Седвәртә баһчуд мергҗлтән өөдлүлҗәнә

Сегодня, 11:47 | Общество, Таңһчин зәңгс, Зіњг

«Негдсн Әрәсә» парть седвәртә, олна бәәдл-җирһлд шунмһаһар орлцдг баһчудын төлә «ПолитЗавод» гидг сурһулин төсв күцәҗәнә. Терүнд орлцачнр иргчдән партин, муниципальн болн шаңһа йосна бүрдәцст көдлхмн гиҗ зуралгдҗана, тегәд эн төсв теднә мергҗлт өөдлүллһнд болн дамшлт хоршалһнд туслх зөвтә.

Мана таңһчд эн төсвд «Молодая гвардия» олна ниицәнә баһчуд орлцад, күцәгч болн зака үүдәгч бүрдәцсин үүлдврлә таньлдҗ, олна үүлдәчнрлә харһҗана. Тиигәд, эдн шидр Хальмг Таңһчин Улсин Хуралын (Парламентин) Ахлач Артем Михайловла харһад, зака үүдәгч хургин үүлдврин болн олн партьсин нөкцлтин тускар медҗ авв. Келхд, эдн хойрдад Артем Васильевичлә харһҗана. Урднь болхла Элст балһсна Хургин Ахлач Максим Сорокинлә харһсн билә.
- Ода Улсин Хуралд дөрвн партин депутатнр үүлдҗәнә. Депутат болһнд эврә суңһачнр бәәнә, тегәд теднә неквр күцәхин төлә бидн ямр нег төр хаһлсн цагтан хамцу үүлдхәр шуннавидн. Нег-негнәннь тоолвр учртан авч, чинртә төрәр күүндхләрн бидн хамгин түрүнд әмтнә тускар ухалҗ олнд туста закад батлх зөвтәвидн. Бийм селәнә болн района депутатнрин Хургудын депутатар үүлдләв, ода таңһчин зака үүдәгч бүрдәциг һардҗанав, таңһчин Улсин Хуралд цуг партьсин элчнр нөкцҗ үүлдхин төлә чик шиидвр авх кергтә болна. Ямр чигн төрәр ил күүндвр тогтаҗ, даавртаһар үүлдх кергтә. Дәкәд талдан регионмудла нөкцлт батрулҗ, орн-нутгин күцәгч болн зака үүдәгч бүрдәцст олн-әмтиг соньмсулҗадг төрәр седвәр оруллһна керг ик чинр зүүнә. Әрәсән Өмн үзгт бәәдг регионмудын зака үүдәгч бүрдәцс 25 җил хооран олна ниицә бүрдәһәд, эн җилмүдин эргцд күцәмҗтәһәр үүлдҗәнә. Бидн закадын төсвсин тускар ухан-тоолврарн хувалцҗ, ямр нег сольвр оруллһна тускар өргн күүндвр тогтаҗ, хам-хоша бәәдг регионмудла олзта-тустаһар үүлдҗәнәвидн, - гиҗ Артем Васильевич цәәлһв.
Таңһчин зака үүдәгч Хургин үүлдврин, ямр нег закана төсв орулсн цагт ямаран белдврин ик көдлмш давулгддгин тускар бас күүндвр болв. Тиигәд, закана төсв таңһчин Улсин Хуралын сессьт хәләгдхәс урд терүг прокуратурин, юстицин министерствин болн нань чигн бүртклһнә бүрдәцсин мергҗлтнр шинҗләд, орн-нутгин заканла ирлцүлхиг некнә гиҗ Артем Васильевич келснь баһчудыг соньмсулв. Харһлтын йовудт баһчуд эдниг соньмсулҗадг төрмүд босхад, күүндврт шунмһаһар орлцв.
Сән авъяст тохрсар, «ПолитЗавод» гидг сурһулин төсвд орлцачнрла харһсн күндтә гиич туг деер йөрәлин үгмүд бичх зөвтә. Артем Михайлов баһчудт күцәмҗ дурдад, седвәртә, үнн-чик хәләцтә, төрскнч седклтә улс болтн гиҗ баһчудт дурдв. Дарунь цуһар хамдан зурган цокулв.
ДООҖАН Наталья

Видео