Ончрсн көдләчнриг ачлв

Сегодня, 12:15 | Общество, Таңһчин зәңгс, Зіњг

Элстин бичкдүдин үүдәлтин герт бәәрн залврин бүрдәцин сән Өдрт нерәдсн байрин хург болв. Хальмг Таңһчин Толһачин һардврин ахлачин дарук Шипин Екатерина, таңһчин залврин Ахлачин негдгч дарук Цернә Эрднь, Элст балһсна Хургин ахлачин дарук Александр Владимиров, Элстин һардврин ахлачин дарук Дмитрий Довгополов терүнд орлцв.
Шипин Екатерина Хальмгин Толһач Хаска Батун йөрәлин бичг олнд соңсхад умшв.
– Күндтә ветеранмуд болн эндр көдлҗәдг мергҗлтнр! Муниципалитетмүд орн-нутгин болн региона заллтын бат улнь болдг. Өдр болһн көдлмшән даавртаһар күцәһәд, нег һазра улсин җирһлинь ясрулхар шуннат. Элст балһсна бүрдәцсин ветеранмудт, һардачнрт болн көдләчнрт, депутатнрт, ач-тусан күргҗәдг цуг улст ханлтан өргҗәнәв! – гиҗ йөрәлин бичгт келгдв.
Таңһчин залврин Ахлачин негдгч дарук Цернә Эрднь бас муниципальн цергллтин ветеранмудыг йөрәҗ, мел тадна үлгүрәр өдгә цагт Элстин бүрдәцсин мергҗлтнр даавртаһар көдлҗәнә гив. Элст хотл балһсн өдр ирвәс кеерәд, өсәд-өргҗәд йовна. Мана тал олн гиичнр болн зуульчнр ирҗәнә. Цааранднь чигн төрскн һазр-усан делгрүләд, кеерүләд йовтн, гиҗ Эрднь Николаевич дурдв.
Тогтсн авъясар Элстин муниципальн цергллтсин ончрсн көдләчнр олн зүсн темдгүдәр ачлгдв. Олн җилдән седклән тәвҗ, кергән даавртаһар күцәҗ йовдг төләдән Элстин һардврин сойлын болн зуульчллһна заллтын һардач Эрднин Данзнд (зургт), тер мет Җанҗин Индирад, Мукөвүнә Байртад болн Сумьяна Викторияд Хальмг Таңһчин бәәрн һазрт йос заллһна ачта көдләчин нерн зүүлһгдв. Терүнәс нань кесгнь Күндллһнә һашгудар болн Ханлтын бичгүдәр темдглгдв. Байрин хургт ирсн ветеранмудт цецгүд болн белгүд бәрүлҗ өгв.
Хургин йовудт Әрәсән ачта артист Чиктән Татьяна, Цевгә Төлән нертә шаңһа хорин дууч Ванькан Александр, баахн дуучнр Хоҗһра Баира, Мила Сенькина, «Олимп», «Байн Тег» ансамбльмудын бичкдүд ду-бииһәрн цугтаһинь байрлулв.
КАРСАНА Евгения

Видео