Икбуурлахн элвг урһц хураҗ авв

Сегодня, 13:35 | Общество, Таңһчин зәңгс, Зіњг, Селәнә эдл-аху

Эн җил Ик Буурла района тәрәчнр 2019 җилд бәрсн күцәмҗән давулҗ элвг урһц хураҗ авв. Района селәнә эдл-ахун делгрлтин заллтын һардач Цеднә Ивана келсәр, эн җил энд 150 миңһн тонн буудя цокч авхар зуралҗана. Эн күцәмҗ бәрхнь лавта, юңгад гихлә ода деерән 140 миңһн тонн буудя хураҗ авгдсн бәәнә.
- Эн җил хаврар хур-чиг орад, намрин цаһан буудя болн ичмән сәәнәр урһв. Эннь тәрәчнр көдлмшән дигтә-даратаһар болн ик даавртаһар күцәснә аш болв. Олн җилдән селәнә эдл-ахуд көдлҗәдг ах үйин улс баһчудла байн дамшлтарн хувалцҗ, дөң-нөкд болна. Района эдл-ахун халхд көдлҗәдг арһлачнр аавнр-эцкнриннь керг цааранднь давулҗ йовхнь темдгтә. Онц арһлачнр Бадмин Александр, Бадмин Ноһала, Елена Буцкая нүүрт һарад, нег гектар тәрәнә һазрас дундлад 50 центнер буудя хураҗ авв. Таңһчин селәнә эдл-ахун министерств фермермүдиг дөңнәд, өдгә цага техник болн нань талдан кергсл хулдҗ авхд дем күргнә. Мана фермермүд шаңһа көтлврмүдт орлцҗ, эдл-ахун үүлдвр ясрулхар шунна. Нег үлү үүлдврән эклҗәдг фермермүдт онц оньг өггднә. Ода тәрәчнр цуглулсн урһцан олзта-орутаһар хулдҗ авх күслтә бәәнә. Харм төрхд, буудян үн ода кимдрв, тегәд арһлачнр арһан хәәҗәнә, - гиҗ Иван Васильевич цәәлһв.
Бидн Приманыч селәнд бәәдг буудя хадһлдг бүрдәцд ирәд, бәәрн тәрәчнр хураҗ авсн буудян эд-бод келһнә йовудыг хәләһәд, көдләчнрлә күүндвидн. Мадниг ирсн кемд Магомед-Салам Магомедов буудя ачҗ авхар ирв. Эн селәнд өсәд-боссн баахн залу сар хооран өркән өндәлһв, малд көдлҗәдг эцкдән нөкд болҗана. Эн селәнд бәәдг олн келн-улсин элчнр ниитә бәәҗ, нег-негндән нөкд болна. Эн КамАЗ тамһта машиһәр ирәд, буудя ачҗ авв. Приманычск СМО-н толһач Хулхачин Баатрин цәәлһсәр, селәнд бәәдг 395 күүнә һазрин хүв олзлгдна, эдн нег хүв һазрин төлә эднд һурвн тонн буудя өгнә. Селәнд арвн хойр арһлач һазр нәәмәдлҗ авад, тәрә тәрнә. Цокч авсн 500 тонн буудя ода энд хадһлгдҗана. Мергнә Эрднь болн Бадмин Владимир (зургт) буудя ачхин төлә шишлң кергсл олзлна. Эдн селәнә эдл-ахуд олн җилдән көдлҗәнә, тегәд кергсл эвдрхлә бийснь ясна. Санчра Екатерина болхла буудя ачсн маши чиңнүрднә. Екатерина Ангриковна җолач болһн кедү буудя ачсинь тоод авна.
Цеднә Ивана келсәр, ода урһц хуралһна дааврта кемлә дегц малд үвлин хот белдлһнә керг бас эклв. Хаврар хур сәәнәр орад, теегт өвсн нигтәр урһв. Сүл кесн то-дигәр, районд 40 миңһн толһа бод мал болн 138 миңһн хөн асргдна. Үвлин кемд малд баһ гиснь 50 миңһн тонн шүрүн хот болн 15 миңһн тонн буудя белдх кергтә. Давсн җилд белдсн хотын үлдл тоод авхла, ода чигн района малчнр үвлд сәәнәр белдснь илдкгдв. Фермермүд теегт урһҗадг өвс хадад, малд хот белдҗәнә, тегәд үвлзлһнә кем һару угаһар давх гисн бат ицл бәәнә, гиҗ Иван Васильевич ухан-тоолврарн хувалцв.

ДООҖАН Наталья

Видео