Иньгллтин наадм

Сегодня, 17:02 | Общество, Таңһчин зәңгс, Зіњг

Әрәсән улсин ниицлтин җилд нерәдгдсн керг-үүлдврмүд таңһчин район болһнд давулгдҗ, хальмг һазрт олн келн-улс ниитә бәәхиг герчлҗәнә. Шидр Хальмг Таңһчин күүкд улсин олна ниицәнә седвәрәр болсн «Ниицлтд мана күчн» гидг наадмд Городовиковск, Баһ Дөрвдә, Октябрьск, Сарпан, Көтчнрә болн Целинн райодын элчнр орлцад, олн келн-улсин сойлла таньлдулв. Садовое селәнә сойлын Герт болсн керг-үүлдврт хальмг, орс, корей, түрг болн нань чигн талдан келн-улсин хувцта өмссн улсиг үзҗ болхмн билә.
Сарпан района муниципальн бүрдәцин толһач Манҗин Басң наадмд орлцачнриг йөрәһәд, мана таңһчд бәәдг олн келн-улс ниитәһәр, кен-негнәннь сойл, авъяс, тууҗ күндлҗ, байр-зовлңган хувалцҗ бәәдгнь мана күчн болҗана гиҗ темдглв. Сарпан районд хальмг, орс, даргин келн-улс төрскн һазр-уснаннь делгрлтд ач-тусан күргҗ, сойлан делгрүлҗ, дорас өсч йовдг бичкдүдт өвкнриннь авъяс дасхна гиҗ дааврта һардач келв. Хальмг Таңһчин күүкд улсин ниицәнә ахлач Эсклянә Данара гиичнрән сәәнәр тосад, наадмиг өөдән кемҗәнд бүрдәсн Сарпан района һардврт ханлтан өргв. Наадмд орлцачнр нег-негнәннь үүлдврәр соньмсч, һарин кегдлмүдин һәәхүл оньган өгч хәләв. Таңһчин күүкд улсин олна ниицәнә гешүд билгтә, һартан өөтә, седвәртә улс болҗахиг эн һәәхүл медүлв.
«Ахыска», «Россияночка» болн «Солң» ансамбльмудт орлцачнр түрг, корей, орс, хальмг ду-би үзүлв. Дали Каадзе Баһ Дөрвдәс грузин келәр «Миллион алых роз» гидг ду дуулснь цугтаднь таасгдв, олн үртә эк Даштан Галина Троицкое селәнәс болн Октябрьск районас күүкд улсин ниицәнә гешүн Надежда Антонюк Төрскнә, иньгллтин туск шүлгүд айслулҗ умшв, Городовиковск районас медәт Бадминә Елизавета корей улсин би биилв. Көтчнрә района күүкд улсин ниицән болхла олн келн-улсин авъясмудын туск наад үзүлв. Земфира Тен болн Людмила Ким ачнр-зеенртәһән корей улсин авъяс үзүлҗ, нилх һарсн өдрлә күцәдг авъясла таньлдулв. Сарпан района күүкд улсин ниицәнә гешүд бас билг-эрдмән үзүләд, гиичнрән ду-бииһәрн байрлулв. Олн келн-улсин сойлла таньлдулсн концерт иньгллтин наадм болҗ ик бахмҗ үүдәв.
- Әрәсән улсин ниицлтин җилд нерәдгдсн наадм байрта-бахмҗта кевәр давв. Сарпан района күүкд улсин ниицән цугинь өөдән кемҗәнд бүрдәсиг темдглх кергтә. Района һардвр болн сойлын көдләчнр эднд дөң-нөкд болад, кесг райодас ирсн гиичнрән сәәнәр тосч авв. Района толһач Манҗин Басң Городовиковск, Баһ Дөрвдә, Октябрьск, Сарпан, Көтчнрә болн Целинн райодын күүкд улсин ниицәсин ахлачнрт ханлтан өргәд, күн болһнд цецгүд белглв. Бидн болхла «Ниицлтд мана күчн» гидг наадмд орлцачнрт Хальмг Таңһчин күүкд улсин ниицәнә Ханлтын бичгүд бәрүлҗ өгвидн. Селәнә сойлын Герин өөр тәвгдсн ишкә герт района әмтн цергә шишлң керг-үүлдврт орлцҗадг нег һазра улст ямаран дөң күргҗәхиг үзҗ болхмн билә. Селәнә күүкд улс олн зүсн хот-хол белдәд, дулан хувц, бу-селм бүркдг гөлм болн нань чигн тоот цуглулдгиг хәләһәд, буйнч седклин кергт демән күргвидн, - гиҗ таңһчин күүкд улсин ниицәнә ахлач Эсклянә Данара келв.
Иим наадм намртан Лаганя районд бас болхмн, терүнд наадк райодын күүкд улсин ниицәс орлцхмн. Дәкәд Баһ Дөрвдә районд болх керг-үүлдврт мана таңһчла хам-хоша бәәдг Аһшин болн Әәдрхнә мүҗсин элчнр ирхмн гиҗ зуралгдҗана.

ДООҖАН Наталья

Видео