Бамб цецгин наадм - таңһчин райодт

Сегодня, 14:26 | Общество, Таңһчин зәңгс, Зіњг, Сойл

Бамб цецгин наадм цаарандан давҗана. Мөрн сарин 18-д таңһчин нәәмн районд нәр-наадн болв.
Баһ Дөрвд селәнә төвд «Җаңһр» нертә стадионд ирлцңгү керг-үүлдвр бүрдәгдв. Сойлын кергүд спортын марһасла зерглҗ давулгдв. Сән авъяст тохрсар җил болһн армрестлингин дөрлдәнд олн-әмтн цуглрна. Терүнд Аһшин болн Ростов мүҗсин элчнр бас орлцсинь темдглх кергтә.
Района селән болһна ишкә герт орад, теднә тууҗла таньлдҗ болв. Хотна күүкд улс ирсн гиичнриг бүләнәр тосад, шимтә хотар тоов. Нег ишкә герт нертә бичәч Велимир Хлебниковин музей бүрдәгдв. Дотрнь билгтин дегтрмүдәс болн талдан соньн тоотас нань соньн һәәхүл олн-әмтнә оньгт тусхагдв.
Тер мет һартан өөтә Харан Надеждан «Лоскутная Россия» нертә өвәрц һәәхүл үзүлгдв. Надежда Степановна олн зүсн өңгтә кесг эдин тасрхаһас кегдлмүд, ор-дер, көнҗл, наадһас, зургуд болн нань чигн олн тоот уйҗ һарһна.
Баһ Дөрвдә районд өсч-боссн үрн, Хальмг Таңһчин нертә артист Орган Эрвена, билгтә дууч Мукан Санл болн района бииһин коллективс концертд орлцв.
Тер өдр көтчнрәхн бамб цецгин наадмд ирсн гиичнрән бас тосв. Тенд «Ниитә Әрәсә» нертә нәр-наадн давулгдсмн. Күндтә гиичнрин дунд Төрскән харсгч Алдр дәәнә ветеран Петр Леонтьев, таңһчин һазрин болн өлг-эдин хәрлцәнә министр Дошкатан Мергн болн Элст балһсна Хургин Ахлач Максим Сорокин ирснь темдгтә болв.
– Хальмг Таңһчд 1958 җилд нүүҗ ирәд, эндр күртл энд бәәнәв. Тосхлһна халхар дөчн һар җилдән көдләд, ачта амрлһндан һарлав. Тана нәәрт ирҗ орлцсндан байрлҗанав, тадн намаг күндләд, бүләнәр тосснд ханлтан өргҗәнәв. Цуһар эрүл-менд, гем-шалтг уга бәәтн, – гиҗ Петр Леонтьевич цугтаһинь йөрәв.
Максим Сорокин Элст балһсна һардврин болн ЭГС-ин нерн деерәс Көтчнрә района бәәрн улсиг йөрәһәд, мана орн-нутгт, нег үлү таңһчд олн келн-улс ах-дүүһинәр бәәдгиг дәкнәс темдглв. Бидн хоорндан ниитәһәр бәәхлә ямр чигн керг күцәгдәд бәәхнь лавта, гиҗ эн тодлулв.
Байрин йовудт Көтчнрә района муниципальн бүрдәцин толһачин үүл дааҗадг Азота Санл төрскн һазрин делгрлтд ач-тусан күргсн улсиг күндллһнә темдгүдәр ачлв. Тер мет нәр-нааднд Ростовин мүҗин Заветинск районас ирсн «Забава», «Импульс», «Русская песня» болн «Земляки» гидг коллективс дипломсар ачлгдв.
Сарпан районд болхла бамб цецгин наадмин йовудт сойлын көтлвр бүрдәгдсн деерән цергә шишлң керг-үүлдврт орлцҗадг нег һазра дәәчнрән дөңнхин төлә ирлцңгү керг бас күцәгдв. Района КЦСОН-на улд көдлҗәдг седвәртә күүкд улс гөлм гүрнә, хувц уйна, өөмс өлгнә, талдан чигн кергсл кеҗ һарһна. Тер өдр эдн уйсн наадһасан хулдад, хоршасн мөңгәр кергтә эм хулдҗ авад, СВО-н һазрт илгәхәр шиидв.
Ишкә гермүд тал бәәрн улс болн гиичнр оларн ирв. Района селәнә муниципальн бүрдәц болһн эврә ишкә герән босхв. Дотрнь селән болһна күцәмҗлә таньлдҗ болхмн. Хотн болһна өөр домбрин айсмуд соңсгдҗ, хальмг би биилсн улс үзгдв. Бичкдүдин төлә олн зүсн талвңгуд бас көдлв.
Хальмг Таңһчин Толһачин һардврин ахлачин дарук Тарбан Савар, Әрәсән Федерацин Хүүвин гешүн Хачирә Борис, Улсин Хуралын (Парламентин) Ахлачин дарук Нуура Николай болн сурһуль-эрдмин болн номин министр Александр Ким Приютна района бамб цецгин наадмин байрт орлцв. Күндтә гиичнр ишкә гер болһнд орад, дотрнь бүрдәсн һәәхүлмүдлә таньлдв.
– Өргн буурл тег – мана зөөр. Җил болһн мана тал ирдг зуульчнрт соньн, өвәрц сойлан болн талдан тоотан үзүлнәвидн. Хальмг теегин кеермҗ болҗадг бамб цецгүдән хадһлх кергтә. Мел иим күсл хаврин байрин керг-үүлдврин һол күслнь болҗана, – гиҗ Хачирә Борис олнд тодлулв. Приютна района сойлын коллективслә хамдан Хальмгин ачта артист Шаран Дмитрий, баахн дуучнр Хоҗһра Баира, Асият Исаева концертд орлцад, билг-эрдмәрн байрлулв.
Хар Һазра района Комсомольский поселкин В.И.Ленинә нертә талвңд ирлцңгү нәр-наадн бас болв. Салькта болв чигн харһазрахн оларн ирв. Таңһчин залврин Ахлачин дарук Александр Мишаков, йиртмҗин көрңгин болн эргндк бәәдл харлһна министр Һооҗура Санл, ЖКХ-н болн энергетикин министрин үүлиг дааҗадг Константин Климентьев болн Олимпийск тоод ордго спортын Федерацин президент Борис Гришин «Бамб цецгин частр» нертә байрт ирҗ орлцв.
Хар Һазра РМО-н толһачин дарук Махамбет Кибашев халун мендән илгәҗ, нег һазра улсиг болн нәәрт ирсн гиичнриг йөрәв. Энүнә келсәр, бамб цецгин наадмд җил ирвәс олн гиичнр ирәд, мана тууҗла, өвәрц авг-бәрцлә өөрхнән таньлдна. Тер мет байрин концерт хәләҗ, олн зүсн марһаст орлцҗ, шимтә хот амсҗ, цаган сергмҗтәһәр давулна гиҗ эн келв. Таңһчин һардврин болн залврин нерн деерәс Александр Мишаков йөрәһәд, бүлән үгән келснь темдгтә болв.
Наадмин йовудт болсн лотерей олн-әмтн дунд байр-бахмҗ үүдәв. Үнтә белгүд шүүҗ авсн улс байрлҗ хәрснь маһд уга.
Городовиковск районд ирлцңгү керг-үүлдвр һал тәклһнәс эклв. Хурлын лам ном умшад, бәәрн улс болн гиичнр цуһар эрүл-мендин бәәдлин болн эвин төлә зальврв.
Хальмгин сойлын болн зуульчллһна министр Бембин Евгений болн Элст балһсна Хургин депутат, цергә шишлң керг-үүлдврин ветеранмудын бүрдәцин һардач Чумуда Николай эднә байрт ирҗ орлцв.
– Бамб цецгин наадм нег һазра улс дунд, нег үлү мана таңһчд ирдг гиичнрин дунд ик тааслт олсн керг-үүлдвр болҗана. Хамгин түрүнд эн нәр-наадн өвкнрин сойл, авг-бәрц, байн амн үгин зөөр хадһллһна туст давулгдна. Бүрдәгдсн талвңгудт олн зүсн керг-үүлдврт болн марһаст шунмһаһар орлцад, цаган тустаһар болн сергмҗтәһәр давултн, – гиҗ Бембин Евгений цуглрсн улсиг йөрәҗ келв.
Тенд бәәдг олн келн-улсин элчнр ду-бииһән үзүләд, соньн һәәхүлмүд бүрдәһәд, нег һазра эрдмчнр кеҗ һарһсн кегдлмүдән болн белгүдән хулдв. Армрестлингин, бөк бәрлдәнә, шатрин болн спортын талдан марһаст әмтн олар орлцад, дииләчнрнь болхла үнтә белгүдәр ачлгдсн болдг.
Хам-хоша бәәдг Яшалтан района бамб цецгин наадмин йовудт олн зүсн соньн керг-үүлдврмүд бас бүрдәгдв (зургт). Гиичләд ирсн Хальмгин баһчудын керг-төрин агентствин һардач Камиль Маркеев, Улсин Хуралын (Парламентин) депутат Елена Лотник болн ЭГС-ин депутат, СВО-н ветеран Чумуда Николай бәәрн улсиг хаврин байрла йөрәһәд, цаһан хаалһ дурдв. «Бамб цецг» шаңһа ду-бииһин ансамбльд орлцачнр болн таңһчин ачта артист Бембин Гилән билгән олнд нерәдв.
Тогтсн авъясар җил болһн тенд давулгддг нохассин гүүдлин марһан олыг соньмсулснь лавта. Хамгин хурдн нохан эзн үнтә белгәр бас ачлгдв.
Эн долан хонгин чилгчәр бамб цецгин наадм Ик Буурла, Октябрьск, Лаганя болн Үстин районд болхмн. Тиигәрән олн гиичнр ирх гиҗ бас күләгдҗәнә. Терүнә тускар мана дарани һарцст зәңгләд бәәхвидн.
КАРСАНА Евгения

Видео