Үрс Сарин мөргүл

Сегодня, 11:29 | Общество, Таңһчин зәңгс, Зіњг

Ханты-Мансийск балһснд бәәдг хальмгуд Үрс Сар ашлад мөргүлд орлцв. 2013 җилд энд Шовкана Дмитрийин седвәрәр Бодь Суврһн босхгдсн билә. Ода эн Бодь суврһин эргндк һазринь ахулад, цевр-цер бәәдл тогтана.
Шовкана Дмитрий Москва балһснас ламнриг дуудад, Үрс Сарин мөргүл давулх седвәр татв. «Шагдор» төвин лам Нгаванг Риглам ирәд, бәәрн һазрин эзнд дееҗ өргәд, цуг улс амулң-менд, хоорндан ниитә бәәхин төлә Цетар, Лубсан болн нань чигн йорсхл күцәһәд, ном умшв. Мөргүлд орлцсн улс ки мөрнд эврәннь болн өөрхн элгн-саднаннь нерд бичәд одахн ясгдсн Бодь суврһна өөр-шидр салькнд делскв.
Ханты-Мансийск автономн дуһргин залврин келн-улсин политикин заллтын элч Дмитрий Макеев әрүн чинртә керг-үүлдврт орлцачнриг йөрәв. «Мана орн-нутгт Әрәсән улсин ниицлтин җил зарлгдв, ЮГРА-н һазрт олн келн-улсла хамдан хальмгуд ниитә бәәнә. Бидн хамдан Төрскнәннь делгрлтин төлә шунҗ көдләд, хоорндан, иньгллтин залһлдаг батрулх зөвтәвидн. Үрс Сард кесн буйнта кергин күчн кесг холванд икднә гиҗ тоолгддг, тегәд эн мөргүлд орлцснь цуг әмтнд туслтха», - гиҗ дааврта һардач цуглрсн улсиг йөрәв.
Үрс Сарин мөргүлд Хальмг Таңһчин Улсин Хуралд (Парламентд) таңһчин Толһачин элч Манҗин Араш орлцҗ, нег һазра улст бас йөрәлин үгмүдән нерәдв. Төрскн һазрасн холд бәәдг бийнь эдн өвкнриннь авъясар әрүн чинртә Үрс Сард иим йорсхл давулсиг өөдәнәр үнлв.
Мөргүлд орлцачнр миңһн һар заһс уснд тәвәд, эн һазрин эзнд дееҗ өргәд, дән-даҗг уга цуһар ниитә бәәтхә гиҗ зальврв. Шовкана Дмитрий мөргүлд орлцсн улст болн йорсхл давулсн ламд ханлтан өргв.
БАТАН Сәәхлә

Видео