсн улсин төлә һәәхүл болн экскурсь бүрдәгдсн билә. Терүнәс нань гиичнр оңһцар йовад, усн дотр болсн экскурсьт орлцв.
Бембә өдр йир халун болв, тегәд асхн долан часла серүн орсн кемд наадм секгдв. Керг-үүлдвриг «Бадм цецгин һарлһн» нертә театрин баахн режиссер Манҗин Даниилын наадар эклв. Хальмг Таңһчин улсин артистк Очкан Анна дуулад байриг секв.
«Көк теңгсин айсмуд» нертә паркд олн-әмтн цуглрв. Хальмг Таңһчин Толһач Хаска Бату тәәз деер һарад, ирсн улсиг йөрәҗ үг келв:
«Эн җил бадм цецгин наадм тавдгч кемдән давулгдҗана. Энүнә тускар Әрәсәд бәәтхә талдан нутгудт бас соньмсад, иигәрән олн зуульчнр ирдг болв. Мана таңһчин район болһн эврә өвәрцтә болдг. Тегәд Хальмгин иргн болсндан бахтх кергтә. Терүнәс нань эн җил Лагань балһсн 155 җилин ончта өөнән темдглҗәнә. Эн йовдлла нег һазра улсан бас әрүн седкләсн йөрәҗәнәв».
Тер мет бадм цецгин наадмин йовудт «Lagan Sup Challenge», волейболар болн футболар марһас болв. Сапсерфингәр болсн марһан хамгин соньн йовдл болв. Марһан залу болн күүкд улсин дунд давулгдв. Волейболар болсн марһанд 18 баг орлцв. Хальмг Таңһчин Толһачин һардврин баг диилвр бәрв. Футболын марһанд болхла Лагань балһсна хамцу баг ончрсн болдг. Очра Александр, Омбадыка Бадня, Хардян Санл болн Сергән Сергей хамгин сән футболистнрин тоод орад, шишлң белгүдәр ачлгдв.
Нег һазра арһлачнр, эрдмчнр эврәннь кегдлмүдән хулдв. Тер мет домбр цокдг болн хальмг би дасхдг эрдмчнрин кичәлмүд бүрдәгдв.
Хальмгудын төлә бадм цецг әрүн чинртә болна. Наадмд олн зуульчнр ирәд, күн болһн мана йиртмҗин ке-сәәхн тоотыг үзҗ, цаган сергмҗтәһәр давулснь темдгтә болв.
Байрин концертд Лаганя района сойлын коллективс, «Дольган» ансамбль болн таңһчин нертә артистнр орлцад, билг-эрдмәрн байрлулв.

КАРСАНА Евгения

Видео