Әмтнә зөв харсх күслтәһәр

Сегодня, 13:46 | Общество, Таңһчин зәңгс, Зіњг

Элст балһсна Ю.Клыковин нертә уульнцд «Справедливая Россия» партин Хальмг Таңһчин әңгин герт әмтнә зөв харслһна төв секгдв. Таңһчин седкүлчнр иигәрән ирсн кемд төвин көдләч Элстин бәәрн улсин неквриг оньган өгч соңсад, эдниг ЖКХ-н төр үүмүлҗәхиг медҗ авв. Тер мет «Справедливая Россия» партин элч, таңһчин Суңһврин комиссин гешүн Онкудан Владимир бас баһ наста залу күүнлә күүндҗ, газин төрәр учрсн төриг яһҗ хаһлхин тускар цәәлһвр өгв. Партин бәәрн әңгин юрист чигн дөңгән күргв.
Талдан чигн әмтн эн өдр партин төвд ирҗ бачм төрәрн хувалцв. Көдлмшин өдрмүдт өрүн 9 часас авн асхн 18 час күртл Элстин болн райодын әмтн нааран ирҗ цәәлһвр авч чадҗана. Партин гешүд болн олна көдлмш күцәдг шунмһа улс эднд дөң-тусан күргхмн.
- Мана партин әңгин медлд шин төв экләд көдлҗәнә. Таңһчин әмтн нааран ирҗ эврә төрән медүлҗ чадҗана. ЖКХ-н, пенсин, эмнлһнә, күч-көлснә зөвин болн нань чигн төрәр бидн дөңгән күргҗ чадхвидн. Талдан регионмудт «Справедливая Россия» партин төвмүд бас үүлдҗәнә, – гиҗ партин Хальмг Таңһчин әңгин ахлач Наталья Зинченко келв. – Әмтнә төр зарһин сүүрәс урд хаһлҗ болҗана. Болв терүнә төлә эврәннь зөвән сәәнәр медх кергтә. Эн туст иргнмүдин зөв харслһна төв эрк биш дөңгән күргәд бәәх, тегәд мана тал иртн, бидн дөңгән күргхдән белн бәәнәвидн.
Энүнә келсәр, партин төв түрүн долан хонгтан көдлҗәнә. Әмтнәс орҗ ирсн эрлһсиг эдн шинҗлҗ хәләҗәнә. Зөв-йос харлһна бүрдәцст эврә эрлһсән йовулад, теднә хәрүһинь күләҗәнә. Юрист өңгәр дөң-нөкд болҗана, социальн кесг төр хаһлҗана, тернь партин һол күсл мөн. Төвин элчнр цуг райодар чигн һарч йовад әмтиг соньмсулҗадг төрмүд медҗ авх.
Мана парть үнн-чик хәләцән медүлҗ үүлдҗәнә, эндр өдр олн-әмтнә ниицлт бас ик чинр зүүҗәнә гиҗ Наталья Николаевна келв. Тегәд чигн энүнә көтлврт шин төв секлһн хамгин түрүнд күцәх төр гиҗ заагдсмн. Тер мет баһчудла көдлмшән шунмһадулҗ, күүкд улсин җисәг делгрүллһнә төр хаһлх кергтә болна.
Наталья Зинченко Хальмг Таңһчд өсч босла. «Тооцана төв» гидг бүрдәциг һардна, баһ болн дунд бизнесиг дөңндг «Әрәсән түшг» гидг бүрдәцин таңһчин әңгин болн Хальмг Таңһчин хулд-гүүлгәнә болн салг-үүлдврин палатын гешүн болҗ олна керг-үүлдврт шунмһаһар орлцҗана.
ТҮРВӘН Һуна

Видео